Dahulunyo di Jorong Pauah, Nagari Padang Magek, Kecamatan Rambatan, Batusangkar, hiduiklah saurang jando nan salalu mambantiang tulang di sawah urang untuak mambiayai hiduiknyo sahari-hari. Jando tu mampunyoi saurang anak padusi nan barumua 7 tahun.
Anaknyo tu sangek gadih, tapi parangainyo indak sagadih mukonyo karano anak tu mampunyoi sifaik nan samo jo anak laki laki. Karajonyo hanyo manyusahan mandehnyo jo indak pernah mangarati batapo payahnyo saurang mandeh paruah baya nan harus bakarajo. Mandehnyo mangharokan tigo liter bareh sahari nan kadang-kadang bareh tu dijua untuak manuruti kandak anaknyo supayo anaknyo sanang dan indak basadiah hati, nan sadangkan anak tu indak namuah manolong mandehnyo bakarajo.
Suatu hari jando tu mambaok anaknyo untuak pai mangawaninyo ka sawah nan lumayan jauah dari rumahnyo untuak mananam padi dan untuak mancaliakan batapo gadang perjuangan mandehnyo untuak manghidupinyo saurang diri .
“Nak, apo kau nio pai samo mandeh ka sawah? Untuak mangawani mandeh karano kawan nan biaso mandeh baok sadang sakik dan kini mandeh bakarajo surang diri.”
“Hmmmm, lai, tapi Mandeh harus mambaok makanan nan bisa awak makan beko. Tu awak nak iyo lo tampek nan taduah untuak awak duduak beko karano awak indak nio bapaneh.”
Sasudah mandanga kecek anaknyo, tampaklah galak ketek nan tapasang di muko nan alah karipuik, dan indak bapikia panjang lansuanglah jando tu pai ka lapau dakek rumahnyo untuak mambali kandak anaknyo nan jo hati sanang bacampua cameh karano jando tu akan mancubo mangutangkan macam-macam makanan. Indak sampai 10 minik jando tu baliak ka rumah jo sabuah plastik hitam di tangannyo nan barisi bekal untuak anak kasayanganyo. Indak lamo sudah tu, mereka pun barangkek ka sawah dan di pajalanan basuo jo masyarakaik nan salalu batanyo jo pertanyaan nan mambosankan.
“Apo kau yakin ka mambaok anak kau nan banyak parangai tu ka sawah?” jando tu hanyo bisa galak dan bakato.
“Iyo awak yakin karano inyo tu anak kasayangan awak. Jikok indak awak baok, tu samo sia inyo ka awak tinggaan?”
Indak lamo sudah tu jando tu kambali basuo jo masyarakat nan kamudian manyapo jo batanyo.
“Oi, kau pai batanam ka sawah nan lumayan jauah dari rumah kau, kok anak kau tu batingkah dan mintak pulang baa?”
“Iyo, yo, ambo lai tau kalau sawah tu jauah dari rumah, tapi awak yakin kalau anak wak ko indak ka mintak pulang karano awak alah mambaokan makanan nan bisa dimakannyo katiko awak karajo beko” sambia senyum dan jo langkah nan elok-elok malintesi pamatang sawah nan balumpua karano hujan tadi malam.
Di pajalanan, jando tu taringek jo sado kecek urang tadi dan bapikia sagitu madanyo anak padusi kasayangannyo tu. Sasudah lamo bajalan, akhianyo mereka pun sampai di sawah nan ka ditanami padi. Sabalum masuak ka sawah, jando tu baristirahat sabanta untuak manghilangan panek karano cukuik jauah bajalan. Karano alah maliek matohari alah baranjak naiak, jando tu bagageh untuak masuak ka dalam sawah dan sabalum masuak jando tu mamintak anaknyo untuak duduak di sabuah batu nan lumayan gadang di dakek sabuah sungai nan aianyo sangek jadiah.
“Nak, kau bisa duduak di siko beko katiko mandeh bakarajo. Di siko indak bapaneh dan kau bisa makan makanan ko.”
“Yo, lai tau awaknyo,” jawek anak tu indak sopan.
