Sangkek ketek-ketek dahulu, anak gadih di Minangkabau ko dilatiah dek orang gaeknyo untuak baraja mamasak. Mulo-mulo diaja dari masak nasi. Katiko dahulu, sangkek itu kami nan gadih-gadih ko dimintak masak nasi jo dandang. Takaran barehnyo bisa tigo sampai lima tekong. Tekong wakatu itu tekong yang tabuek dari kaleng susu. Kalau kini alah ado tekong nan sesuai jo ukuran mejik.
Dek kami dahulu masak pakai dandang, kami taka bareh jo tekong susu sajo. Katiko mamindahan bareh ka dandang, urang gaek kami mangecek, ambiak bareh saganggam, pisahan ka dalam kaleng atau ka dalam embe nan alah disadioan. Dek kami diaja tantu manuruik sajo mangaluaan saganggam bareh.
Dek ado nan diaja, tantu kami batanyo, baa kok harus bakaluaan pulo bareh saganggam? Manjawek urang gaek kami, katiko isuak awak indak bapiti, indak ado nan ka dibali untuak ka dimakan, bareh ko lah nan dipakai untuak ka dimasak. Kok malang tasuo, pitih indak ado, bareh ganggam nan disimpan ko nan dipakai.
Indak sajo katiko indak ado nan ka dimakan, katiko ado kamalangan, ado dunsanak nan maningga, bareh ko bisa dipakai untuk pai manjanguak ka tampek urang yang kamalangan. Tapi kini nan bareh ganggam ko indak tasuo bana kini, elok di rantau atau di kampuang.
Tapi katiko kami pai ka Nagari Muaro Aie di Bayang Utara, Pasisia Selatan, kironyo masih tasuo masyarakaik nan manyimpan bareh ganggam. Di Nagari Muaro Aie ko, bareh di tiok rumah indak sagantang duo gantang, saliter duo liter, atau sakilo duo kilo sajo. Urang-urang tabiaso maisi lumbuang padi, maisi rumah jo duo puluah kilo bareh. Bareh ko nan utamo ado di ateh rumah.
Baa kok harus ado? Nagari Muaro Aie ko talatak di tampek indak rancak, di subalah kida, ado bukik nan bisa tibo-tibo longsor se dek curah hujan tinggi, samantaro di sabalah kanan, ado sungai gadang nan alah pernah mambaok galodo dari bukik di atehnyo. Sabana bedo. Apolai di bukik nan sabalah kiri, alah tasarobok dek BPBD baso alah baganggang pulo tanah di ateh itu.
Apo nan tajadi kok curah hujan tinggi, longsor atau aia gadang, acok masyarakaik ko takuruang. Kadang jalan putuih, indak bisa kalua dari kampuang. Ka pindah tingga ka tampek nan aman, iko kampuang nan alah manggadangan sajak ketek. Bahkan, ado nan alah tujuah puluah tahun tingga di sinan. Mako dek itu, nan bisa dikarajoan dek masyarakaik sinan, manyiapan diri kok tibo-tibo tajadi galodo atau aia gadang.
Apo nan disiapan? Tasabuik dek masyarakaik baso alah tabiaso manyiapan panyurutan atau tabungan makanan. Nan ditabuang itu bareh ganggam tadi. Salain bareh, basingajoan babali ikan kariang, bada, maco, atau nan kariang-kariang untuak ka disimpan di rumah. Kok urang kota mambali lauak kariang ko saons duo ons, masyarakaik Nagari Muaro Aie, mambali satangah kilo. Kok ado bancano, takuruang duo sampai tigo hari dek jalan putuih, masyarakaiknyo makan nasi jo ikan asin ko salamo itu.
Tapi indak itu sajo, kok ado talua, bisa juo makan jo talua. Aratinyo, dek kondisi geografis Nagari Muaro Aie ko indak aman dari alam, masyarakaik mamiliah untuk manjago apo bana nan paralu disiapan sabalun bancano dan apo nan ka dikakok katiko bancano. Nan jaleh, salain makanan tadi, alah ado tas siaga. Isinyo surek-surek tanah, surek rumah, ijazah, atau surek-surek baharago nan dilatakkan di ateh lamari. Kok tajadi bancano, tas itu diambiak, dibaok ka tampek nan alah dijadian tampek evakuasi, kayak pasa atau sakola nan tanahnyo lapang, lokasi nan masih aman jadi tampek balinduang.
Sayang sajo nan indak tapikia dek masyarakaik sinan iolah ubek-ubek nan harus disiapan pulo katiko tajadi bancano. Kok ado nan luko-luko, paruik nan sakik, badan nan rangkik, itu nan paralu dipikiaan baso paralu ciek lai tas nan baisi ubek jo makanan nan bisa dibaok sakali angkek. Tapi tantang itu bana, di sinan masih ado kearifan masyarakaik lokal, lah tabiaso manyiapan panyurutan, tabuangan untuak jago-jago kok ado bancano.
