Padang — Hampia sebagian wilayah Sumatera Barat kini lah mulai disalimuiki dek kabuik asok ulah kabakaran rimbo jo lahan di provinsi tetatangga sarato kabakaran lahan di nagari awak di Limapuluh Kota.
Di Padang misalnyo, kabuik lah mulai manyaok pancaliakan, samantaro di kawasan Bukik Solok Bio-bio Harau, Kabupaten Limopuluah Kota, Kamih (13/8/2026) tajadi lo kabakaran rimbo. Api nan manyalo di lereng bukik nan tinggi itu sempat manjadi perhatian urang banyak, sasudah rakaman video titiak api di puncak bukik viral di media sosial.
Kebakaran rimbo di Harau Limapuluh Kota
Kabakaran nan barado di tabiang bukik itu cukuik mangkawatirkan, sabab lokasinyo dakek jo pamatang rumah panduduak nan barado di bawah bukik. Dalam kondisi cuaco nan cenderuang karing, api dikawatirkan bisa manyebar kalau indak sagadang ditangani.
Kepalo Dinas Kehutanan Provinsi Sumatera Barat, Ferdinal Asmin, mambanarkan ado karandoan api di kawasan Bukik Solok Bio-bio Harau. Tim gabungan pun langsung diturunkan ka lokasi untuak mangadokan pamadaman dan mancegah api batambah laweh.
“Kini Brigade alah basamo BPBD jo Damkar Kabupaten Limopuluah Kota barado di lokasi untuak proses pamadaman,” kecek Ferdinal ketika dikonfirmasi Kamih malam.
Sampai kini, balun ado keterangan resmi barapo luas lahan nan lah tabaka maupun apo panyababnyo. Petugas masih barusaho manaklukkan api di lapangan dan mancegah kebakaran ka kawasan lain.
Kabakaran di Limopuluah Kota tu datang pulo basamaan jo kondisi udara di sabagian wilayah Sumatera Barat nan mulai kaburuik. Di Kota Padang, Kamih (13/8), langik tampak disalimuti kabuik asok nan cukuik taba, sahinggo cahayo matohari indak talalu tarang manambuih ka bumi Ranah Minang.
Udaro Padang Bakabuik
Koordinator Data dan Informasi Stasiun Meteorologi Kelas II Minangkabau, Yudha Nugraha, manyabuikkan kondisi udaro bakabuik di Kota Padang dipangaruhi dek barbagai faktor. Salah satunyo fenomena haze atau kabuik asok.
“Kekaburan udaro kini disababkan dek partikel-partikel udaro karing. Panyababnyo bisa dari pambakaran, polusi, dan sabagainyo,” kato Yudha.
Manuruiknyo, asok nan datang dari provinsi tatangga nan sadang mangalami karhutla cukuik hebat juo barpotensi mampangaruhi kondisi udaro di Sumbar. Angin nan barambuih kini datang dari arah tenggara, malewati wilayah Dharmasraya, Solok Selatan, Sijunjung sampai ka Bengkulu.
Di sampiang potensi asok kiriman, kurangnyo hujan di Sumatera Barat dalam babarapo hari balakangan juo manjadi faktor nan mampangaruhi munculnyo kabuik asok.
Yudha manarangkan, data BMKG manunjuakkan hujan di Sumbar dalam tigo hari tarakhir cenderuang sangat minim. Kondisi nan karing itu mambuek partikel-partikel karing di permukaan tanah labiah mudah tabao naiak ka atmosfer.
Partikel nan taangkek ka udara tu mambuek pandangan tampak kabua. Langik pun tampak sarupo disalimuti kabuik atau asok.
Walau pandangan agak taganggu, BMKG mancatat kualitas udaro di Sumatera Barat sacaro umum masih barado dalam kategori baik sampai sadang. Namun, masyarakat tetap diminta waspada, tarutamo kalau kondisi cuaco karing batambah lamo.
BMKG juo mamintak masyarakat mangurangi aktivitas di lua ruangan, mamakai masker kalau harus bakarajo di lua, sarato jan mambaka sampah atau lahan.
“Masyarakat diimbau mangurangi kegiatan di lua ruangan, mamakai masker kalau baraktivitas di lua, sarato indak malakukan kegiatan pambakaran sarok atau lahan, sambia tatap mampaawas perubahan kondisi cuaco nan signifikan,” kato Yudha.