Sasudah mandanga jawek anaknyo, jando tu langsuang masuak ka sawah dan mulai bakarajo saketek demi saketek. Alhamdulilah katiko batanam, anaknyo indak batingkah karano sadang asik mancaliak mandehnyo batanan sambia makan makanan nan dibali mandehnyo tadi. Tapi itu indak balangsuang lamo karano sasudah babarapo jam, inyo mulai bosan dan maminta mandehnyo untuak kalua dari sawah untuak mangipesinyo karano inyo kapanasan.
“Mandeh, kamarilah kalualah dari sawah tu lai, tolong
kipehan awak ciek soalnyo awak angek! Apo mandeh indak mancaliak awak sampai bakaringek takah ko?”
Karano jando tu indak nio mancaliak anaknyo sampai manangih karano indak dituruti kandaknyo, jando tu langsuang kalua dari sawah dan mangipesi anaknyo sambia bakato.
“Nak, beko alah siap mandeh kipehan duduak manih jo di siko, jan batingkah lo liak ndak?”
“Yo! Capek jolah awaklah angek bana a.”
Sasudah mangipehi anaknyo, jando tu langsuang baliak masuak ka sawah untuak malanjuikan karajonyo. Sasudah babarapo lamo, anak tu mulai batingkah baliak karano aia minum nan dibaoknyo tadi alah habis dan maminta mandehnyo untuak mancarian aia minum.
“Mandeh, baa caro lai ko, aia minum nan babaok tadi alah habis. Mandeh harus mancarian aia minum untuak awak karano awak masih hauih.”
“Yo, Nak, sabanta lai mandeh harus manyalasaian sawah ko karano saketek lai salasai. Sasudah tu mandeh kalua mancarian minum,” kecek jando tu mananangan anaknyo, tapi anaknyo tu indak namuah mangarati apo nan dikecekan mandehnyo. Inyo tetap nio dicarian aia.
“Awak indak paduli, pokoknyo mandeh harus mancarian awak minum kini ko!” kecek anak tu jo suaro kareh.
Karano indak nio anaknyo sampai manangih, tapasolah jando tu kalua dari sawah dan mangecekan kalau di mukonyo tu ada sungai nan aianyo sangek janiah.
“Caliaklah di muko kau tu, kan ado sungai dan aianyo janiah dan barasiah. Kau bisa maminumnyo karano masyarakaik di siko manggunoannyo lo untuak minum.”
“Awak indak nio minum aia sungai tu karano aia tu alun dimasak lai, apo mandeh nio awak sakik paruik?” anak tu manjawek kecek mandehnyo jo suaro kareh dan tapasolah jando tu pai mamintaan aia minum ka sabuah rumah nan
lumayan dakek dari sawah tampeknyo bakarajo kini.
“Yo lah, ma boto aia kau tu. Mandeh ka mancubo mamintaan aia ka rumah tu (sambia manunjuak sabuah rumah). Tapi kau jan pai kama-kama, duduak se di siko,” kato jando tu ka anaknyo.
“Mandeh harus capek kalau paralu balari karano awak alah hauih bana,” kecek anak tu, langsuang sajo jando tu pai ka rumah yang ditunjuaknyo tadi dan mamintak aia ka urang rumah.
“Assalamualaikum, ado urang di rumah?” Jando tu maimbau urang punyo rumah dan akhianyo kalualah saurang padusi dari rumah tu.
“Waalaikum salam, yo ado apo?” kato urang punyo rumah.
“Buliah awak mintak aia minum saboto ko karano anak awak sadang auih di sawah tampek awak batanam kini.”
“Lai, ma botonyo?” urang punyo rumah mamintak boto aia dan maambiakkan aia untuak jando tu. Sasudah salasai maambiaknyo, inyo maagiahan boto barisi aia minum tu ka jando yang sadang tagak di muko rumahnyo.
“Ko aia minumnyo” urang punyo rumah manyodoran boto aia.
“Yo. Tarimo kasih aia minumnyo,” kato jando tu kapado urang punyo rumah, lalu balari manuju anaknyo nan sadang manunggu aia minum. Dek sabab lumayan lamo anak mada tu mulai maimbau-imbau mandehnyo jo suaro kareh.
“Mandeh, mandeh, capeklah apo mandeh indak tau kalau awaklah hauih bana.”
