RAGAM MAKANAN RANG AWAK (9)
Pinyaram adolah salah satu penganan tradisional Minangkabau nan sangaik penting dalam khazanah kuliner Sumatera Barat. Kue ko sederhana dari segi bahan, tetapi kayo jo makna budaya karano arek hubungannyo jo tradisi baralek, hari gadang keagamaan, jamuan tamu, dan kabiasoan urang Minangkabau manyuguhkan makanan kapado urang lain.
Pinyaram adolah kue tradisional Minangkabau nan dibuek dari tapuang bareh, gulo, jo santan, sudah tu digoreng dalam minyak angek. Bantuaknyo khas. Bagian tangah relatif taba jo ampuak, samantaro bagian tapi lebih tipih, garing, dan barwarna kecokelatan.
Kalau diliek sacaro sepintas, bantuak pinyaram agak maingekan kito kapado kue cucur nan dikenal di babarapo daerah di Indonesia. Namun, pinyaram mampunyai karakter raso jo tradisi pengolahan sendiri dalam budaya Minangkabau.
Ado pinyaram nan manggunoan gulo pasir sahinggo warnanyo labiah tarang. Ado pulo nan mamakai gulo merah atau saka sahinggo menghasiakan warna cokelat kehitaman dan bau karamel nan labiah kuaik.
Perbedaan bahan ko mambuek raso pinyaram bisa babedo antaro daerah nan satu jo daerah nan lain. Pinyaram nan manggunoan gulo merah biaso mampunyai raso manih-legit jo bau gulo nan labiah kuaik. Sadangkan penggunaan gulo pasir menghasiakan raso manih nan labiah ringan.
Proses mambuek pinyaram cukuik sederhana, tapi membutuhkan ketapekan. Tapuang bareh disiapkan dahulu. Gulo dilarutkan, sudah tu dicampua jo santan jo saketek garam.
Campuran ko dituangkan sacaro bartahap ka dalam tapuang bareh sambil diaduk sampai manjadi adonan. Adonan biaso dibiakan babarapo waktu supayo tapuang manyarap caiaan dan mahasiakan tekstur nan sesuai.
Sasudah tu minyak diangekkan dalam kuali. Adonan dituangkan ka dalam minyak angek mamakai sendok atau alat tatantu nan dalam sabagian tradisi disabuik taku.
Bilo adonan masuak ka dalam minyak, bagian tapinyo akan maleba dan manjadi tipih, samantaro bagian tangah tetap labiah taba. Pinyaram sudah tu digoreng sampai masak dan barwarna kecokelatan. Sasudah dibangkik, minyak ditiriskan.
Pinyaram dalam kehidupan sosial urang Minangkabau cukuik penting. Di sebagian daerah malah manjadi kue adat. Bisa juo dianggap kurang baradaik kalau ndak ado pinyaram dalam alek.
Itu salah satu hal nan paliang menarik dari pinyaram adolah kedudukannyo dalam budaya sosial urang Minangkabau. Pinyaram acok hadir dalam berbagai kegiatan masyarakat takah baralek, kenduri, pengajian, perayaan hari gadang keagamaan, dan acara keluarga.
Dalam budaya Minangkabau, makanan bukannyo hanyo untuak dimakan. Makanan juo manjadi sarana untuak mambangun hubungan sosial. Bilo ado urang baralek, makanan disiapkan dalam jumlah banyak untuak para tamu. Ado makanan utama, lauk-pauk, penganan, dan berbagai macam makanan ketek. Pinyaram manjadi salah satu bagian dari kue adat tu. Biaso dimakan basamo katan.
Pinyaram juo menarik kalau dikaikkan jo tradisi maanta, yaitu mambao makanan ka keluarga jo kaum kerabat. Dalam kehidupan urang Minangkabau, mambao makanan mampunyai makna sosial nan kuaik. Urang indak datang manjalang jo tangan kosong.
Makanan nan dibao bisa manjadi tando penghormatan, tando perhatian, sekaligus sarana mampaarek silaturahmi. Karano itu, pinyaram bukannyo sekadar kue nan manih jo garing. Di dalamnyo ado bagian dari caro hidup urang Minangkabau: mamasak, babagi, manjalang, baralek, bakenduri, jo manjago hubungan baik jo keluarga sarato sasamo urang. (Tan Parpatiah)
