Di rumah kami ado taneman nan digoreng jo lado merah. Anak kami nan gadang amaiklah suko jo ikan taneman iko. Ikannyo manih taraso. Di kamuih bahaso Minang, namonyo tandeman. Anak-anak kini indak banyak tahu jo ikan ko. Paliang kok ado di rumah makan, basabuik se ikan ketek-ketek.
Ikan di Minang ko disabuik juo jo lauak. Kok pai ka rumah makan, nan nio makan jo lauak, ditanyo “A lauaknyo, Da?”. Bisa gambolo, bisa pulo nila. Nan lauak ko bisa digoreng, digulai, atau dibuek asam padeh.
Bacarito tantang lauak ko, ado nan jadi tradisi babeda di Minang. Urang-urang darek nan tingganyo takah di Sijunjuang jo Dharmasraya, kok taragak makan ikan lauik, indak ka batanyo namo ikan nan nio dimakan. Biasonyo batanyo, “Ado ikan Padang?”. Baa kok ikan Padang namonyo? Ado sejarahnyo. Ikan lauik yang dibaok ka darek daulunyo diambiak dari Padang.
Daulu darek jo lauik (Padang) itu amaiklah jauah. Banyak oto indak saroman kini. Jalan indak pulo sarancak kini. Ikan nan ditangkok pagi di lauik kadang baru bisa dibali bisuak ari. Jadi, dek payahnyo situasi waktu dulu, urang darek amaiklah payak mandapekan ikan dari lauik.
Ikan lauik banyak pulo ragamnyo. Indak ciek. Kok dicaliak nan ado di kamuih bahaso Minang, ado namonyo ambu-ambu, kurapu, gabuih, gambolo, baledang, tandeman, tanggiri, balanak, barau-barau, bareh-bareh, bawa, bayan-bayan, bonta, capa, gagauak, keroang, kuran, adau-adau, aso-aso, kurau, lidah-lidah, luli, maco, mansai, sambilang, tamban, tete, todak, inggu, jo tumagguang. Dari banyak ikan lauik ko, mungkin adon nan alun dicubo. Apolai anak-anak kini labiah suko makan ayam daripado ikan, indak ka tahu namo-namo ikan lauik iko.
Salain ikan lauik, ado pulo ikan tawa nan mungkin alah dimakan, ado juo nan alun tahu samo sakali. Ikan-ikan tawa nan ado iolah gurami, bauang, kaluih, lais, puyu, mujaia, samah, sapek, lelan, limang, kapiak, inggia, buan, gariang, baluik, balido, bakok, asang, basi-basi, mitar, silamang, situkah, tali-tali, talingo-talingo, tapah, jo tilan. Salain dari lauik jo sungai, ado juo ikan dari danau, takah sasau jo rinuak. Baitu banyaknyo macam ikan nan ado.
Sayang ikan ko kalah saiang jo ayam. Dek olahan ayam goreng labiah banyak, sampai dibuek jadi ayam asam manih, ayam saus Padang, yo tatingga nan olahan ikan jadi salero anak mudo. Padahal, protein nan banyak ado pado ikan. Kok baitu bana, satidaknyo ciek-ciek alah ado nan sadar baso ikan ko labiah sihaik daripado ayam.
Nan candu ikan, ado pulo nan paliang suko jo kapalo. Namonyo kapalo lauak karang. Di sapanjang lauik di Sumatera Barat ko, kapalo lauak karang ko bisa jadi idola. Alah jadi wisata kuliner dek urang lua. Harago kapalo bisa labiah maha daripado badannyo. Nan suko sampai candu, bakajaan bana makan kapalo ikan ko. Nan sero tu katiko mancucuik jo mairuik satiok bagian dari kapalo. Sampai-sampai, mato ikan bisa rabuik-marabuik. Ondeh, Mak. Lamak bana.
