Jumaik patang kami basobok jo dosen dari Malaysia. Ado sapuluah mahasiswa dari Universiti Kebangsaan Malaysia nan tibo ka Padang. Inyo baraja langsuang ka masyarakaik awak nan diingek sebagai urang Melayu. Ado nan baraja ka Museum Adityawarman, ado yang baraja ka Balai Pelestarian Kebudayaan, ado pulo yang baraja ka Classy FM. Di siko mahasiswa Malaysia ko baraja, baa bana bahaso Minang, budayo urang Minang, nan beko bisa inyo jadian kajian di kampusnyo surang-surang.
Dek alah sabulan baraja di siko, dosennyo datang mancaliak. Lai yo bana mahasiswanyo babaua jo masyarakaik Minang. Lai ado ilimu nan inyo dapek dari adaik-istiadaik Minang. Satantang itulah, kami manyambuik dosen ko di kampus kami, di Fakultas Ilmu Budaya Universitas Andalas.
Dek urang lua nagari nan tibo, tantu dijamu bak jamuan urang Minang. Kami hidangan makanan Minang nan dibuek dek amai-amai nan propesional. Makanannyo lamak takah dulu kami ketek-ketek. Badaceh kecek urang Minang. Ado bubua mutiara, onde-onde, kue lapih, puluik, nago sari, kue mangkuak, jo kacang edamame. Nan kacang edamame ko memang indak khas dari dulu. Maso daulu urang nan ado tu kacang ramang, ketek-ketek kacangnyo. Nan kacang edamame ko gadang-gadang kacangnyo. Rasonyo samo lamak. Badaceh pulo kok dimakan.
Katiko kami alah bacarito tantang sanangnyo dosen Malaysia ko di Padang, raso nio lamo-lamo di siko dek makanan lamak-lamak, pemandangan rancak-rancak, kami basoanlah makan kue tradisional Minang ko.
“Iko mangkuak,” kecek ambo katiko mambasoan kue dari tapuang bareh atau tarigu yang dikukuih dalam mangkuak ketek. Dulu dibuek dari tampuruang. Nan tahidang di muko kami dari mangkuak karateh atau silikon.
Senyum-senyumlah puan dari Malaysia ko. Takajuik kami, batanyo pulo, “Kok di Malaysia apo namonyo?”. Lai dijawek, kue juo namonyo, tapi dijalehan dek baliau kalau di Malaysia, indak buliah manyabuik kato mangkuak ko. Tabu keceknyo. Urang nan manyabuik kato mangkuak biasonyo urang nan sedang berang bana. Emosinyo maledak dek ado nan salah nan tajadi.
Kironyo di Malasyia, mangkuak ko umpatan dek urang-urang. Samo jo awak di Minang, kok berang basabuik, “E, karambia,” atau labiah kasa basabuik namo binatang takah kapuyuak, anjiang, jo binatang. Takah itu urang Malaysia mamaknai kato mangkuak.
Lapeh tuh, galak basamo-samo kami karano beda bahasa, beda budaya. Urang Malaysia ko lai ndak berang katiko kami manyabuik mangkuak dek referensinyo kue. Inyo lai maklum baso kami indak ado mukasuik ka sinan, tapi kalau dikana-kana, pai awak ka Malaysia, batanyo ka urang sinan, ado mangkuak, mungkin bisa salah paham jadinyo. Tapi baitulah bahaso, baitulah budayo, maikuik apo nan dipahami masyaraik banyak.
Nan lai mambuek kami sanang, lai habih juo kue awak dimakan dek urang Malaysia. Hati sanang, kami batambah sudaro.
