Sawahlunto — Wakia Walikota Sawahlunto Jeffry Hibatullah bapandapek baraso LKAAM Sawahlunto malalui peran niniak mamak alah manjadi tonggak pantiang dalam manjago karukunan, kekompakan, jo kadamaian masyarakat Sawahlunto nan dihuni dek baragam etnis ko.
“Salain tu, peranan LKAAM dalam malestarikan adat Minangkabau jo mambantengi anak kamanakan dari pangaruah negatif budaya nan ndak sandereh dari lua, dimaso-maso nan katibo makin taraso pentingnya” kato Jeffry kutiko maagiah sambutan dalam Musyawarah Daerah VI LKAAM Sawahlunto, hari Raba’a kapatang ko .
Manuruiknyo LKAAM jo KAN basamo niniak mamak di Sawahlunto akan punyo tangguang jawab nan labiah gadang dalam manjago jati diri adat jo budaya Minangkabau di tangah tantangan zaman kini.
Sadangkan Wakia Ketua LKAAM Sumatera Barat Syafrizal Ucok D. Nan Batuah juo mangatokan tentang peranan LKAAM tu di masao nan ka tibo. “Sebagai organisasi nan konsentrasinyo satu baupayo malestarikan adat Minangkabau, LKAAM akan punyo tanggung jawab an ndak ringan di maso nan ka datang, sabab arus budaya dari lua nan ndak sasuai jo awak tiok hari masuak ka masyarakat aak,” kato mantan Pj Bupati Mentawai jo Dharmasraya ntun.
Musda VI LKAAM Sawahlunto nan diadokan di hotel Saka Ombilin tu lah sasuai sajo ruah jo buku mamilih baliak H. Dahler Dt. Pangulu Sati ka untuak menjadi Ketua LKAAM periode barikuiknyo (2026-2031)
Tapiliahnyo Dahler Dt. Panghulu Sati sabananyo alah lamo dipakirokan. Sajak Musda dibukak pagi hari, bisik-bisik dari utusan LKAAM kecamatan alah tadanga kareh, bahaso utusan Kecamaatan ko akan maagiahkan suaro sadonyo untuk Dahler Dt. Pangulu Sati.
Kutiko sidang pleno sampai ka agenda pemilihan, dimintak dek pimpinan Sidng Syafrizal Ucok Dt, Nan Batuah supayo masiang-masiang kecamatan manyorongkan calon ketua. Dek kaamepk-ampek kecamatannyo samo maonyokan namo nan samo, berarti ndak ado calon lain kecuali ZDt. Panglu Sati.
“Itu kan berarti aklamasi, ndak paralu ado pemilihan lai. Angku Datuak Panglu Sati, sah tapiliah sacaro bulek,” kecek Datuak Nan Batuah sambia manokok meja tando sidang lah sah.
Samantaro tu, di ruangan nan lain Hotel Saka Ombilin, juo diadokan Musda Bundo Kanduang Kota Sawahlunto tahun 2026. Hasia pemungutan suaro mamutuihkan Bundo Fauziah sabagai Ketua Bundo Kanduang Kota Sawahlunto untuak maso bakti 2026–2031.
Musda VI LKAAM Kota Sawahlunto dibukak sacaro resmi dek Wakil Wali Kota Jeffry Hibatullah. Hadir dalam acara pambukaan antaro lain Waketum I LKAAM Sumbar Syafrizal Ucok Dt. Nan Batuah, Waketum III LKAAM Sumbar Drs. Reflidon, MM Dt. Kayo, Anggota DPRD Sumbar Daswipetra Dt. Manjinjiang Alam, Wakil Ketua DPRD Sawahlunto Aldi Aswandi Pandito Batuah, unsur Forkopimda, Asisten Setdako, Kadis Kebudayaan Sawahlunto Drs. Guspriadi, MM, TP PKK, Bundo Kanduang, jo Dharma Wanita Persatuan.(tan parpatiah)