“Yo, Nak, ko minumnyo. Maafkan mandeh karano mandeh harus maimbau urang punyo rumah itu talabiah dahulu,” kecek jando tu ka anaknyo sambia maelo nafas karano talalu latiah balari. Jando tu batanyo kapado anaknyo, apo ado nan harus dilakukan dek mandehnyo sabalun mandeh masuak ka sawah.
“Nak, apo ado nan harus mandeh karajoan sabalun mandeh masuak ka sawah?”
“Mungkin untuak kini ko alun ado lai. Mandeh bisa baliak liak ka sawah,” kecek anaknyo dan langsuanglah jando tu kambali masuak ka sawah untuak malanjuikan karajonyo.
Lah babarapo lamo karajo, paruik jando tu mulai litak, jadi jando tu kalua dari sawah dan katiko kalua anaknyo batanyo.
“Baa kok kalua mandeh? Kan awak indak ado mamintak mandeh untuak kalua.”
“Yo, memang kau indak ado manyuruah mandeh kalua, mandeh kalua karano mandeh litak, apo kau indak litak?” tanyo jando kapado anaknyo.
“Awak alun litak lai, beko jo lah awak makan.”
Mandanga jawek anaknyo takah itu, jando tu langsuang maambiak makanan nan ado di dalam tas dan langsuang makan. Sasudah makan, jando tu istirahat sabanta untuak manunggu waktu Dzuhur masuak sambia basanda ka sabuah batang di tapi sawah.
Sasudah masuak, jando tu mambaok anaknyo untuak maambiak wuduakdi sungai tadakek, tapi sang anak jo suaro lantang manolak mandehnyo. Jo muko kecewa, jando tu langsuang maambiak wuduakjo bagageh solat. Takah layaknyo urang lain, sasudah sholat, jando tu badoa.
“Ya Allah, ya Tuhanku, agiahlah kasabaran untuak awak maadoi sifaik anak awak dan bukakkanlah hati jo pikirannyo supayo inyo bisa maharagoi awak sabagai urang tuo tunggalnyo dan samoga inyo bisa baliak ka jalan yang elok jo nio sumbayang takah nan awak mintak. Inyo namuah manolong awak dalam mancari sasuok nasi nan bisa kami makan sahari hari. Aamiiin.”
Salasai sholat, jando tu langsuang masuak baliak ka dalam sawah untuak malanjuikan karajonyo. Katiko jando tu malanjuikan karajonyo, inyo salalu mamanuang dan indak
konsentrasi karano mamikiaan sifaik anaknyo nan indak pernah barubah saketek pun. Dilamunannyo, jando tu takajuik dek pakaian anaknyo nan takajuk dek saikua kadal nan lalu di mukonyo.
“Astagfirullah, dek apo, Nak? Baa kok mamakiak takah tu sampai takajuik mandeh deknyo.”
“Baa indak ka takajuik wak, apo mandeh indak mancaliak ada saikua kadal nan lalu di muko wak?” jawek anaknyo jo suaro kareh.
Sasudah tu, jando tu langsuang malanjuikan karajonyo. Indak lamo sudah tu, jando tu takajuik baliak dek anaknyo maimbau jo suaro kareh. Inyo nio makan dan mamintak mandehnyo untuak maambiakan tas nan barisi nasi tu nan sadang tagantuang di sabuah batang.
“Mandeh, awak nio makan. Jadi, mandeh harus maambiakan nasi dalam tas tu.”
“Kok kau surang jo nan baambiak surang baa?” tanyo jando tu ka anaknyo.
“Ee, indak do! Karano awak indak nio baranjak dari batu ko dan karano awak maleh. Mandeh jo lah nan maambiak,” kato anaknyo jo manjo.
Sasudah mandanga jawek anaknyo, jadi tapasolah jando tu kalua dan maambiakan tas nan tagantuang di sabuah batang. Katiko jando tu maambiak nasi, inyo lupo maambiak minumnyo karano inyo sadang taburu-buru harus malanjuikan karajonyo. Sasudah itu, inyo langsuang maagiahan ka anaknyo.
“Ko, Nak, nasinyo,” kato jando tu.
“Yo, latakan sajo di situ dulu,” kecek anaknyo cuek karano inyo sadang mambalakangi mandehnyo. Katiko inyo babaliak badan, inyo hanyo mancaliak sabungkuih nasi sajo dan karano inyo sadar kalau aia minumnyo indak ado, anak tu langsuang maimbau mandehnyo nan lah mulai bajalan manuju sawah.
