Lambah — Indak banyak urang nan tau, di Jorong Koto Marapak, Nagari Lambah, Kacamatan IV Angkek, Kabupaten Agam, ado Surau Adat Minangkabau nan alah tagak labiah dari saabad.
Surau nan lah lamo dikenal jo namo Surau Usang Koto Marapak ko kini dihiduikkan baliak jo harapan jadi pusek palestarian adaik, budaya jo syi’ar Islam di tangah-tangah masyarakat Minangkabau.
Surau ko baru sajo dilaunching baliak pado Kamih (2/7/2026) sasudah diranovasi jo tatap manjago bentuk asli bangunannyo. Satiok bagian nan dipelok salalu mampartahankan ciri arsitektur kayu tradisional Minangkabau nan lah jadi pusako turun-tamurun.
Peresmian awal Surau Adat Minangkabau ditandoi jo manokok talempong dek perwakilan Pamarintah Kabupaten Agam basamo LKAAM Agam, Kerapatan Adat Nagari (KAN) Nagari Lambah, sarato niniak mamak jo tokoh masyarakat.
Surau Adat Nagari Lambah indak sajo dipakai untuak baribadah. Pado maso nan katibo , surau ko juo ka difungsikan sabagai tampek bamusyawarah adaik, mambina anak nagari, malestarikan kasenian jo kabudayaan Minangkabau, sarato tampek mangkaji jo mangamalkan falsafah Adaik Basandi Syarak, Syarak Basandi Kitabullah.
Dari sisi sajarah, Surau Adat Nagari Lambah marupokan salah satu pusako penting tentang perkembangan Islam jo adaik di Ranah Agam. Bangunan nan kini alah manjadi cagar budaya tu masih mampunyoi konstruksi kayu khas Minangkabau jo atok limas basusun nan dipartahankan kaasliannyo sampai kini.
Renovasi nan dilakukan indak maubah bantuak asal bangunan. Usaho ko marupokan bukti komitmen masyarakat Nagari Lambah untuak manjago pusako nan ditinggakan dek urang tuo-tuo dahulunyo, supayo indak hilang dilulua zaman.
Acara launching Surau Adat sangaik mariah jo Pawai Bararak Talam, makan bajamba, sarato baragam lombo kaulinan tradisional anak nagari nan diikuti masyarakat dari barbagai kalangan.
Staf Ahli Bupati Agam Bidang Politik jo Hukum, Dandi Pribadi, nan mawakili Bupati Agam, manyabuikkan Surau Adat ko dipakirokan didirikan pado tahun 1890.
“Surau ko didirikan pado tahun 1890. Umurnyo indak jauah babeda jo Masajik Bingkudu di Canduang. Mungkin basalisiah hari atawa bulan sajo,” katonyo.
Dalam pado itu, Ketua Kerapatan Adat Nagari (KAN) Nagari Lambah, Aristo Munandar Dt. Bagindo Kayo, manarangkan bahwo acara nan dilaksanakan kini baru sabatas soft launching. Pihak nagari basamo unsur adaik bamukasuik handak maadokan peresmian sacaro resmi jo maundang Menteri Kabudayaan.
Manuruiknyo, Surau Adat Nagari Lambah bukan sajo bangunan tuo nan dihiduikkan baliak, tapi juo simbol bangkiknyo marwah adaik jo kabudayaan Minangkabau. Surau ko diharapakan baliak manjadi pusek pambinaan umat, tampek barundiang niniak mamak, alim ulama jo cadiak pandai, sarato tampek mambantuak karakter generasi mudo salapeh lamo kurang difungsikan.
“Kawajiban awak basamo manyusun kakuatan jo manjago kakompakan, supayo Surau Adat ko bisa baliak jadi pusek palestarian adaik, budaya jo nilai-nilai kaagamaan untuak anak kamanakan di maso nan ka datang,” kato Aristo. (Tan Parpatiah)