Manuju Nagari Tatangga
Kondisi kabuik asok kini indak hanyo manjadi perhatian di Sumatera Barat. Karhutla nan tajadi di sabagian wilayah Sumatra juo mambuek asok barpotensi tabao angin ka daerah lain, bahkan sampai ka negara tatangga.
Kabuik asok dari kawasan nan mangalami karhutla di Indonesia dilaporkan mulai manyalimuik sabagian wilayah Malaysia. South China Morning Post malaporkan kabuik asok manyalimuik bagian selatan Sarawak, Senin (10/8).
Di Distrik Serian, angka indeks polusi udara atau API dilaporkan mancapai 182. Pemerintah Sarawak kamudian mamintak masyarakat mangurangi aktivitas di lua ruangan salamo kondisi kabuik asok masih barlangsung.
Di Johan Setia, Selangor, angka API juo dilaporkan mancapai 152 pada Senin siang. Kondisi iko manambah perhatian tarhadap kualitas udara di Malaysia.
Badan Meteorologi Malaysia sabalunnyo mamparingatkan kemungkinan cuaco paneh jo curah hujan nan randah sampai Jumat (14/8). Kondisi itu dipakirokan bisa mampaparah kabuik asok di wilayah nan tatekan.
Angin dari arah selatan dan banyaknyo titiak paneh di kawasan sakitar perbatasan juo barpotensi mambuek asok malewati batas negara dan mangurangi jarak pandang, tarutamo di bagian selatan Sarawak.
Indak Sadonyo dari Indonesia
Pamarintah Indonesia manarangkan bahwaso kabuik asok nan tajadi di Sarawak indak dapek dikatokan sadonyo barasa dari wilayah Indonesia.
Kapalo Badan Nasional Penanggulangan Bencana (BNPB) Suharyanto manyabuik, ado pulo titiak paneh atau hotspot di wilayah Sarawak. Keterangan itu badasarkan data sebaran titiak paneh dari sumber FIRMS NASA tanggal 10 Agustus 2026.
“Titiak hotspot juo ado di wilayah Sarawak Malaysia sahinggo kabuik asok nan ado di sinan indak sadonyo dari Indonesia,” kecek Suharyanto, seperti dilaporkan Kompas.com, Rabu (12/8/2026).
Namun, Suharyanto mangakui ado babarapo titiak paneh nan tasabuik di sepanjang kawasan perbatasan Indonesia jo Malaysia. Kondisi itu mambuek kemungkinan asok dari kebakaran rimbo malewati batas wilayah tetap ado.
“Memang titiak sebaran hotspot ado babarapo titiak di sepanjang perbatasan Indonesia jo Malaysia, sahinggo indak manutup kemungkinan ado pargerakan asok kabakaran manyebar masuak ka wilayah Sarawak Malaysia,” keceknya.
Sumbar Patuik Labiah Waspada
Karhutla manjadi ancaman nan acok datang baliak di kawasan Asia Tenggara, khususnyo pado musim nan karing. Asok dari kabakaran indak sajo mambuek udaro indak nyaman, tetapi juo dapek mangganggu jarak pandang dan kesehatan masyarakat kalau konsentrasinyo tinggi.
Bagi Sumatera Barat, kabakaran di Bukik Solok Bio-bio Harau nan basamaan jo munculnyo kabuik asok di Kota Padang patuik manjadi tando untuak labiah maningkatkan kewaspadaan.
Pamarintah daerah, petugas pemadam, BPBD, Dinas Kehutanan, sarato masyarakat paralu basamo-samo mancegah api supayo indak maluas. Pemantauan titiak paneh, arah angin, curah hujan, kualitas udara, jo perkembangan karhutla di Sumbar maupun provinsi tatangga paralu taruih dilakuan.
Masyarakat juo diminta indak mambaka sarok atau lahan sacaro tabuka, tarutamo dalam kondisi cuaco nan kariang. Kalau manamui titiak api nan barpotensi maluas, masyarakat diimbau sugironyo malaporkan ka petugas supayo dapek ditangani sabalun manjadi kabakaran nan labiah gadang.
Kabuik asok nan kini mulai manampakkan diri di Ranah Minang mambari isyarat bahwaso ancaman karhutla indak bisa dipandang sabalah mato. Panyababnyo bisa datang dari kondisi alam, kabakaran di daerah tatangga, maupun titiak api di dalam wilayah Sumatera Barat surang. Karano itu, mancegah api sabalun mambangkak gadang jauah labiah elok daripada mananggulanginyo sasudah nyo manyalo gadang. (Tan Parpatiah)
