Padang – Badan Nasional Pananggulangan Bencana (BNPB) mulai manyarahkan kunci Rumah Hunian Tatap (Huntap) Mandiri kapado warga nan manjadi korban bencana hidrometeorologi Siklon Senyar di Sumatera Barat. Rumah nan alah siap dibangun ko handaknyo indak ciek juo nan dibiakan kosong, tapi langsuang dihuni dek pamiliknyo untuak mamulai iduik baru nan labiah aman.
Kunci rumah baru tu disarahkan sacaro simbolis dek Sekretaris Utama BNPB, Rustian, di tigo daerah, yakni Kota Padang, Kota Pariaman, jo Kota Padang Panjang, hari Jumaik patang ko (10/7/2026). Acara tu disaksian dek Kalaksa BPBD Sumbar, pimpinan daerah, jajaran BNPB jo BPBD, sarato masyarakat satampat.
Rumah contoh nan disarahkan ko salasai dibangun dalam wakatu duo bulan sajak batu patamo diletakkan. Pambangunan nan capek ko manjadi bukti kasungguhan pamarantah dalam mamuliahkan kaidupan masyarakat pascabencana.
Huntap mandiri ko dibangun mamakai Sepablock(Semen Padang Bata Interlock), inovasi PT Semen Padang nan punyi sistem saling mangunci, sahinggo pambangunannyo labiah capek, kokoh, ramah lingkuangan, jo tahan taradok gampo.
Satiok unit rumah batipe 36, dilangkoki jo duo biliak tidua, ruang tamu, jo dapua. Rumah-rumah ko disadiokan untuak mangganti tampek tingga warga nan rusak dek amukan galodo tahun nan lapeh.
Dalam sambutannyo, Rustian manegaskan bahaso tujuan pambangunan huntap indak lah sampai di prosesi manyarahkan kunci sajo. Nan labiah penting, rumah nan alah siap tu musti langsuang dihuni dek nan punyo hak.
“Jan sampai rumah huntap nan alah dibangun ko dibiakan kosong. Rumah ko alah layak dihuni, bahannyo aman, tahan hujan, jo dirancang tahan gampo. Mangko manfaatkanlah rumah ko sabagai tampek tingga baru,” kecek Rustian.
Katonyo lai, sanyampang rumah nan alah dibangun ko indak dihuni, tantu tujuan pamarantah dalam mamuliahkan kaidupan korban bencana jadi indak tacapai.
Salapeh rumah contoh ko salasai, BNPB ka malanjuikkan pambangunan huntap mandiri untuak seluruh warga korban nan datonyo alah diverifikasi. Langkah ko marupokan bagian dari program rehabilitasi jo rekonstruksi pascabencana hidrometeorologi Siklon Senyar nan manyapu Aceh, Sumatera Utara, jo Sumatera Barat pado akhir November taun lalu.
BNPB baharok, jo rumah baru ko masyarakat indak sajo punyo tampek bataduah nan labiah elok, tapi juo bisa mamulai baliak kahidupan, maiduikkan perekonomian keluarga, jo manyusun harapan baru di ateh pondasi nan kokoh. Sabab rumah nan alah dibangun jo biaya negara ko, manfaatnyo baru taraso kalau bana-bana dihuni dek nan barhak, indak dibiakan kosong tanpa panghuni. (Tan Parpatiah)
