Pas mancaliak kacimuih di meja urang nan manjua pabukoan, langsuang se kami mambali untuk ka dimakan babuko. Kacimuih nan dibuek dari singkong nan diparuik, tuh dikukuih, diagiah karambia, lamak rasonyo. Mungkin dek jarang-jarang sobok, pas sakali sobok indak nio kami lewatkan.
Dek karano puaso, tapek bana dek kami maagiah tahu anak bonsu kami jo makanan tradisional Minangkabau. Anak bonsu kami suko bana makanan tradisional Minangkabau. Asa diagiah, lai ndak mamantang inyo untuak mancubo. Kalau lamak di lidahnyo, namuah inyo ulang makan sasudahnyo.
Di bulan puaso ko, wakatu paliang pas untuak kami maajak anak bonsu mancubo banyak makanan tradisional Minangkabau. Alang hari makanan ko indak ado. Bacari bana mako ka dapek.
Dek banyak urang manggaleh, kami ajak anak bonsu kami mancari pabukoan. Sore-sore kami kaliliang jo onda, sudah tu baranti di tampek nan katuju, turun maajak anak-anak balanjo sambia manunjuakkan ma makanan tradisional Minangkabau.
Kok nan digoreng-goreng, inyo alah tahu nan lamak-lamak takah paragede jaguang jo salalauak. Kok pulang ka kampuang ayahnyo, ka Padangpanjang, nan paragede jaguang ko indak lupo. Dimakan angek-angek, lamak bana.
Kok salalauak, jan ditanyo. Di muko rumah kami tiok hari lewat salalauak nan dijojo jo oto. Kok taragak, alah sakantoang asoi babali, dimakan samo-samo jo ayah jo udanyo. Pas puaso ko, salalauak ko lai juo taragak dek si bonsu. Tiok bali sate padeh khas Piaman, babalilah salalauak jo paragede ko.
Pas baputa-puta di Pasa Pabukoan ko, nampaklah dek kami kue mangkuak jo talam. Nan si bonsu dek sanang jo nan baru-baru, bajalehan kalau kue talam ko lamak rasonyo. Lai maangguak-angguak nyo dek nio. Sakalian babalian pulo kue mangkuak. Nan kue mangkuak lai habih dek si bonsu karano ado karambia di atehnyo. Nan kue talam, saketek se dimakannyo dek karano alun tabiaso.
Di hari lain, kami ganti salero. Babalian onde-onde, lupih, surabi, lapek, jo katupek puluik. Ciek-ciek lai dicubonyo, ditanyo dari apo bahannyo. Nan alun dicubo dek si bonsu kami iolah godok pakai saka atau godok batinta. Lah ndak ado urang manjua di dakek rumah.
Sabalun-sabalun ko, katiko kami pai ka Padangpanjang, kami alah maagiah pulo bika jo pinyaram. Makanan nan duo ko lamak dek si bonsu kami. Kue putu baitu pulo. Ado kini kue putu nan dibuek sarupo kue bolu. Sabana candu inyo mancubo. Satiok dibali, indak baranti-baranti inyo mangulek. Kok kami pa ka Batusangka, babaokan lamang tapai. Nan lamang tapai ko lain pulo candunyo. Suko pulo anak bonsu kami ko.
Kok minuman takah cindua, es tebak, es teler, kalikih santan, jo es buah, indak usah ditanyo. Sadoala minuman nan dibuek dek urang di pasa pabukoan, pasti dibalinyo dan harus ado satiok babuko, tamasuak aia tabu jo aia niro. Baitu bana anak bonsu kami nan baru baumua anam tahun ko suko jo makanan tradisional Minangkabau. Sabana beda jo anak kami nan gadang.
Mungkin dek karano samaso hamil, induaknyo beda salero pulo. Wakatu nan gadang dalam kanduangan, pantang-bapantang ka makanan ko amaik banyak. Wakatu si bonsu dalam kanduangan, durian basungkahan juo, indak hamil tigo bulan, indak hamil salapan bulan. Indak bapatangan samo sakali. Dek itulah kami acok maagiah tahu ka adiak jo kawan nan sadang manganduang, bapasanan bana, jan ditahan salero bia anak-anak suko jo makanan apo sajo, tarutamo makanan tradisional Minangkabau.
