Di Pasisia Salatan, ado sabuah tarian nan kini lah dikenal luas sabagai salah satu pusako budaya urang Minang, yaitu Tari Benten. Tarian ko sabananyo bukanlah lahia jo sendirinyo, malainkan tumbuah jo bakambang dari Tari Rantak Kudo, iko kasenian tuo nan dahulunyo hiduik di tangah-tangah masyarakat, namun kini hampia indak dapek lai ditamui dalam bantuak aslinyo.
Pimpinan Sanggar Puti Gubalo Intan, Junaidi Chan mellui Pusat Kebudayaan Minangkabau menyampaikan Tari Rantak Kudo indak lai dikambangkan dek karano lah sulik mancari bantuak nan asli. Sabagai jalan untuak manjago warisan budaya, para palaku seni lalu mangambangkan Tari Benten, supayo nilai-nilai budaya nan dikanduangnyo indak hilang lanyok dek zaman.
Usaho itu alah mamabuahkan hasil. Tahun 2019, Tari Benten resmi ditatapkan sabagai Warisan Budaya Tak Benda (WBTB) Indonesia dek Kamenterian Pendidikan jo Kabudayaan. Tarian ko manjadi salah satu dari 52 warisan budaya nan diusulkan dari 16 kabupaten jo kota di Sumatera Barat.
Walaupun tasabuik sabagai bagai dari kesenian Pasisia Selatan, tapi pado hakikaiknyo tari ko asa muasa nyo adolah dari Rawang Rawang, Kabupaten Kerinci, Provinsi Jambi. Maklumlah saisuak Kerinci ko masih manjdi bagian dari Sumatera Barat dalam Kabupaten Pesisir Selatan Kerinci.
Penampilan tari Benten suatu hari di Nagari Salido
Baa kok disabuik tari Rantak Kudo? Iko dek gerakan kaki panarinyo nan mahantak-hantak tanah, sarupo jo bunyi ladam kudo nan mahantak ka bumi. Bunyi rantaknyo bisa tadanga, bahkan getaran tanahnyo taso dari jauah dari tampek urang manari tu.
Di Ranah Kerinci, Tari Rantak Kudo bukan sajo hiburan, tapi juo punyo makna nan sakral. Inti pamentasannyo adolah lagu-lagu dialogis nan barisi doa ka Allah Subhanahu wa Ta’ala. Syair doa tu disabuik asuah, sadangkan urang nan manyanyikannyo dinamokan pangasuah, nan banyak barasa dari Tanjuang Rawang di aliran Batang Merao nan bamuaro ka Danau Kerinci.
Karano nilai kasakralannyo tinggi, Tari Rantak Kudo salalu dihormati dek masyarakat. Tarian ko biaso dipatunjukkan pado alek adat, terutama sabagai ungkapan syukur sasudah musim panen padi. Tradisi nan samo juo tumbuah di wilayah Indopuro, Kabupaten Pasisia Salatan.
Budaya Islam di Indopuro
Masuaknyo Tari Rantak Kudo ka Indopuro indak dapek dipisahkan jo sajarah nagari itu sabagai salah satu pusat karajaan Islam di pasisia barat Sumatera.
Indopuro dahulunyo dikenal sabagai kasultanan nan manjalanan fungsi Rajo Ibadat, salain ado Basa Ampek Balai sabagai Rajo Adat jo Lunang sabagai Rajo Batin atau Rajo Alam. Di Muaro Sakai pulo, Palabuhan Samudrapura dalam babarapo catatan sajarah disabuik pernah manjadi tampek pambarangkatan jamaah haji pado abad-abad lamo.
Sasuai jo latar sajarah itu, kahidupan budaya masyarakatnyo juo dipangaruhi dek nilai-nilai Islam nan kuat. Salah satunyo dibuktikan jo manuskrip Al-Qur’an bariluminasi Minangkabau nan ditulih dek Sutan Abdullah Al-Karim atas parentah Sultan Mara Baqi pado tahun 1849.
