Aia Bangih — Suasana haru jo khidmat taraso di Rumah Gadang Pucuak Adat Nagari Aia Bangih, Kecamatan Sungai Barameh, Kamih (16/7/2026), tatkalo Aulia Amri nan bagala Sutan Karajaan dikukuhkan sabagai Pucuak Adat jo Rajo Aia Bangih malalui prosesi Palewaan Pucuak Adat.
Pangukuhan ko manjadi puncak acara Aia Bangih Baralek Gadang, nan manandoi tetap tagaknyo payuang adat untuak mamayungi anak kamanakan jo masyarakat Nagari Aia Bangih.
Prosesi palewaan dilaksanakan jo penuh marwah adat. Saluak jo karih dipasangkan dek Rang Tuo Rajo kapado Aulia Amri Sutan Karajaan, sabagai lambang disarahkan amanah kapamimpinan adat. Sajak tu, Sutan Karajaan resmi mamikua tangguang jawab sabagai Pucuak Adat jo Rajo Aia Bangih, nan ka manjadi tampek batanyo, tampek bamusyawarah, jo payuang palinduang anak kamanakan.
Baralek gadang ko dihadiri Staf Ahli Gubernur Sumatera Barat Bidang Hukum, Politik jo Pamarintahan, Jasman Rizal Datuak Bandaro Bendang nan mawakili Gubernur Sumatera Barat, anggota DPRD Sumbar, Sekretaris Daerah Pasaman Barat Doddy San Ismail nan mawakili Bupati Pasaman Barat, Kapalo Dinas Kominfo Pasaman Barat Muharram, Camat Sungai Barameh, niniak mamak, alim ulama, cadiak pandai, bundo kanduang, jo ribuan masyarakat Aia Bangih.
Sekdakab Pasaman Barat Doddy San Ismail maucapkan kato salamaik dek tagak baliaknyo payuang adat di Nagari Aia Bangih. Manuruiknyo, adat, syarak jo pamarintahan indak dapek dipisahkan dalam mambangun nagari.
“Pamarintah mambangun jalan, palabuhan jo sarana umum. Niniak mamak manjago marwah adat, tanah ulayat jo kabaikan anak kamanakan. Alim ulama mambimbiang umat jo nilai-nilai agama. Tigo unsur ko saling mangokohkan,” katonyo.
Doddy maingekan, jabatan Pucuak Adat jo Rajo Aia Bangih bukanlah kahormatan semato, tapi amanah gadang nan harus dipikua jo bijaksano. Rajo adat harus bisa manjadi pangayom, panangah kutiko ado pasalisihan, jo pamimpin nan mamaliharo persatuan anak nagari.
Manuruiknyo lai, pamarintah Kabupaten Pasaman Barat salalu mamandang niniak mamak sabagai mitra strategis dalam manjalanan pamarintahan jo pambangunan.
“Roda pambangunan indak akan lancar kalau indak didukung dek niniak mamak jo alim ulama,” tambahnyo.
Samantaro itu, Staf Ahli Gubernur Sumbar Jasman Rizal Datuak Bandaro Bendang manyampaikan salamaik kapado Aulia Amri Sutan Karajaan nan lah resmi dipalewakan sabagai Pucuak Adat jo Rajo Aia Bangih.
Manuruik Jasman, palewaan ko bukan sajo pangangkatan pamimpin adat, tapi juo bukti hiduiknyo falsafah Adat Basandi Syarak, Syarak Basandi Kitabullah di Ranah Minang. Adat nan kokoh, kato nyo, akan manjadi sandaran dalam manjago karukunan jo marwah masyarakat.
Inyo juo mamuji kakompakan masyarakat Aia Bangih nan masih tetap manjunjung tinggi adat pusako. Sumangaik ko diharap dapek manjadi contoh untuak nagari-nagari lain di Sumatera Barat dalam mamaliharo warisan budaya Minangkabau.
Sabalunnyo, Ketua Panitia Aia Bangih Baralek Gadang, Ahdiyarsyah Sutan Nan Gombang, manarangkan bahwa Palewaan Pucuak Adat dilaksanakan badasarkan hasia mufakaik Rang Tuo Rajo sabagai bagian dari regenerasi kapamimpinan adat di Nagari Aia Bangih.
Manuruiknyo, Aia Bangih Baralek Gadang indak sajo batujuan mangukuhkan Rajo Aia Bangih nan baru, tapi juo manjadi ajang malestarikan adat pusako, mamperkenalkan budaya Minangkabau kapado generasi mudo, serta mananamkan kasadaran baho adat adalah jati diri urang Minang nan wajib dijago jo diwariskan dari satu generasi ka generasi salanjuiknyo.
“Tagaknyo Rajo Aia Bangih hari ko, tagak pulo marwah adat Nagari Aia Bangih. Salamo payuang adat kokoh, salamo itu pulo anak kamanakan punyo tampek balinduang jo bapijak dalam manjago pusako, basamo mambangun nagari.” Katonyo. (Tan Parpatiah)
