RAGAM MAKANAN RANG AWAK (3)
Lamang Baluo menarik karano makanan ko bukannyo sakadar macam lain dari lamang. Makanan ko manunjukan kapandaian urang Minangkabau mangolah sipuluik, santan, karambia, jo gulo saka manjadi makanan nan sederhana tapi kayo raso.
Dalam istilah Minangkabau, lamang adolah makanan nan dibuek dari bareh sipuluik atau sipuluik. Sadangkan baluo manunjuak kapado bagian inti nan dibuek dari karambia kukua nan dimasak basamo gulo saka atau gulo merah. Paduan itulah nan manjadi ciri utamo Lamang Baluo.
Kalau lamang biaso mampunyai raso gurih dan acok dimakan basamo tapai, Lamang Baluo lah mampunyai raso manih di bagian tangahnyo.
Sipuluik nan guriah jo lambuik basatu jo karambia nan manih-legit karano gulo saka.
Bilo lamang dibalah, bagian tangahnyo akan manampakkan inti karambia nan barwarna kecokelatan. Itulah nan disabuik baluo atau luo.
Nan istimewa dari Lamang Baluo adolah caro mamasuakan raso guriah jo manih dalam ciek makanan.
Bareh sipuluik dimasak basamo santan jo saketek garam. Santan maagiah raso guriah sekaligus mambuek tekstur sipuluik manjadi lambuik jo pulen.
Samantaro itu, karambia parut dimasak basamo gulo saka sampai manjadi inti nan legit.
Bilo keduonyo disatukan, lahia paduan: sipuluik nan pulen, santan nan guriah, karambia nan harum, jo gulo saka nan manih.
Bau khasnyo samakin kuaik karano proses mamasak manggunoan angek api atau baro.
Di babarapo tampek ado caro tradisional mambuek Lamang Baluo jo batuang. Ado pulo nan mambueknyo jo caro membungkuih sipuluik jo inti manggunoan daun pisang, sudah tu memanggangnyo.
Jadi, caro mambuek Lamang Baluo bisa babedo manuruik daerah jo kabiasoan keluarga nan mambueknyo.
Ado babarapo variasi caro mambueknyo, tapi prinsipnyo hampir samo.
Mulo-mulo bareh sipuluik dicuci, sudah tu dimasak sampai masak atau satangah masak. Sipuluik sasudah tu dicampua jo santan jo saketek garam supayo rasanyo guriah.
Bagian nan paliang menarik adolah mambuek inti baluo.
Karambia parut dimasak basamo gulo saka atau gulo merah sampai gulo larut dan meresap ka dalam karambia. Hasianyo bukan sekadar saus, tapi adonan karambia nan lambuik, manih, dan agak lengket. Sipuluik sudah tu diagiah inti di bagian tangahnyo.
Dalam salah satu caro tradisional, sipuluik jo inti ditampekkan dalam batuang nan alah dilapisi daun pisang, sudah tu dibaka sampai masak. Caro lainnyo adolah mambantuak sipuluik jo inti manjadi gulungan, membungkuihnyo jo daun pisang, sudah tu memanggangnyo. Sasudah masak, lamang dikaluakan, sudah tu dipotong-potong.
Bilo masih hangek, bau sipuluik, santan, karambia, gulo saka, daun pisang, jo hasia panggangan basatu manjadi ciek. Itulah salah satu daya tarik Lamang Baluo. (Tan Parpatiah)
Baca juga: Palai Rinuak
