Salama Rayo di kampuang, ado nan dicaliak anak-anak babeda jo hari-hari di kota. Manjalang babuko, alah tahidang makanan di ateh lapiak. Induak-induak manyusun nasi angek di tangah-tangah jo samba di sakaliliangnyo.
Wakatu mamasak alah bapastian, ado samba lado, sayua, gulai, randang, samba nan digoreng, takah samba buruak-buruak. Samba buruak-buruak ko idola bana. Dalam piriang ado tahu, tempe, jo ikan asin nan dipotong ketek-ketek. Ado nan baagiah lado merah, ado pulo nan baagiah lado hijau. Kok mancaliak yo mambuek tabik salero.
Karupuak jo buah indak lupo dihidang, kok ado karupuak jangek jo karupuak jariang, kok indak karupuak ubi nan ketek-ketek jadi juo panambah kulek makan. Dek urang Minang, karupuak ubi ko ado juo nan diagiah lado, bahidangan pulo sapiriang-sapiriang. Karupuak ko panambah kulek makan jo samba lado.
Katiko alah basusun nasi jo samba tadi, basusun pulo piriang makan jo galeh. Di kampuang, galeh ko baisi aia teh angek kacapan. Aia teh kacapan ko mukasuiknyo, aia teh ndak manih bana. Pas untuak minum ka babuko.
Nan wajib ado ciek lai, iolah timbala. Kabasuah mangkuak ketek untuk cuci tangan. Kabasuah iko nan kini alah jarang ado di rumah-rumah, tarutamo sajak di rumah-rumah alah ado wastafel, tampek cuci tangan bantuak urang Baraik. Apolai sajak rumah alah bameja makan, urang-urang pai mambasuah tangan ka wastafel tu dulu, baru duduak maambiak nasi. Kok lai nan ka diagiah timbala, urang gaek laki-laki, sabab indak elok liau basuah tangan ka wastafel.
Salain dek wastafel, sendok nan dipakai untuak makan alah maubah tabiat urang awak. Alah banyak nan makan pakai sendok kini, ndak manyuok jo tangan lai. Sampai-sampai anak mudo kini, labiah pandai pulo mangupiah ayam jo ikan pakai sendok daripado pakai tangan. Dek baitu pulo, nan timbala ko lah ndak dipakai lai.
Tapi salamo Rayo di kampuang, satiok makan, anak-anak alah dipasan dek Oma. “Ambiak kabasuah, Nak.” Kecek Oma, urang dulu manyabuiknyo timbala. Di tampek lain, ado nan manyabuiknyo tambola, ada juo nan manyabuiknyo tambila. Barangnyo itu juo, untuak kabasuah tangan sabalun jo sasudah makan.
Di tampek urang manggaleh makan, timbala ko lai masih ado juo, tarutamo di rumah makan Padang jo tampek makan pecel lele. Di tampek makan pecel lele, pasti ado timbala. Tapi namonyo basabuik tampek cuci tangan sajo. Kok di rumah makan padang nan alah bantuak restoran, salain timbala, basadioan pulo wastafel, maikuik kondisi urang nan kini lah tabiaso cuci tangan di wastafel.
Makan jo tangan memang jadi sunah nabi. Elok dijadikan tradisi. Kadang-kadang di tampek baralek atau di hotel, ado juo ciek duo urang tuo nan makan jo tangan. Katonyo, indak raso makan pakai jo sendok itu, tapi di tampek iko alah indak ado timbala. Kok paralu mambasuak tangan, bisa manunggangan aia ka piriang sasudah makan. Kok sabalun makan, harus pandai-pandai mancari tambek basuak tangan.
Tapi dek pulang Rayo ka kampuang, lai taubek juo hati urang tuo di kampuang. Dek makan basamo di lapiak, tasabuik baliak timbala ka nan mudo-mudo. Kok dapek takana juo dek urang nan pulang, kabasuah untuak makan ko namonyo timbala.
