RAGAM MAKANAN RANG AWAK (1)
Ampiang Dadiah adolah salah satu makanan tradisional Minangkabau nan khas bana, tarutamo dikenal di daerah Bukittinggi, Agam, jo Tanah Datar. Makanan ko bukannyo sakadar hidangan panutuik, tapi juo manampakkan kepandaian urang Minangkabau maolah bahan makanan nan sederhana manjadi makanan nan punyo nilai gizi jo raso nan khas.
Sacaro sederhana, Ampiang Dadiah marupokan paduan ampiang jo dadiah. Ampiang dibuek dari bareh sipuluik, sadangkan dadiah dibuek dari susu kabau nan difermentasikan. Biaso disajikan basamo gulo saka atau gulo merah caia. Dari paduan tu lahia raso nan khas: gurih, asam segar, jo manih.
Ampiang dibuek dari bareh sipuluik nan dimasak indak sampai masak bana. Sasudah tu, sipuluik ditumbuak atau dipipihkan sampai manjadi kapiangan- kapiangan tipih. Rupanyo agak sarupo jo emping (dalam bahaso Indonesia) , tapi bahan dasarnyo adolah bareh sipuluik.
Samantaro dadiah dibuek dari susu kabau nan difermentasikan sacaro alami. Susu segar dimasuakkan ka dalam rueh batang batuang, lalu ditutuik dan dibiakan babarapo waktu. Proses fermentasi alami ko mambuek susu barubah manjadi makanan nan manyarupai yoghurt tradisional, jo tekstur padek atau satangah padek.
Bilo handak dimakan, ampiang jo dadiah dicampua, sudah tu disiram jo gulo saka. Ado pulo nan manambahkan karambia parut, sahinggo rasanyo manjadi labiah guriah.
Nan unik dari dadiah justru talatak pado caro mambueknyo nan masih tradisional. Susu kabau nan baru diparah dimasuakkan ka dalam rueh batuang nan alah dibarasiahkan. Batuang ditutuik jo daun, lalu dibiakan pado suhu ruang.
Salamo proses tu barlangsung, mikroorganisme alami membantu mangubah laktosa jo bagian lain dari susu melalui fermentasi. Sasudah babarapo waktu, susu barubah manjadi labiah kental, teksturnyo lambuik, dan mampunyai raso asam nan khas.
Karano dibuek indak melalui fermentasi industri, tapi mangandalkan mikroorganisme nan ado di lingkungan, raso dadiah bisa babedo antaro daerah nan ciek jo daerah nan lain. Dadiah buatan urang nan ciek bisa pulo babedo rasanyo jo dadiah buatan urang nan lain.
Manga Susu Kabau?
Pemakaian susu kabau bukannyo tanpa alasan. Dalam kehidupan urang Minangkabau di maso dahulu, kabau mampunyoi kedudukan penting dalam kehidupan ekonomi rumah tanggo jo pertanian.
Kabau dipakai untuak membantu karajo di sawah. Di sampiang tu, kabau juo mahasiakan susu nan kamudian diolah manjadi dadiah.
Jadi, dadiah adolah salah satu bantuak kearifan pangan lokal urang Minangkabau. Susu segar nan murah rusak diolah melalui fermentasi sahinggo bisa dimakan sebagai makanan. (Tan Parpatiah)
Baca juga: Nasi Tuai
