Bukittinggi – Jalan provinsi di Kelok 44 nan malintasi Kecamatan Tanjung Raya jo Kecamatan Matur, Kabupaten Agam, kini makin marusuah jo mambahayokan pangguno jalan. Karusakan dek bencana tahun 2025 lalu kini batambah parah, malahan di Kelok 8, Kelok 9 jo Kelok 10 ampia putuih.
Sampai Rabaa (1/7/2026), kondisi badan jalan di kawasan tu tampak samakian runtuah. Sabagian badan jalan alah taban digaruih longsor, sadangkan di bawah aspal lah tabantuak caruak nan taruih dikikih aia.
Kaadaan ko mambuek jalan sangat rawan runtuah pabilo hujan masih taruih turun.
Ketua Taruna Siaga Bencana (TKSK) Kabupaten Agam, Miswardi, manyabuikkan, kondisi di Kelok 10 kini paling mangkhawatirkan. Manuruiknyo, kalau hujan masih tinggi, indak mustahil jalan di Kelok 9 jo Kelok 10 bisa putuih sapaduo.
“Sabagian badan jalan alah hilang dek longsor. Kini di bawah jalan lah ado caruak nan taruih digaruih aia. Kalau hujan indak baranti, kami takuik jalan ko runtuh labiah parah lai,” katonyo.
Inyo manambah, Kelok 44 marupokan urek nadi transportasi nan mahubuangkan Lubuak Basuang, Maninjau jo Bukiktinggi. Kalau jalan ko putuih, tantu akan mangganggu lalu lintas masyarakat sarato pangangkutan barang di kawasan Agam jo sakitarnyo.
Sabagai langkah antisipasi, salamo lapan bulan sasudah jalan tu runtuah dek longsor, aparat alah mamasang garih polisi di lokasi nan rawan untuak mangingekkan pangguno jalan supayo labiah hati-hati.
Miswardi masih tetap-khawatir jo kasalamatan pangendara, apolai nan lalu di jalan tu malam hari. “Nan jaleh, di kawasan Kelok 44 indak ado lampu panarangan jalan, sahinggo kondisi jalan nan runtuah sulit taliek dek pangendara,” katonyo.
Samentaro tu, Rabaa malam, anggota Polsek Tanjung Raya lah turun mamantau langsung ka lokasi karusakan jo basiaga di kawasan tu untuak mangantisipasi kalau sampai tajadi longsor susulan atau gangguan lalu lintas.
Lun didapek lai baa rencana pananganan darurat maupun parbaikan ruas jalan Kelok 44 dek Pemerintah Provinsi Sumatera Barat nan sampai kini alun ado panjalasan resmi, padahal karusakan jalan ko alah babulan-bulan mangganggu akses transportasi masyarakat. (Tan Parpatiah)
