Di suatu kampuang, di nagari Tanjuang Sungayang, di ranah Minangkabau yang rancak, tinggalah sakalompok masyarakaik nan tanamo sabagai Kaum Piliang, nan dipimpin dek Datuak Bandaro Kayo. Sang Datuak mamimpin jo arif nan bijaksano, ramah jo pamurah sahinggo baliau ko sangeklah disagani pulo dipatuhi dek kaumnyo.
Walaupun Datuak Bandaro Kayo tingga di rumah bininyo sabagaimano nan alah diatur dek adaik Minangkabau, namun sabagai pamimpin adaik, Datuak Bandaro Kayo bakuaso di Rumah Gadang keluarganyo. Di situlah kasado urusan kaum dimusyawarahkannyo. Kaumnyo sangek sanang karano Datuak berusaho meluangkan wakatunyo untuak mandangakan kaluah kasah rakyaiknyo. Ampia satiok hari Datuak ditamui dek kaumnyo, apokah untuak mengadu atau hanyo untuk babincang manimbo ilimu kapado Datuak.
Pado suatu malam, sasudah Datuak menarimo tamu terakhirnyo malam itu, Datuak Bandaro Kayo marabahkan badannyo untuak baistirahat. Baitu latiahnyo sahinggo langsuang Sang Datuak talalok bakaruah. Namun manjalang parak siang, Datuak Bandaro Kayo tajago dari laloknyo. Baliau baru sajo bamimpi. Mimpi yang mambueknyo cameh sahinggo malam tu baliau abihkan untuak bajalan kian kamari di dalam rumah gadangnyo.
Manjalang subuah, adiak padusi Datuak yang tingga di rumah gadang tu tajago untuak basiap sumbayang subuah. Inyo maraso heran dek perangai Datuak yang indak bantuak biasonyo. Biasonyo Datuak Bandaro Kayo kalaulah tajago dari laloknyo langsuang bauduak, sudah itu Datuak kan duduak-duduak maminum sagaleh kopi sambia manunggu azan subuah. Baju gunting cino, kopiah di kepalo dan kain saruang, lah rancak malakek di badannyo. Tapi subuah tu, adiak padusi Datuak mancaliak udanyo bamanuang di dakek jendela nan tabukak dalam kondisi alun barasiah untuak ka surau. Pancaliakannyo jauah bantuak ka menyapu kasado kampuang.
Adiak Datuak pun pai ka tampek Datuak sambia batanyo jo suaro lambek supayo udanyo ndak takajuik. “Ado apo ko, Uda, bantuaknyo Uda alum basiap untuak pai solat subuah. Coliaklah malam lah hampia abih, garin tantu indak lamo lai mangumandangan azan subuah. Dek aia tobek lah habih sahinggo Uda alun bawuduak?”.
Datuak hanyo mahelo anggoknyo manunjuakan bareknyo baban pikianyo di kepalo. Indak mancaliak kapado adiaknyo, Datuak manjawek, “Jadi, ambo akan poi basiap pai ka surau,” hanyo itu suaro yang kalua dari muluik Datuak sambia bajalan manuruni Rumah Gadang manuju tobek tompek inyo bawuduak.
Batua bana pakiroan adiak Datuak Bandaro Kayo, indak lamo siap tu tadanga suaro azan dari surau yang lataknyo ndak jauah dari Rumah Gadang Datuak Bandaro Kayo. Pagi yang aniang itu alah maantaan suaro azan yang indak ado pangareh suaro itu hinggo ka pinggia kampuang. Tiok masyarakat nan tabiaso solat subuah di surau pun bagageh manuju surau nan dikawanan dek sulu.
Datuak mamimpin solat subuah bantuak biasonyo. Sudah salasai mamimpin doa, inyo bagageh pulang ka rumah gadangnyo. Biasonyo sudah solat subuah Datuak babincang-bincang samo jamaah laki-laki sabanta. Tiok jamaah hanyo manakok–nakok dalam maota, biasonyo pagi itu Datuak nio pai ka tampek nan agak jauah atau mungkin juo Datuak punyo karajo nan harus dimulai samanjak subuah.
