RAGAM MAKANAN RANG AWAK (7)
Dalam bahaso Minangkabau, talua barati telur. Sadangkan barendo sacaro harfiah manunjuak kapado bantuak talua nan maleba dan mambuek rendo-rendo tipih kutiko digoreng. Karano itu, Talua Barendo bisa dipahami sebagai talua goreng nan dibuek manyarupoi rendo.
Tapi sesungguhnyo Talua Barendo indaklah tapek disabuik sebagai kuliner tradisional Minangkabau nan lah lamo. Makanan ko baru belakangan manjadi terkenal di Ranah Minang dan sudah tu manyeba ka lua Sumatera Barat.
Kini Talua Barendo sangaik mudah ditemui di rumah makan Minang. Bantuaknyo biaso cukuik gadang, indak bulek sempurna takah talua dadar biaso.
Bagian tapinyo tipih, bagelombang, barendo, jo garing. Bagian tangahnyo labiah taba dan lambuik. Keunikan ko bukannyo samato dari bahan nan dipakai, tapi tarutamo dari teknik menggoreng.
Talua Barendo dibuek dari bahan nan sederhana: talua ayam atau talua itiak, lado merah atau lado giling, bawang merah, daun bawang atau saladari, garam, jo minyak goreng nan cukuik banyak. Talua ko musti digoreng dalam minyak nan banyak dan tergenang.
Pado sabagian resep ditambahkan bawang putiah, marica, atau bumbu lain. Ado pulo nan mamakai talua itiak untuak mendapekkan raso jo tekstur nan labiah kuaik.
Nan mambedakan Talua Barendo dari talua dadar biaso adolah caro mangocok jo manggorengnyo. Talua dikocok basamo bumbu sampai rato. Minyak diangekkan dalam jumlah nan cukuik banyak sampai sabana angek.
Adonan talua dituangkan ka dalam minyak dari jarak tatantu jo gerakan tangan nan mambuek talua manyeba dan mambantuak lapisan tipih di permukaan minyak.
Talua nan langsung basentuhan jo minyak angek akan mangambang dan mambantuak galambuang- galambuang ngenek. Bagian tapi manjadi tipih, kariang, jo renyah. Samantaro bagian tangah nan labiah taba tetap lambuik. Dari situlah terbantuak rupo takah rendo.
Sasudah bagian bawah masak dan warnanyo manjadi kuniang ameh, talua dibaliakan hati-hati supayo kaduo sisinyo masak sempurna. Hasianyo adolah talua dadar nan ukurannyo relatif gadang, jo tapi karitiang jo garing, sadangkan bagian tangah tetap lambuik jo agak taba.
Raso Talua Barendo ko sabana gurih jo garing. Gurihnyo barasa dari talua, padehnyo dari lado, bau harum dari bawang, jo asin dari garam. Tapi nan mambuek pengalaman makan manjadi menarik adolah teksturnyo. Bagian tapi nan garing maagiah sensasi kriuk, sadangkan bagian tangah tetap lambuik.
Kalau ladonyo cukuik banyak, raso padeh langsuang taraso sajak suapan partamo. Talua Barendo biaso dimakan basamo nasi putiah hangek jo samba, atau manjadi salah satu lauk dalam sajian nasi Padang. (Tan Parpatiah)
Baca juga: Gajeboh
