Pasan Gubernur: “Manggalehlah Caro Online lai”

Bukittinggi — Manggaleh maso kini ko ndak mungkin lai maandalkan caro lamo, galeh dikambang sudah ntun urang datang mambali galeh wak.
“Ndak amuah mantun sen li, musti dipakai caro modern manggunokan sistem online,” kato Nyiak Datuak Marajo, nan juo Gubernur Sumatera Barat tu.
Manuruik Mahyeldi —namo kaciak no— usaho mikro, ketek jo manangah (UKM) handaknyo sugiro manggunoan caro pamasaran digital untuak mampalaweh jangkauan pasa.
Hal iko baliau sampaikan kutiko maninjau kagiatan padagang Pasa Ateh di Bukiktinggi pado hari katigo Idul Fitri 1447 H, Sinayan (23/3/2026).
Salamo kunjungan tu, Gubernur manamui langsuang padagang nan manggaleh di Pasa Ateh ntun. Dan inyo manamukan baso mayoritas transaksi masih tagantuang pado panjualan langsuang atau tatap muko antaro panjua jo pambali di toko-toko.
“Ka muko, UMKM paralu mamanfaatkan platform digital sahinggo jangkauan pamasaran indak hanyo tabateh pado pangunjuang nan datang langsuang,” kato Mahyeldi Dt Marajo.
Inyo manakankan baso digitalisasi adolah langkah pantiang untuak maningkekan daya saing IKM, sarato mampakuek ekonomi daerah sacaro balanjuik.
“Kalau UMKM awak pakai digital, pasa akan labiah laweh dan peluang untuak maningkekan pandapatan juo akan labiah gadang,” katonyo.
Dari pamantauan wartawan Gonjong.id di babarapo pasa memang lah ado nan mulai manggaleh caro online ko.
Takah di Pasa Ateh ntun bana, babarapo lapak bisa wak tamukan di babagai platform pasa digital. Baitu juo di Padang Panjang sarato Pasa Raya Padang.
“Cuma lun cukuik nan basobok di platform digital tu lapak lapak lokal. Sahinggo ka untuak kebutuhan harian tapaso juo wak pai ka pasa,” kato Eri (60) ibu rumah tangga nan tingga di Padang. (Tan Parpatiah)