Sampai di rumah, adiak padusi Datuak capek manyambuiknyo jo sacangkia kopi angek dan goreng pisang nan baru sajo dibalinyo di lapau sabalah rumahnyo. Yang punyo lapau memang alah mamulai mambuek goreng pisang jo katan sabalun subuah sahinggo para lelaki alah kalua dari surau langsuang singgah untuak minum kopi di lapau tu jo goreng pisang angek dan katan nan lamak tu. Sasakali Datuak jugo ikuik bagabuang jo para laki-laki tu. Namun indak pagi tu, inyo hanyo maminum kopi angeknyo di rumah gadang sambia dikawanan adiak padusinyo.
“Ado apo, Uda, sajak tadi Uda cameh,” Adiak padusi Datuak indak talok manaruihan kato-katonyo. Udanyo kini adalah Datuak, pamimpin kaumnyo. inyo harus malatakan udanyo itu sebagai pemimpin kaum, indak sekedar saudara kanduang sajo. Mangecek dengannyo harus manggunoan kato mandaki, baitu pulo adat istiadat Minangkabau maatuanyo.
Datuak Bandaro Kayo mancaliak adiak padusinyo itu, inyo bapikia-pikia dalam banaknyo, harus lo inyo manyampaian katakuikannyo pado adiak padusi nan lah gadang tu. Sajanak balalu sang Datuak pun mamutuihan untuak manyampaian katakuikannyo.
“Samalam ambo bamimpi, tapi bantuaknyo nyato hinggo ambo tajago.”
Datuak maingekan mimpinyo, “Ambo didatangi dek urang tuo nan banamo Syekh Ahmad. Ambo indak pernah mangenal baliau sabalum iko”.
Datuak Bandaro Kayo malanjuikan tanpa dipotong dek adiaknyo.
“Syekh Ahmad mamintak ambo supayo kampung kito iko diagiah bateh dan dinamoan Kampuang Palangan.”
Datuak taanok sasudah mancaritoan mimpinyo. Manyadari udanyo taanok sambia bapikia, adiak padusi Datuak batanyo, “Sudah tu, apo Datuak mampacayoi mimpi itu?, kalau iyo bana itu Datuak tingga mamusyawarahannyo jo patinggi kaum kito”.
“Yo, ambo raso indak ado nan salah dari mimpi itu, ambo pacayo ka mimpi ambo malam tadi. Itu patunjuak yang batua, tapi menuruik kau, Piak, apokah para patinggi kaum kito akan pacayo jiko ambo caritoan mimpi iko kapado kasadonyo?” tanyo Datuak jo wajah ragu.
Inyo malanjuikan, “Jan-jan ambo dianggap gilo dek lah mampacayoi mimpi. Apolai, siapo pulo itu Syekh Ahmad? Ambo pun alum pernah mengenalnyo.”
“Uda, setahu ambo salamo ko, Uda ndak pernah baduto, kaum kito indak pernah mandapati Uda basifat khianat, dek itu inyo kasadonyo taruih mamintak pandapaik Uda dalam satiok pasoalan kasadonyo. Inyo bahkan acok mamintak Uda manyimpan rahasio inyo dan hinggo kini indak ado urang yang kecewa. Ambo yakin inyo akan pacayo jiko Uda mancaritoan mimpi iko kapado kasadonyo,” urai adiak Datuak mamompa samangaik sang Datuak.
Kato adiak padusi Datuak babuah, sang Datuak tibo-tibo bantuak mandapaikan tambahan energi. “Iyolah, Piak, beko sore siap solat Magrib, ambo kumpuan para patinggi kampuang di rumah kito iko. Ambo akan mamintak pandapaik kasadonyo manganai hal iko,” ucap Datuak bantuak basemangaik.
Sore itu sasudah wakatu Asar, Datuak Bandaro Kayo manyuruah kurir kaumnyo untuak mandatangi rumah para patinggi kaum untuak menyampaian undangan musyawarah. Samanjak sore itu juo babarapo mande-mande bantuak sibuk mambantu tuan rumah manyiapan hidangan untuak peserta musyawarah. Lapek bugih, godok pisang, rakik maco, jo beberapa makanan kecil khas Minang, inyo manyiapkan dengan riang.
