Urang Minang indak suko disabuik-sabuik manjadi urang nan indak elok. Indak suko disabuik bingik, pilik, atau ongeh. Tapi kok basobok jo urang nan takah itu, inyo punyo sipaik itu, musuah pantang dicari, kok sobok diadoki. Caronyo, bapakai lah kato kieh, bapatah-patitiah untuak manyampaian mukasuik hati. Baitu bana urang Minang manjago hati indak manyingguang urang nan dituju.
Untuk nan ciek ko, rancak awak baraja ka Gen Z nan kini mamiliah manjadi kreator konten untuak petatah-petitih Minang. Dek disabuk Gen Z, bisa bana inyo mambuek petatah-petitih Minang nan rumik manjadi hiburan sambia baraja. Nyo manyabuik dirinyo Tuan Mudo. Akunnyo banamo @bumiardhy. Inyo baraja patatah-patitih, lalu kudian nyo jadian konten untuk maingek-ingekan urang rami.
Ka awak basamo, inyo tunjuakan baso urang Minang indak bataruih tarang tantang apo juo. Misal, untuak manjalehan baso inyo indak bingik, inyo pakai petatah-petitih:
Asok randang lah manyalo di rumah urang
Nan urang dapek batangan panuah
Nan awak mancaliak jo mato basah
Apo ndak patuik ambo dipandang urang
Makan samo dikunyah kok kanyang samo diraso
Nan ado samo dimakan, nan indak ado samo dicari
Rasaki nan diagiah Tuhan usahlah habis di laman surang
Baitu pulo kalau ado urang nan pilik, bausaho inyo manyampaian baso bukannyo pilik, tapi bapakai pepatah-petitih:
Imaik-imaik sabalun abih
Kana-kana sabalun indak
Jan harok jo nan lain
Sakali aia gadang tapian langsuang barubah
Tahu ukua nan jo jangko
Tahu jo dahan nan ka maimpok
Nyampang kini kok ado
Kana pulo tuak ari isuak
Tapi diukua pulo, lai sabana imaik urang tu atau batua-batua pilik. Urang pilik ko ado. Urang tu indak nio baragiah ka urang banyak, lapeh tangguang jawek ka urang banyak, padohal baragia indak banyak, mambari indak kurang, tapi mangaluaan piti sangenek untuak manyumbang indak nio.
Baitu pulo nio manyabuik urang ongeh nan indak ka dietong dek urang rami. Bisa manjadi kabancian urang sakampung, basabuik jo petatah-petitih:
Usahlah karajo mahariak tanah
Ka mudiak basirah mato
Ka ilia basengseng langan
Karajo manapuak dado
Mantang-mantang bapisau tajam
Sagalo ka dirauik
Mantang-mantang batangan kuek
Sagalo ka diharu
Caliak-caliak pulo lah tampek ka jatuah
Katiko tampuak indak bagatah lai
Nan daun indak bamiang
Bulu rogek kuku bakarek
Di sinan hutang mangko babaleh
Baitu urang Minang manyambunyian mukasuik hatinyo. Bahkan, katiko nio bautang ka urang lain, urang Minang malu manyampaian langsuang, bapakai pulo petatah-petitih:
Sapanjang nan tasabuik tadi
Bacando aia di dalam talago
Jikok alun panuah alun dapek mailia ka banda
Iyo agak tatahan inyo sabanta
Usahlah takuik nan di bawah indak ka baraia
Nyampang hujan turun talago panuah
Aia langsuang mailia
Kok ditanyo, apa mukasuiknyo? Dijawek, ambo nio bautang.
Rasonyo konten nan dibuek dek Tuan Mudo sabana baguno dek urang banyak, apolai anak mudo Gen Z nan indak tahu jo petatah-petitih Minang nan ado. Dek Tuan Mudo ko baraja dari mamak di kampuangnyo, dari Facebook, jo bagabuang jo grup nan baisi urang-urang tuo nan pandai petatah jo petitih, sampai juo ka awak, nan ma bana nan disabuik bingik, pilik, ongeh di Minang ko. Tahu pulo awak apo petatah-petitih untuak manyampaian hati nan ka bautang.