“Mandeh, Mandeh, hanyo maambiak nasi sajo. Aia minumnyo ma? Apo mandeh pikia kalau awak indak ka minum salasai makan beko?”
“O, yo, maafkan mandeh, mandeh lupo. Kalau kau sajo nan maambiaknyo baa? Mandeh harus malanjuikan karajo mandeh karano masih banyak lai padi nan harus mandeh tanam. Jikok indak salasai, mandeh kanai berang dek urang punyo sawah.”
“Ee, mati se lah, panek wak mah, capek jo lah ambiakan aia tu kini ko karano awak ka makan.”
“Jadi, Nak, mandeh ambiakan, tapi kau jan maimbau- imbau mandeh lai karano mandeh harus malanjuikan karajo,” jawek jando tu.
“Yo, insya Allah, kalau indak ado nan awak inginkan!”
Sasudah mandanga jawek anaknyo, jando tu langsuang maambiakan aia dan langsuang maagiahan kapado anaknyo. Sasudah tu, inyo langsuang babaliak badan dan langsuang manuju sawah untuak malanjuikan karajonyo.
Sasudah itu, anak tu mulai maimbau jando tu karano paruiknyo sakik tiok makan dan mamintak jando tu untuak mangawaninyo pai ka jamban dakek, sabuak tabek, nan lumayan jauah dari sawah.
“Mandeh. Paruik ambo sakik, aak nio buang aia. Jadi, mandeh harus mangawani awak pai ka jamban.”
“Apo kau indak mancaliak kalau mandeh sadang karajo. Kau jo lah pai ka situ surang dek sabab karajo mandeh masih banyak.”
“Mandeh, pokoknyo Mandeh harus mangawanan awak ka situ karano awak takuik ka situ surang. Capeklah, Mandeh, tinggaan jo itu dulu dan kawanan awak sabanta kini ko. Awak lah indak tahan nak buang aia,” kato anak tu maminta mandehnyo capek kalua dari sawah.
Jo raso barek hati, jando tu kalua dari sawah dan mangawanannyo pai ka jambantu. Di pajalanan, jando tu batanyo ka anaknyo.
“Nak, baa kau taruih manyusahan bundo takah ko? Apo kau indak bapikia bara latiah mandeh nan harus mambungkuak mananam padi?”
“Alah mah, Mandeh, jan batanyo jo lai, capek jo lah ambo lah indak tahan bana lai. Mandeh harus bajalan labiah capek bana.”
“Yo, Nak, jikok kau lah indak tahan bana, lai kau bisa balari ka situ dulu. Beko mandeh turuik karano pungguang mandeh sadang sakik dek acok bana mambungkuak.”
“Yo, lah, tapi Mandeh janji kalau ka manuruik wak beko ka situ,” jaweknyo.
“Mandeh janji, Nak,” jawek jando tu mayakinkan anaknyo.
Sasudah mandanga jawek mandehnyo, langsuang sajolah inyo lari manuju jamban. Sekitar 8 minik di dalam jamban, akhianyo kalualah anak tu dan katiko lah kalua, anak tu indak mancaliak mandehnyo di tampek tu. Malah maliek mandehnyo sadang duduak bataduah sambia mauruik-uruik pinggangnyo yang sadang sakik di sabuah batang nan indak jauah dari jamban. Lansuanglah anak tu manyusul mandehnyo jo raso kesaldan bakato.
“Kecek mandeh, Mandeh ka manuruik awak ka jambantu, tapi apo kenyataannyo. Mandeh malah lamak-lamak duduak bataduah di siko.”
“Yo, Nak, maafkan Mandeh yo karano pinggang mandeh sadang sakik bana.”
“Maaf, maaf, hanyo itulah nan bisa mandeh kecekan ka awak,” jawek anak tu jo suaro kareh sambia bajalan maninggaan mandehnyo.
Dek mancaliak anaknyo pai duluan maninggaannyo, jadi jado tu langsuang bangkik dari duduaknyo dan lansuang mangikuti anaknyo tu dari balakang sambia bakato.
“Nak, jalannyo jan capek bana, tambah sakik pinggang mandeh beko.”