Malam itu para undangan pun tibo. Sudah itu, diawali jo sambah kato dan petatah petitih pambuka kato dari para patinggi kaum, sampailah pada pokok pembicaraan mengenai mimpi Datuak Bandaro Kayo. Sang datuak mauraikannyo jo gamblang, sasudah itu mamintak pandapaik para peserta musyawarah.
“Wahai, Datuak Bandaro Kayo yang bijaksana, saketek pun kami indak maraguakan mimpi Datuak nan alah disampaian. Namun, kok buliah ambo mangamukoan pandapaik, bukankah kampuang kito iko alah ado sajak kito alum ado. Tanah nan diagian Tuhan iko, alah kito karajoan sacaro turun-temurun. Sebagiannyo kito jadian pamukiman, sebagiannyo tampek kito basawah jo baladang. Alah jaleh tanah nan ma punyo inyo. Paralu lo kito memancang untuak maagiah bateh kampuang? Ado jo namo kampuang emang salamo iko urang mangana kampuang kito sabagai kampuang urang Piliang. Alum diagiah namo salain namo kaum kito sebagai yang punyo kampuang iko,” baitu salah satu patinggi kaum yang dikenal jo cadiak pandai maagiah pandapaik.
Mandanga pandapaik iko, peserta musyawarah nan lain tacaliak maangguak-angguaan kapalo patando paham dan mungkin sapandapaik. Indak lamo sasudah itu, pandapaik lain mangamuko, “Wahai, Datuak Bandaro Kayo yang didahulukan salangkah, manuruik ambo, maagiah bateh kampuang kito emang paralu kito lakuan, maingek kito hiduik bakaturunan dan kampung lain pun model itu. Kini ko jumlah kito masih saketek, masih bisa ditampuang di tanah pamukiman iko, tapi sapuluah atau dua puluah tahun ka muko, mungkin tanah pamukiman iko alah panuah sasak sahinggo anak cucu kito paralu mambuek rumah di bukit situ. Sabagaimano inyo sadonyo dapek mambuek pamukiman di situ, jiko bukik itu indak barado di dalam bateh kampuang kito. Mungkin kampuang lain akan maraso juo memiliki bukit itu, sadangkan sawah jo ladang kito indak akan kito agiahan untuak dibuek pamukiman karano tanah itulah yang mahiduikan kaum kito dari generasi ka generasi”.
“Wahai, Datuak, ambo sapandapaik jo usul iko,” kecek peserta musyawarah dari alim ulama.
“Bateh wilayah memang persoalan yang penting supayo dalam waris mewarisi, kito indak mangalami karaguan. Baa kito bisa mawariskan harato pusako nan indak jaleh kito nan punyo,” sambuangnyo maagiah panjalehan.
Untuak usul iko pun, peserta musyawarah nan lain maangguak satuju. Datuak Bandaro maraso forum satuju karano indak ado nan mambantah.
“Baiklah, Niniak mamak, alim ulama, jo cadiak pandai nan hadir, ambo kiro kito satuju jo pandapaik iko. Jadi, nan mano jo bateh wilayah kampuang kito iko?” tanyo Datuak Bandaro Kayo.
Babagai pendapaik pun babunyi dalam musyawarah itu hinggo tacapai kato mufakat. Malam itu juo disepakati kampuang iko diagiah namo Kampung Palangan sasuai jo amanaik Syekh Ahmad dalam mimpi Sang Datuak. Pamancangan bateh wilayah akan dikarajoan hari Senin muko nan dianggap sabagai hari elok.
Hari senin nan alah ditetapkan dalam musyawarah pun tibo. Undangan untuak dikarajoan goro massal pun alah disampaian kapado satiok kapalo keluarga. Para penduduk dimintak untuak mangosongan kegiatannyo hari itu. Seluruh penduduk dari Kaum Piliang bakumpua untuak mamulai gotong royong. Sasudah itu, pambagian karajo dijalehan, tiok-tiok urang sacapeknyo malakuan tugasnyo masiang-masiang.