Dek karano itu, indak mustahil Tari Rantak Kudo nan masuak ka Indopuro mangalami panyasuaian jo budaya satampat, hinggo lahia bantuak baru nan kini dikenal sabagai Tari Benten.
Tari Syukur Urang Basawah
Pado mulonyo, Tari Rantak Kudo dipatunjukkan sasudah musim panen sabagai ungkapan syukur ka Allah Ta’ala ateh hasil sawah jo ladang nan malimpah. Aleknyo kadang-kadang berlangsung sampai babarapo hari.
Namun kalau panen indak manjadi, atau musim kamarau panjangan, tarian ko tetap dipatunjukkan. Tujuannyo untuak mamanjekkan doa, mambuek hati masyarakat tatap tabik harapan, mudah-mudahan hujan turun, padi manjadi, jaguang maupiah, jo kahidupan masyarakat baliak makmur.
Dek sabab itu, Tari Rantak Kudo bukan sajo kasenian, tapi juo manganduang fungsi adat jo ritual. Di dalamnyo basatu raso syukur, harapan, jo tawakal urang kampuang kapado Allah Subhanahu wa Ta’ala.
Rantak, Silat jo Nuansa Sakral
Pamentasan Tari Rantak Kudo diiringi tabuhan gandang jo tifa, salain lagu-lagu asuah nan dinyanyikan pangasuah. Di Minangkabau, bantuak pangambangannyo labiah manonjolkan musik jo rantak kaki panari, indak banyak lai mamakai syair.
Kakuatan tarian ko tampak pado gerak rantak, yaitu hantakan kaki nan dipadu jo langkah tigo silek Minangkabau. Panari laki-laki jo padusi manyuguhkan gerak nan rancak, gagah, jo panuah samangaik.
Di babarapo pamentasan tradisional, dibaka pulo kamanyan sabagai bagian dari ritual. Suasana nan sakral itu kadang mambuek sabagian panari masuak ka kaadaan trance, bahkan ado nan kasurupan. Bagi masyarakat pendukungnyo, hal itu dipandang sabagai bagian dari pangalaman spiritual, bukan sakadar tontonan.
Syair Nan Mambao Carito Sajarah
Manuruik babarapo sumber, tamasuak Wikipedia jo panalitian Didi (2021), Tari Rantak Kudo juo dipatunjukkan pado alek baralek adat urang Kerinci.
Syairnyo dibuek barupo pantun basahutan:
“Tigeo dili, empoak Tanoh Rawoa. Tigeo mudik, empoak Tanoh Rawoa.”
Syair ko mangisahkan tampek kadudukan niniak moyang urang Kerinci, tatkalo Tanah Hamparan Rawang manjadi pusat pamarintahan, pusat kabudayaan, jo tampek musyawarah adat pado maso pamarintahan para Depati.
Didi (2021) manyabuikkan Tanah Hamparan Rawang adolah tampek lahirnyo Tari Rantak Kudo. Tradisi lisan masyarakat pulo manyabuik namo Ruwai sabagai urang nan mula-mula manciptakan jo mangambangkan tarian ko.
Pusako Nan Wajib Dijago
Kini, takalo bantuak asli Tari Rantak Kudo lah hampia lanyok, Tari Benten manjadi jambatan nan manyambuang ingatan masyarakat Pasisia Salatan jo aka sajarah budayanyo.
Pangakuan sabagai Warisan Budaya Tak Benda Indonesia bukanlah sakadar piagam panghargaan. Labiah dari itu, pangakuan ko maingekkan kito bahaso di baliak satiok rantak kaki panari Tari Benten, tasimpan sajarah panjang tantang kahidupan urang basawah, adat istiadat, jo nilai-nilai Islam nan lah tumbuah bakambang di ranah Pasisia Salatan salamo babarapo abad.
Manjago Tari Benten barati manjago ingatan kolektif urang awak. Sabab salamo rantaknyo masih badantiang di bumi Minangkabau, salamo itu pulo pusako niniak moyang indak akan lapuak dek hujan jo indak lakang dek paneh. (Eko/Yuyu/PKM)
