Kapatang duo hari nan lapeh, sudah sumbayang asa, Mak Uniang ditalepon Mak Itam Panjang Sunguik nan jadi panguruih Musajik Nur.
Malam tadi, Mak Uniang maagiah parintah ka Malanca baduo jo Tan Mudo, payi ka Musajik Nur tu.
“Tamui panguruih musajik tu, kecekan ka inyo wak ka baiktikaf sinan tigo malam. Beko kok apo jaweknyo, agiah tahu baliak dih,” parintah Mak Uniang.
“Jadih, Mak Uniang. Lah barangkek wak lai, Tan Mudo?” kecek Malanca ka Tan Mudo, sambia masang tarompa di pintu Musajik Tawakal sudah sumbayang Mugarik. Mak Uniang sanyum malapeh.
Tibo di rumah Pak Panguruih, Tan Mudo langsuang maagiah tahu apo mukasuik kadatangan baliau baduo jo kawannyo tu.
“Ndak baa doh Tan Mudo, iko rancak mah. Kito paralu mambiasoan iktikaf di musajik ko. Kok ndak baitu, payah mambawo nan mudo-mudo masuak musajik, apolai sadang bak kini, banyak na godaan, tamasuak joget-joget dalam hape, tagoda bana nan mudo-mudo mancaliak itu,” jawek Mak Itam nan jadi katua panguruih.
Sabalun Tan Mudo baliak kanan, babaliak pulang, Mak Itam maagiah pandangan pulo, “Tapi, Tan Mudo. Ko maoh sajo yo. Ancak wak basaro lo setek ka panguruih nan lain. Karano tu, di siko sajolah kito sumbayang isya. Beko sobok jo baliau-baliau tu mah,” kecek Mak Itam.
Sambia manunggu aia minun nan dihidang anaknyo, Mak Itam batanyo ka Malanca. “Baa carito Pekok kini, Nca. Lai jadi baliau diangkek jadi pangulu?” tanyo Mak Itam.
“Akia-akia ko, ambo ndak sobok jo Pekok doh, Mak Itam. Kadang lah maleh lo ambo jo Pekok tu. Muncuangnyo tu Mak Itam. Antahlah Mak, kok disabuik bana, bagunjiang lo awak jadinyo,” jawek Malanca.
Malanca manjawek takah tu, dek takana pasan Mak Uniang manjalang ka payi. Kecek Mak Uniang, ijan banyak kecek jo Mak Itam. Nan paralu sajolah disampaian. Ciek lai, manuruik Mak Uniang, taradok kakobeh Mak Itam ko, awak musti samiak na wa atakna: danga sudah tu karajoan.
Ndak lamo minum kawa, garin Musajik Nur lah azan. Malanca jo Tan Mudo batigo jo Mak Itam langsuang ka musajik. Sudah sumbayang sunat, urang kamat. Panguruih mintak Malanca taruih ka mikrab jadi imam.
Malanca badabok. Kakinyo barek. Raso-raso ka baa. Sambia mambiak angok nyo mancaliak ka Tan Mudo. Tapi isyarat Tan Mudo lagak manyuruah. Sabab, kok bakilah lo Malanca, bisa ndak buliah dek panguruih makai Musajik Nur untuak iktikaf.
Ndak ado jalan lain, daripado daripado, Malanca langsuang ka muko. Sudah sumbayang, Tan Mudo tacangang. Dalam hati inyo mambatin, untuang layi salasai baokan Malanca. Alhamdulillah.
Ruponyo panguruih mintak pulo Tan Mudo maagiah wirik pangajian, sambia manjalehan apo manfaat baiktikaf di musajik.
“Ondeh, dapek lo giliran wak mah,” bisiak Tan Mudo samo surang.
Taraso bakipeh raso di jantuang. Tapi daripado daripado pulo, jo tanang Tan Mudo naik kurisi. Karano lai baok baka payi manapa, Tan Mudo pandai pulo malapeh curito.
Akianyo kawan nan baduo ko, dapek puji dek panguruih. Imam mantap, tukang caramah santiang. Buliah makai musajik untuak iktikaf.
Sudah basalam-salam jo jamaah. “Kamaa wak lai, Sekh Malanca,” kecek Tan Mudo galak takekeh bagarah sambia pulang.
“Wak sampaian kaba ko dulu, ka Mak Uniang, yo Maulana Tan Mudo,” jawek Malanca Manahan galak manakan paruik.
Sabalun mareka ko tibo maagiah kaba. Mak Uniang, lah tahu dari Mak Itam malalui talepon. Sabab, kutiko manalepon dulu tu, sabananyo, Mak Itam mintak Mak Uniang maisi wirik pangajian sudah isya.
Karano Tan Mudo nampak layi babakat, mako inyo diutuih Mak Uniang ka sinan.
“Lai mantap Tam?” tanyo Mak Uniang ka kawannyo tu.
“Jadi juolah Niang. Lah luluih sertifikasi mah. Jamaah lai suko. Bisuak ko, kami mintak Tan Mudo ko liak yo!” jawek Mak Itam.
Baitu caro Mak Uniang, mauji muriknyo. Akianyo Tan Mudo tahu juo, baso inyo dikarajoan Mak Uniang. Tapi baa lai, Tan Mudo sanang pulo. Sudah caramah saku barisi.