Akhianyo dari gotong royong itu, panancapan bateh kampuang untuak Datuak Bandaro Kayo di ampek panjuru mato angin. Bateh kampuang ditandoi jo Batang Baringin. Oleh karano itu, dibueklah lubang di tanah tampek akan ditanamnyo Batang Baringin.
Sabalun matohari tapek di ubun-ubun, gotong royong salasai. Para penduduk baliak ka Rumah Gadang Datuak Bandaro Kayo untuak baristirahat sambari makan siang yang alah disedioan dek padusi. Sabalun makan siang, Datuak Bandaro Kayo mamintak wakatu sabanta untuak maagiah pangumuman penting.
“Sasuai jo amanah dari Syekh Ahmad dalam mimpi, alah ambo musyawarahkan jo para patinggi kaum kito, bahwasanyo kampuang yang alah kito pancangkan bateh-batehnyo iko, mulai hari ko kito agiah namo Kampuang Palangan,” bagitu inti pidato Datuak Bandaro Kayo nan disambuik kaumnyo jo gadang hati. Samanjak itu kampuang Kaum Piliang iko dikana jo namo Kampuang Palangan.
Indak lamo sasudah masyarakat bubar dari patamuan, tajadilah gampo, lalu turunlah hujan gerimis di tongah teriknyo matohari. Penduduk setempat menyabuiknyo hujan paneh nan dipacayoi sabagai patando kurang elok. Biasanyo hujan paneh tajadi indak sampai sajam sahinggo penduduk pun baranggapan kali ko pun damikian.
Namun, anggapan penduduk indak sacapeknyo tawujuik, hujan paneh balangsung sapanjang siang salamo ampek baleh hari. Panduduk Kampuang Palangan nan baru diresmikan itu manjadi khawatir, indak takacuali Datuak Bandaro Kayo. Sang Datuak dihantui raso basalah. Salamo ampek baleh hari itu Datuak hanyo puta-puta di Rumah Gadangnyo manunggu kabar baik ataupun buruak nan akan disampaikan kaumnyo kapadonyo. Tapi salamo itu, indak satu pun kaum Piliang nan barani kalua rumah. Sadonyo mamiliah untuak bakuruang di rumah masiang-masiang.
Hari kaampek baleh Datuak Bandaro Kayo mamutuihan untuak mancabuik kembali Batang Baringin yang talanjua ditanam sabagai bateh wilayah kampuang. Inyo ka situ jo dikawanan dek babarapo patinggi kaum nan sabalumnyo alah diajak barembuk. Baitu pulo baringin patamo akan dicabuik, tibo-tibo dari arah aka baringin, tadanga suaro, “Wahai, Datuak Bandaro Kayo, indak paralu cameh, sabanta lai cuaca baliak cerah. Ketahuilah wahai, Datuak, di sakitar siko ado sabuah batu nan banamo Batu Pandapatan, batu iko bisa kalian mintak pandapaik tantang masa depan. Jiko kalian mamiliki keinginan nan elok-elok, ungkapkanlah pado batu itu, niscaya batu itu akan maagiah petunjuk nan batua. Ingeklah, Datuak, batu iko indak buliah dipacik dek urang- urang nan kumuah, oleh sebab itu, Datuak, paliharolah batu iko elok-elok,” bagitu suaro itu bapasan.
Datuak Bandaro Kayo jo para patinggi kaum nan basamonyo hanyo tadiam katakuikan mandanga suaro itu. Sasudah suaro itu mahilang, bantuak dikomandokan sesuatu, masiang-masiang urang mangarik mancari batu nan dimakasuik di sekitar tampek mereka tagak. Mereka mangamati tanah, menyiangi rumput, hinggo manggali tanah untuak manamukan batu itu. Datuak Bandaro Kayo nan akhianyo manyuboan sabuah batu aneh, babantuak sarupo badan kura-kura. Pungguang batu itu bawarna kecoklatan, sadangkan sisi sabalahnyo nan datar bawarna itam. Ado bulatan cekung di tangahnyo. Adopun pinggiran batu iko bawarna tambago. Batu iko hanyo sagadang batu lado. Diameternyo sakitar tigo puluah centimeter. Alum pernah ado batu nan sademikian indahnyo mereka temukan salamo iko. Sajanak inyo takagum-kagum mangamati batu itu.
