Sabana bedo dunia kini. Ado pulo laki-laki manggok. Manggok malawan padusi. Baitu jadi ota lapau, mancaritoan kawan di kantua yang manggok. Baa kok manggok paja tu? Kironyo dek cemburu, karajo nan dikakok indak diapresiasi dek pimpinan, karajo urang lain nan diagiah pujian.
Baa caro manggok laki-laki tu? Kironyo co padusi pulo. Nampak urang nan dimanggokan tu lewat, inyo pai malengah. Ado urang bagunjiang, basampaian pulo carito manggoknya. Dek itu urang sabalik tahu maso laki-laki ko manggok.
Di Minang itu bana nan indak buliah. Laki-laki pamanggok. Kok manggok bana, biasonyo padusi. Indak diagiah piti, inyo manggok. Indak dibalian baju, inyo manggok. Kok laki-laki manggok, sabana digalakkan, dipakacekan dek urang rami.
Tantang baitu, daulu ado urang laki-laki yang manggok, baganyi namonyo. Inyo baganyi dek karano ado parangai bini nan indak katuju. Lah dikatoan, indak barubah pulo. Dek indak juo, pailah laki-laki ko surau di rumahnyo. Mako dek itulah, surau sabana paralu maso daulu.
Laki-laki nan baganyi ko, manggok dek ado sabab, ado tujuan. Nio maaja bini. Biasanyo bininyo sadar kalau ado kurenahnyo nan salah. Dek karano itu, banieklah maubah diri, bajanji ka kaum. Bajapuiklah laki ka surau itu. Pas manjapuik, basabuikan janji baso bini ko ka barubah. Kok lai katuju dek laki ko, baru pulang baliak ka rumah bini.
Beda daulu, beda kini. Nan kini kok ado laki-laki pangambok cando itu, sabana digalakan dek urang rami. Indak dibaok sato ka galanggang, takuik ko mangambok inyo dek ado karano ndak sasuai jo hati. Itu ka jadi sanksi. Kok ado urang, indak laki-laki, indak padusi, kok mangambok kanai tingga urang rami.
