Bukittinggi — Tapian Tabiang Barasok di Bukittinggi ko bukanlah hanyo soal kabuik jo rancakno alam sajo, tapi di baliak pamandangan nan elok itu rupono ado tangan-tangan masyarakat nan lah bakarajo kareh sajak lamo di sanan.
Ado gotong royong nan manjadi tunggak, ado pulolah kelompok sadar wisata nan manjadi panggerak, jo tokoh adat nan manyadiokan tanah untuak dikambangkon manjadi kawasan wisata.
Kini, usaho nan lah dilalui masyarakat tu mandapek pangakuan di tingkeknasional.
Tapian Tabiang Barasok masuak ka dalam 30 besar kampuang wisata dalam ajang Wonderful Indonesia Awards (WIA) 2026 nan disalanggaraan dek Kementerian Pariwisata Republik Indonesia basamo Pesona Desa Wisata Indonesia.
Bagi masyarakat, pencapaian ko bukanlah sakadar angko di dalam daftar.
Praktisi Pariwisata Sumatera Barat, Mochammad Abdi, manyabuik keberhasilan Tapian Tabiang Barasok sebagai buah dari karajo samo banyak pihak.
Di bawah tabiang ado tapian nan sero
“Alhamdulillah, ko barkat karajo samo pentahelix saluruah unsur masyarakat jo pegiat wisata, dibantu dek akademisi,” kato Abdi di Bukittinggi, hari Akaik.
Jano Adi ngko, Tapian Tabiang Barasok mampu manyisiahkan puluhan nominator dari Sumatera Barat jo ratusan nominator lainno di tingkek nasional.
Tumbuh dari Masyarakat
Nan manjadi kekuatan Tapian Tabiang Barasok bukanlah semato-mato keindahan alamno sin, ndak. Nan labiah pantiang, masyarakat ikuik turun tangan dalam mambangun jo manjago kawasan wisata ko.
Konsep pariwisata berbasis masyarakat atau Community Based Tourism (CBT) tampak nyato di Tapian Tabiang Barasok. Masyarakat indak hanyo datang mananti wisatawan. Mereka sato bagotong royong, mambangun, mamaliharo, jo manjago kawasan wisata nan lah dirintis salamo batahun-tahun ntun.
Tanah untuak kawasan wisata ko disadiokan dek niniak mamak, lalu dipicayogan ka Kelompok Sadar Wisata (Pokdarwis) untuak dikelola.
“CBT-no istimewa, partisipasi nyato dari masyarakaik. Mereka lah batahun-tahun bagotong royong mambangun jo marawatno,” kato Abdi.
Dari kawasan di bibia Ngarai Sianok tu, kegiatan wisata pun baragam. Tapian Tabiang Barasok dipakai untuak pelatihan outdoor, gathering, glamping, outbound, jo barbagai kegiatan lainno.
Di sakitar kawasan wisata, usaho masyarakat pun ikut bakambang. Ado nan manggaleh sulaman, ado nan mambuek karajinan peci nasional, jo ado pulo nan manjua kopi lokal.
Mako, wisata indak baranti pado pemandangan alam sajo. Wisata juo manjadi jalan untuak mambuek perekonomian masyarakat satempat taruih baputa.
Sempat Hampia Baranti
Jalan Tapian Tabiang Barasok untuak sampai ka titik ko bukannyo salalu mudah sin. Bencana hidrometeorologi nan manimpo Sumatera Barat sempat mambuek pengelola cameh. Kegiatan wisata ampiang baranti lai, samantaro masa depan kawasan ko indaklah pasti.
Pamandangan di Tabiang Barasok
Ketua Kelompok Sadar Wisata Tapian Tabiang Barasok, Anton Sutan Rumah Panjang, manyabuik pascabencana sebagai maso nan cukuik barek.
“Sasudah gaoldo patang tu, kami sempat khawatir Tapian Tabiang Barasok indak bisa baliak baroperasi,” jano.
Tapi sumangaik masyarakat jo minaik wisatawan nan masih datang mambuek mereka indak lo patah sumangaik.
Kawasan wisata ko tatap dipatahankan. Pemberitaan dari barbagai media pun ikut mambuek perhatian masyarakat luas taarah ka Tapian Tabiang Barasok.
Nan cako dicamehgan indak bisa baliak bangkik, lambek-lambek mulai manggarik baliak.
Dari Gotong Royong ka Tingkat Nasional
Masuakno Tapian Tabiang Barasok ka dalam 30 besar WIA 2026 manjadi buah dari karajo panjang masyarakat.
Jano Abdi, Tapian Tabiang Barasok memenuhi 10 indikator penilaian Kementerian Pariwisata, yaitu kelembagaan desa, pengelolaan, atraksi, ekonomi, peran masyarakat, fasilitas, akses, homestay, kemitraan, jo digital.
“Jo prestasi nasional ko, mudah-mudahan sumangaik masyarakat batambah kuaik, jo karajo kareh nan lah dilakukan salamo ko mandapek hasia nan satimpal,” kato Abdi.
Bagi masyarakat nan lah lamo bagotong royong manjago kawasan, pangakuan nasional ko indaklah sakadar soal piala atau peringkat.
Nan labiah panting, ado pangakuan bahwa pariwisata bisa tumbuah dari masyarakat bawah. Indak salalu musti dimulai jo proyek gadang. Kadang-kadang, kawasan wisata lahia dari tanah nan dipercayokan dek tokoh adat, dari tangan masyarakat nan amuah bagotong royong, jo dari kelompok nan tatap batahan walau pernah dihantam bencana.
Harapan di Balik Kabut
Dukungan Pemerintah Kota Bukittinggi pun mulai diarahkan untuak mambantu pangembangan Tapian Tabiang Barasok. Walikota Bukittinggi M Ramlan Nurmatias kabanno manunjukkan perhatian lo ka pangembangan kawasan wisata ko, tamasuak rencana bantuan Rp1 miliar pado tahun 2027.
Anton maagiah apresiasino ateh perhatian pemerintah daerah. Manurutno, Tapian Tabiang Barasok indak sen mambao mampaaik untuk masyarakat, tapi juo mambari dampak positif ka citra jo prestasi Kota Bukittinggi di bidang pariwisata.
“Kami mangapresiasi kadatangan Wali Kota Bukittinggi ka Tapian Tabiang Barasok jo janji bantuan hingga Rp1 miliar pado tahun muko. Tapian Tabiang Barasok lah sabarusno mandapek paratian, karano capaian ko juo manjadi prestasi jo mambari dampak positif bagi Kota Bukittinggi,” jano Anton.
Kabuik di bibia Ngarai Sianok barangkali ka tatap turun tiok hari. Tapi di baliak kabuik nan tipih ntun, ado curito nan labiah gadang: carito masyarakat nan indak amuah manyarah, curito gotong royong nan tatap dipacik, jo carito kampuang wisata nan tumbuah dari tangan urang awak surang.
Tapian Tabiang Barasok kini indak hanyo manjamu wisatawan jo keindahan alam. Tapi juo
juo mambao curito tantang masyarakat nan manjago tanah, alam, jo harapan mereka basamo.(Tan Parpatiah)