“Datuak Bandaro Kayo nan arif bijaksana, sebaiknyo kito segera membawa batu iko pulang. Namun sebelum itu, alangkah baiknyo batu iko kito bersihkan dulu di selo, baru kito bawo dan kito agiah tau kapado masyarakat,” saran salah satu patinggi kaum nan ikuik basamo Datuak Bandaro Kayo.
Pandapaik itu disetujui dek sado nan hadir. Lalu, Datuak Bandaro Kayo maangkek batu iko jo hati-hati. Tapi, alangkah takajuiknyo Datuak Bandaro Kayo, batu iko indak baranjak saketek jo dari tampeknyo. Datuak mangaluaan sado tanagonyo untuak maangkek batu itu, tapi batu tetap indak bagamiang. Jangankan diangkek, digeser pun indak bisa. Datuak Bandaro tacangang-cangang duduak di dokek batu, paluahnyo bacucuran mambasahi baju.
“Batu itu sangek barek, ambo ndak talok maangkeknyo do. Cubolah dek kalian nan masih mudo-mudo dan kuek, mungkin ambo alah talalu tuo,” kecek Datuak Bandaro Kayo manyarah.
Bagantian inyo kasadonyo nan jumlahnyo balimo mancubo maangkek batu itu. Hasilnyo indak babeda jo usaho Datuak Bandaro Kayo. Akhianyo, inyo sapakek maangkek batu itu basamo-samo, tapi alangkah kecewanyo inyo sebab batu itu indak bisa inyo angkek.
“Mungkin batu iko memang harus di siko, Datuak, indak buliah kito bawok pulang ka Rumah Gadang,” pandapaik salah satu patinggi kaum.
“Bagimano kito bisa mamaliharonyo jiko inyo barado jauah dari pamukiman kito sehari-hari?” kecek yang lain.
“Apo rumah Gadang nan harus kito pindahan ka siko, Datuak,” tanyo nan lain pulo.
Datuak Bandaro Kayo hanyo taanok. Inyo mamuta utaknyo untuak mamacahan teka-teki nan dimunculkan Batu Pandapatan. Inyo ingek-ingek lai amanah nan disampaian suaro tadi. Namonyo Batu Pandapatan, dapat dimanfaatkan untuak mamintak pendapat, harus dipaliharo elok-elok dan ha, Datuak Bandaro kayo bantuak mandapek ilham dari pikirannnyo surang.
“Kito sadonyo alah panek bahusaho sajak tadi. Badan kito panek dan berkaringek. Padahal, batu iko indak buliah didakekan dek urang-urang nan kumuah. Alangkah eloknyo jiko kito dulu nan mandi dan bawuduak di selo, baru batu iko nan kito barasihan di situ,” ucap Datuak dengan arif.
Perkataan Datuak disambuik dek anggukan tando satuju. Lalu, inyo balimo pai ka selo untuak mambarasihan badan masiang-masiang dan bawuduak.
Katiko inyo alah yakin bahwasanyo badan inyo indak kumuah lai, inyo baliak ka tampek Batu Pandapatan disobokan. Maulang baliak usaho tadi dimulai dari Datuak Bandaro Kayo. Tanyato batuah pamikian Datuak Bandaro Kayo, baitu inyo maangkek Batu Pandapatan, batu itu langsuang taangkek dek barek sabagaimano layaknyo batu gadang itu. Jo gadang hati, inyo kasadonyo mambawo batu iko ka selo dan membarasihannyo jo hati-hati. Batu semakin terlihat bersinar. Di panghujuang siang batu itu tibo di tampeknyo nan baru, yaitu Rumah Gadang Datuak Bandaro Kayo.
Hujan paneh alah baranti, masyarakat mancaliak dari rumah-rumah inyo rombongan Datuak Bandaro Kayo pulang mambawok sesuatu. Masyarakat pun baduyu-duyun datang ka rumah Datuak Bandaro Kayo. Tanpa paralu mangumuman undangan lai, Datuak Bandaro Kayo tagak di pintu muko rumahnyo dan bapidato.