“Alah, jan sok manjo Mandeh lai, capek jo lah. Apo kulik karipuik Mandeh tu indak marasoan angeknyo pancaran sinar matoari?” jawek anak tu indak mampadulian mandehnyo nan sadang bajalan di balakangnyo.
Sasudah cukuik lamo bajalan, akhianyo sampailah mereka di sawah tampek jando tu karajo tadi. Karano talalu latiah dan pinggangnyo talalu sakik, jando tu maminta anaknyo untuak mauruikan pinggangnyo.
“Nak, tolong uruikan pinggang Mandeh sabalun Mandeh malanjuikan karajo.”
“Apo? Mandeh manyuruah awak mauruikan pinggang Mandeh nan panuah dek paluah tu? Oh, indaklah yo, beko tangan wak jadi baun dek karingek mandeh. Daripado Mandeh duduak istirahat takah iko sambia mamintak awak untuak mauruikan mandeh, labiah baiak Mandeh masuak baliak ka sawah supayo awak bisa capek pulang,” jaweknyo sombong sambia bajalan manuju batu tampeknyo duduak tadi.
Dek mandanga kecek anaknyo, langsuang sajolah jando tu bangkik dari tampek duduak dan lansuang masuak ka dalam sawah dan malanjuikan karajonyo.
Sasudah satu jam bakarajo, akhianyo sawah tu alah mulai siap. Karano hanyo tingga kiro-kiro satampang baniah lai, tapi anaknyo mulai maimbau imbau jando tu untuak kalua dari sawah dan manyuruah jando tu untuak maninggakan sawah nan alun salasai tu. Anaknyo nio pulang karano hari alah mulai patang.
“Mandeh, apo mandeh indak maliek kalau matoari ka tabanam lai, tapi mandeh masih sajo batahan di dalam sawah/ Labiah baiak pulang sajo dan tinggaan sajo sawah tu bisuak jo taruihan.”
“Sabanta lai, Nak, karano masih tingga satampang baniah lai.”
Tapi, anaknyo indak mangarati, “Wak indak nio tau pokoknyo awak harus pulang kini ko. Soalnyo wak lah indak betah di siko lai karano di siko banyak nyamuak nan mangigik.”
“Ya Allah, ya Tuhanku, lah lamo Mandeh basaba jo sikap kau nan indak namuah paduli itu, tapi kini ko mandeh alah indak tahan lai. Jikok kau masih batingkah takah ko, izin Tuhan dilulua batulah kau.”
Terlontarlah kato-kato tu dari muluik jando tu tanpa disangajonyo ka anaknyo. Atas kato-katonyo tu, perlahan lahan anak jando tu mulai dilulua batu. Karano mulai sadar kalau inyo dilulua batu, jadi anak tu maimbau-imbau mandehnyo sambia manangih.
“Mandeh, capeklah, alah sapinggang.”
Dek jando tu indak mangarati apo yang dimaksud anaknyo, karano jando tu sadang mambalakangi anaknyo tu, jando tu hanyo manjawek.
“Yo. Nak, saketek lai.” “Mandeh alah sabahu.”
“Yo, Nak, ko mandeh alah salasai,” jawek jando tu mayakinkan anaknyo kamudian jando tu mambaliak badan. Inyo indak mancaliak anaknyo lai dan hanyo mancalaiak rambuiknyo nan manempel di batu tampeknyo duduak tadi. Jando tu baru sadar kalau anak kesayangannyo alah dilulua batu dek karano sikapnyo surang.
Oleh karano kajadian anak dilulua batu sambia manangih itulah, masyarakaik Pauh, Padang Magek, Kecamatan Rambatan, Batusangkar, picayo bahwa kisah ko bana-bana pernah tajadi babarapo tahun nan lalu. Karano itu juolah, sungai dan sabagian tampek di Jorong Pauh itu dinamokan “Sungai Batu Manangih.”
Demikianlah carito legenda dari “Sungai batu Manangih” ko. Sampai saat kini, alhamdulillah batunyo masih tagak kokoh, tapi sayangnyo sungai tu alah direnovasi dek masyarakaik sekitar jo pemerintah daerah.
Kok ado jarum nan patah Usah disimpan di dalam peti
Kok ado kato–kato nan salah Usah disimpan di dalam hati
Dek karano bana urang awak banakan
Kaba urang awak kabakan
