Padang — Ampok Online altau jusi online tanyato maruyak ko di aumayera Barat. Polda Sumbar lun lamo ko mambongka sindikat nan mangoperasikan anam situs judi dalam jaringan (daring) di Kota Padang.
Dari pangungkapan kasus ko, sabanyak 21 urang ditangkok dek polisi untuak dipareso.
Kabid Humas Polda Sumbar Kombes Pol Susmelawati Rosya dalam konprensi pers di Mapolda Sumbar, Rabaa patang ko (29/7), didampingi Kasubdit V Ditreskrimsus Polda Sumbar Kompol Citra mangatokan bahwa kini polisi sadang basitungkin manyigi kasus ko.
Manuruik Susmelawati, tabukanyo kasus ko bamulo dari patroli siber nan salalu dilakukan personel Subdit V Ditreskrimsus Polda Sumbar di babagai media sosial jo platform internet.
“Dari patroli siber ko, petugas mandapek indikasi ado aktivitas judi daring. Hasil tamuan tu indak dibiakan baitu sajo, tapi dilanjuikan jo panyalidikan nan labiah mandalam untuak mancari tahu sapa nan barado di baliak akun-akun palasu tu,” katonyo.
Katonyo, patroli siber bukan sajo mancari informasi, tapi juo manjadi pintu masuak untuak mambongka jaringan palaku nan salamo ko bausaho mahandok di baliak identitas palasu.
“Kami indak ka maagiah peluang sangenek alah juo kapaso sia sajo untuak mambukak ampok online ko di Sumatera Barat,” kato Susmelawati.
Samentaro tu, Kasubdit V Ditreskrimsus Polda Sumbar Kompol Citra manarangkan, operasi pangungkapan kasuih ko dimulai pado Salasa (21/7/2026), sasudah tim mandapek tamuan dari patroli siber.
Dari hasia analisis digital nan taliti, tim lalu manyalusuri identitas jo lokasi palaku nan salamo ko manggunokan akun-akun samaran untuak mangelola jo mamasuakkan promosi situs ampok online ko.
Tigo hari salapeh panyalidikan dilakukan sacaro intensif, pado Jumaik 24/7), aparat kapolisian barhasil manangkok para palaku nan talibat dalam jaringan ko.
“Sampai kini sabanyak 21 urang lah diamankan. Kasadonyo masih dalam proses pamariksaan untuak manggali labiah jauah apo paranan masing-masing di dalam jaringan ko,” kecek Citra.
Dari hasil panyalidikan samantaro, polisi manamukan bahasonyo para palaku bakaitan jo anam situs judi daring. Modus nan dipakai iyolah mambuek jo mangelola situs judi, salanjuiknyo dipromosikan malalui babagai media sosial jo internet supayo makin banyak urang nan masuak mamainkan.
Masing-masing situs dibuek pado wakatu nan babeda. Dari operasi ko, palaku lah mandapek panghasilan, mulai dari Rp10 juta sampai mancapai Rp100 juta.
Para palaku bisa dianggap malangga Pasal 426 ayat (1) huruf a dan/atau huruf b juncto Pasal 20 Undang-Undang Nomor 1 Tahun 2023 tantang Kitab Undang-Undang Hukum Pidana (KUHP).
Polda Sumbar akan taruih melakulan patroli siber jo panindakan hukum ka sagalo macam kajahatan digital, tamasuak praktik ampok daring nan dinilai lah marusak tatanan kahidupan masyarakat. Di Ranah Minang, nan dijunjuang tinggi iyolah adat basandi syarak, syarak basandi Kitabullah. Dek sabab itu, sagalo parbuatan nan manyimpang dari hukum jo norma masyarakat akan ditindak tagas, demi manjago katantiban, kasalamatan, jo katantraman urang banyak.( Tan Parpatiah)