“Batu iko banamo Batu Pandapatan, kami sobokan di dokek pancangan bateh kampuang kito iko atas amanat sebuah suaro dari lubang pancangan di Batang Baringin. Batu iko dapek kito manfaatkan untuak mamintak pandapek tentang apo nan akan kito karajoan atau nan akan kito karajoan. Jiko kalian punyo hajat, cito-cito atau pilihan-pilihan nan meragukan, tibolah pado Batu Pandapatan iko. Ingeklah bahwasanyo Batu Pandapatan indak buliah didatangi dek urang-urang nan kumuah. Mako sabalun kalian mendatanginyo, sucikan badan kalian, ucapkan keinginan kalian, sasudah itu angkek Batu Pandapatan ka pangkuan. Jiko kalian talok maangkek batu iko, bararti hajat kalian akan talaksana, cito-cito kalian akan takabua, ataupun pilihan kalian adolah pilihan nan elok. Namun jiko kalian indak talok maangkeknyo, bararti hajat kalian indak akan talaksana, cito-cito kalian indak akan tacapai, dan pilihan kalian berarti indak pilihan nan elok. Oleh karano itu, hajat itu indak paralu ditaruihan, ubah cito-cito kalian dan piliahlah pilihan nan lain, barangkali itulah nan tabaiak untuak kalian,” Datuak Bandaro Kayo manarangkan kapado kaumnyo tantang Batu Pandapatan.
Kaum Piliang maangguak-angguak mandanga panjalehan dari Datuak Bandaro Kayo. Tantu sajo ado nan langsuang pacayo, ado nan ragu-ragu, dan ado pulo nan indak pacayo samo sakali jo kasaktian Batu Pandapatan. Apo pun kondisi inyo, tiok-tiok inyo panasaran ingin mancubo mangangkek Batu Pandapatan, tapi inyo mamatuhi Datuak Bandaro Kayo tantang tata caro maangkek batu itu.
Yang yakin dirinyo indak kumuah sacapeknyo mangantri untuak mancubo maangkek batu itu. Kegiatan itu balangsung salamo tigo hari hinggo indak ado penduduk Kampuang Palangan nan alum mancubo maangkeknyo. Ketek gadang, tuo jo mudo, sado alah mancubo maangkek batu itu. Ado nan bisa maangkeknyo, mako inyo kasadonyo pulang dengan puas dan penuh harapan. Ado juo nan indak bisa maangkek batu itu saketek jo, mako inyo kasadonyo akan pulang jo perasaan kecewa.
Tasabuiklah surang pamudo badan gadang dan tinggi, inyo takana sabagai tukang angkek kayu nan ditabang di hutan. Dengan sombongnyo, inyo mengungkapkan kapado penduduk bahwasanyo inyo pasti mampu maangkek batu ketek itu. Inyo pun mancubo maangkek batu itu dengan pacayo diri. Tapi dengan upayo apo pun nan inyo lakuan untuak maangkek Batu Pandapatan, batu itu indak mangarik. Inyo baliak jo sumpah serapah karano malu. Samanjak itu, inyo mahilang dari Kampung Palangan. Indak jaleh kamano hilangnyo. Penduduk kampuang mampacayoi inyo alah hilang di bawa Syeh Ahmad nan punyo Batu Pandapatan.
Demikianlah batu iko taruih dimintak pandapaik dek kaum Piliang di Kampung Palangan. Oleh Datuak Bandro Kayo, Batu Pandapatan dilatakan di ruang tangah rumah gadangnyo. Batu iko dialeh jo kain putiah barasiah. Indak hanyo mambarasihan badan sabalun manyobokan batu, inyo kasadonyo pun tabiaso mandahului ritual ‘mintak pandapaik’ kapado Batu Pandapatan dengan mangecek salam dan solawat nabi.
Maso demi maso pun balalu, baitulah batu itu kamudian dijago sacaro turun-tamurun oleh keturunan Datuak Bandaro Kayo, dan masyarakat taruih sajo ado nan datang untuak sakedar mancaliak, memegang atau maangkek batu itu. