Padang — Salapeh mambuek masyarakat Sumatera Barat mangaluah dek antrean panjang di babagai SPBU salamo babulan-bulan balakangan ko, PT Pertamina (Persero) malalui Pertamina Patra Niaga Regional Sumbagut manyatokan bahaso panyaluran Bahan Bakar Minyak (BBM) di Sumbar kini mulai baliak stabil.
Mulai stabil tu lantaran lah mulai eloknyo jalur distribusi di sejumlah ruas jalan utamo di nagai awak ko.
Salamo ko, antrean bus jo truk sarato oto-oto nan pakai solar sabanda panjang antrean nyo co ula di SPBU dan lah manjadi pemandangan biaso. Indak saketek masyarakat nan maraso dirugikan dek harus manunggu bajam-jam untuak mandapekkan BBM. Bahkan, ado pulo nan babarapo kali mancubo ka SPBU lain dek stok nan alah habih. Kaadaan ko tantunyo mangganggu kalancaran aktivitas masyarakat jo perekonomian.
Manuruik Pertamina, babagai upayo parcepatan distribusi nan salamo ko dijalankan, ditambah lai jo mulai eloknyo kondisi lalu lintas di jalur distribusi, mambuek oto tangki kini dapek baliak manyalurkan BBM ka SPBU jo wakatu tampuah nan hampia samo jo kondisi normal.
Area Manager Communication, Relations & CSR Pertamina Patra Niaga Regional Sumbagut, Fahrougi Andriani Sumampouw, mangatokan nyo taruih maoptimalkan seluruh sumber daya supayo kebutuhan energi masyarakat tatap tapanuhi.
“Kami berkomitmen menjago keandalan pasokan energi bagi masyarakaik. Kini, sairiang jo makin eloknyo kondisi jalur distribusi di sejumlah titiak, proses penyaluran BBM juga semakin lancar. Pertamina tetap mengoperasikan seluruh sarana distribusi sacaro maksimal agar pasokan di seluruh wilayah Sumatera Barat tatap tajago,” katonyo dalam siaran pers, hari Akaiak (19/7/2026).
Fahrougi manarangkan, salamo ko distribusi BBM memang mandapek babarapo tantangan di lapangan. Di antaro nyo akses jalan nan sadang dipaelok, jalan nan manyampik, sampai ado material longsor di babarapo titiak. Kaadaan ko mambuek wakatu tampuah oto tangki manjadi labiah lamo daripada biaso, sahinggo pasokan BBM ka SPBU pun tabao rendong talambek lo.
Untuak mampacek normalisasi distribusi, Pertamina manurunkan 25 oto tangki tamabahan malalui skema spot charter. Salain tu, Integrated Terminal Teluk Kabung dioperasikan salamo 24 jam panuah supayo proses panarimaan, panimbunan, jo panyaluran BBM dapek barjalan sasuai rencana.
Upayo ko juo dipakuaik jo karajo samo dengan pamarintah daerah, aparat panagak hukum, Hiswana Migas, jo seluruh pamangku kapantiangan lainnyo. Pangawalan oto tangki di jalur prioritas, pangaturan pola distribusi, pamantauan stok di Fuel Terminal jo SPBU, sampai panyasuaian jadwal pangiriman taruih dilakukan salamo maso normalisasi.
Kini, sasudah akses ka Bunguih, Sitinjau Lauik jo Lembah Anai mulai elok, wakatu tampuah oto tangki ka SPBU lah baliak hampia samo jo kondisi normal. Dampaknyo, panyaluran BBM di babagai daerah di Sumbar mulai stabil, sahinggo kabutuahan energi masyarakat dapek dipanuhi jo labiah baiak.
Fahrougi manambahkan, kalancaran distribusi ko indak lapeh dari dukungan jo sinergi seluruh pihak.
“Kami mengapresiasi dukungan pemerintah daerah, aparat penegak hukum, Hiswana Migas, dan seluruh pemangku kepentingan nan lah bersinergi basamo Pertamina. Kolaborasi ko menjadi faktor penting dalam menjago kelancaran distribusi sehingga pasokan BBM ka masyarakat dapek berjalan stabil,” tambahnyo.
Meskipun Pertamina manyatokan pasokan BBM kini mulai stabil, masyarakat Sumatera Barat masih baharok antrean panjang nan salamo babulan-bulan ko manjadi masalah utamo di banyak SPBU iyo bana alah baranti ndak nyo.
“Paniang palo wak dek e Pak, gaji sabanayak tu juo, karajo antrean ko kadang ampek sampai limo jam, abih kepeang dek makan jo minum sambia nunggu BBM,” kato Yan Pitok, salah surang supir truk nan mambaok CPO,
Inyo baharok kondisi distribusi nan lah mambaik ko dapek mambuek pasokan BBM baliak normal, sahinggo aktivitas sahari-hari indak lai taganggu dek lamonyo manunggu di antrean. (Tan Parpatiah)
