Maninjau — Bagi Palang Merah Indonesia (PMI) Sumatera Barat, tugas kemanusiaan indak salasai wakatu banjir bandang jo galodo lah suruik. Bulan-bulan sasudah musibah malanda, PMI Sumbar masih taruih hadir di tangah masyarakat nan tadampak, mambantu supayo kahidupan urang kampuang bisa baliak takah nan taralah jo labiah kokoh manghadapi bencana di maso nan ka datang.
Komitmen tu dibuktikan jo panyarahan bantuan sumua bor jo bibik tanaman kapado masyarakat Nagari Sungai Batang, Kacamatan Tanjung Raya, Kabupaten Agam, hari Kamih (23/7). Bantuan disarahkan langsung dek Ketua PMI Sumbar Aristo Munandar Dt. Bagindo Kayo, didampingi Wakil Sekretaris PMI Sumbar Edi Hasymi.
Acara panyarahan diadokan di Kantua Wali Nagari Sungai Batang disaksian dek Sekretaris Daerah Kabupaten Agam Muhammad Lutfi, Camat Tanjung Raya, para Wali Nagari jo Wali Jorong, ninik mamak, tokoh masyarakat, relawan SIBAT (Siaga Bencana Berbasis Masyarakat), sarato warga masyarakaik.
Ketua PMI Sumbar Aristo Munandar Dt. Bagindo Kayo mangatokan, misi kemanusiaan indak buliah baranti sajo sasudah maso tanggap darurat salasai. Malahan, maso transisi pamulihan jadi bagian nan sangat penting untuak mambantu masyarakat bangkik baliak.
“PMI tetap hadir mandampingi masyarakat salamo maso transisi pamulihan pascabencana. Kami indak ingin masyarakat ditinggakan sasudah bencana baralu,” kecek Aristo.
Manuruiknyo, di babarapo daerah nan ditimpo banjir bandang jo longsor di Sumatera Barat, PMI masih manjalanan program pamulihan, di antaronyo pembangunan sumua bor, pandalaman sumua, pipanisasi, distribusi aia basiah, palayanan kasahatan, bantuan non-tunai, pambagian paralatan sikola untuak anak-anak sikola, sampai kapado simulasi kabencanaan jo panghijauan sabagai upayo mangurangi risiko bencana.
Untuak di Kabupaten Agam, program difokuskan ka panyadioan aia basiah, palayanan kasahatan, distribusi aia, jo panghijauan kawasan nan rusak dek bencana.
Kato Aristo, PMI Sumbar alah mambangun tigo unit sumua bor di Kabupaten Agam, masing-masing di Kacamatan Palembayan, Tiku Limo Jorong, jo Tanjung Raya. Kini, katigo sumua tu alah bisa dimanfaatkan dek masyarakat untuak mandapekkan aia basiah nan salamo ko langka sasudah bencana marusak sumber aia.
“Alhamdulillah, kasado pambangunan alah salasai. Kini masyarakat alah bisa manikmati aia basiah nan dulu susah didapek dek dampak bencana,” katonyo.
Indak cukuik di situ, PMI Sumbar juo mananam 500 batang bibik tanaman di kawasan nan tadampak bencana di Kacamatan Tanjung Raya. Bibik nan ditanam barupo alpukat, durian, cangkeh, jo mahoni nan dibantu dek Dinas Kahutanan. Panghijauan ko diharokkan bisa maelokkan lingkungan sakaligus mangurangi ancaman longsor jo galodo di kemudian hari.
Mawakili Bupati Agam, Sekdakab Agam Muhammad Lutfi manyampaian apresiasi ka PMI Sumbar nan masih satia mandampingi masyarakat, walaupun bencana lah lamo baralu.
“Pamarintah masih taruih baisajo mamuliahkan kondisi masyarakat sacaro batahap. Bantuan jo program nan dibao PMI sangat mambantu pamarintah. Tarimo kasih karano PMI indak maninggakan masyarakat kami sasudah bencana,”* kato Lutfi.
Samantaro tu, Wali Nagari Sungai Batang Ahsin mangaku sumua bor nan dibangun PMI manjadi solusi untuk masalah kakurangan aia basiah nan masih diraso warga sampai kini. Malahan, pado Sabtu (19/7) lalu, sabagian wilayah nagari tu baliak ditarajang banjir bandang.
“Kami bana-bana alah putuih aso mahadoki kondisi ko. Untuangnyo PMI masih datang juo mambantu kami,”* kato Ahsin.
Selain bantuan fisik, PMI juo mambarikan palatihan kapado Kelompok Siaga Bencana (KSB) Nagari Sungai Batang. Manuruik Ahsin, palatihan tu sangat baparuah untuak maningkekkan kamampuan relawan nagari, supayo masyarakat labiah siap manghadapi bencana nan bisa datang kapan sajo.
Kahadiran PMI Sumbar di Agam manjadi bukti bahasonyo nilai-nilai kemanusiaan indak baranti di wakatu musibah sajo. Sasudah bencana suruik, PMI masih taruih basamo masyarakat, mambantu mamuliahkan kahidupan, manjamin kasadiaan aia basiah, mamuliahkan alam, sarato mambangun kasiapsiagaan, supayo urang kampuang bisa bangkik jo labiah tangguah manghadapi tantangan di hari nan ka datang. (Tan Parpatiah)
