RAGAM MAKANAN RANG AWAK (8)
Manuai padi di sawah bagi urang Minangkabau, takah itu juo bagi suku-suku lain, bukanlah sekadar pekerjaan untuak maabiak hasia sawah.
Di dalam kegiatan manuai ado berbagai tradisi nan sudah dijalankan sejak dahulu. Salah satunyo adolah manyadiokan makanan untuak urang nan sedang manuai padi.
Di babarapo daerah Minangkabau dikenal makanan nan disabuik Nasi Tuai. Nasi Tuai adolah makanan nan dibuek pada musim manuai padi. Karano itu, Nasi Tuai menarik karano kebaradoannyo sangaik arek jo kehidupan urang Minangkabau sebagai masyarakat agraris, tradisi manuai padi, dan raso syukur sasudah panen.
Kato tuai dalam bahaso Minangkabau barati manuai atau memanen padi. Jadi, Nasi Tuai sacaro sederhana dapek dimaknai sebagai makanan nan berkaitan jo kegiatan manuai padi.
Pada maso dahulu, kutiko sabagian gadang urang nagari manggantuangkan kehidupan pado sawah, musim panen marupokan salah satu maso nan penting dalam kehidupan basamo.
Sasudah berbulan-bulan mangarajoan sawah—mulai dari manyiapkan lahan, mananam bibit, marawat tanaman, sampai manunggu bulir padi manjadi kuniang—akhianyo tibolah wakatunyo manyabik atau manuai padi.
Pekerjaan tu acok dilakukan basamo-samo. Bilo pekerjaan sudah salasai atau pado waktu tatantu salamo musim panen, masyarakat manyiapkan makanan untuak dimakan basamo.
Dalam suasana itulah Nasi Tuai hadir sebagai bagian dari jamuan sekaligus ungkapan syukur atas hasia sawah. Nasi Tuai jan dibayangkan sebagai nasi biaso nan dimakan jo lauk-pauk. Indak. Kato “nasi” hanyolah penamaan.
Sasungguhnyo Nasi Tuai adolah katan nan dibuek dari bareh sipuluik, sudah tu dicampua jo kolak. Di sabagian daerah kolak ko disabuik sanok.
Mulo-mulo kaum ibu di rumah mamasak bareh sipuluik manjadi katan. Kadang-kadang sipuluik dicampua jo santan karambia dan biaso diabuik nasi lamak. Sasudah tu dibuek kolak pisang, kolak ubi, kolak kolang-kaling, kolak delima, atau kolak kundua. Pokoknyo apo nan takana, atau dicampua-campua.
Mambuek kolak cukuik ko ndak lo rumik doh. Bahannyo terdiri dari santan, gulo anau—bisa pulo gulo tabu atau saka atau gulo pasia—daun pandan, vanila, sapotong kaciak sipadeh, dan saketek garam. Sado bahan dimasak sampai manggalagak dan bahan kolak manjadi empuk. Sudah tu tunggu sampai bisa dimakan.
Katan jo kolak, basamo makanan nan lebih barek takah nasi jo lauk-pauk, dibao dalam katidiang dek kaum ibu ka sawah. Bilo alah masuak waktu makan, makanan dinikmati basamo urang nan sadang manuai padi di pamatang sawah atau di ateh lapiak pandan nan dibatangkan di ateh jarami. Biaso Nasi Tuai dimakan sasudah makan nasi jo lauk-pauk.
Kini Nasi Tuai ko lah bisa lo dinikmati di babarapo rumah makan modern jo penyajian nan disesuaikan jo zaman. Namun, walaupun caro penyajiannyo berubah, cita rasanyo tetap sarupo cita rasa makanan tradisional Minang. (Tan Parpatiah)
Baca juga: Talua Barendo
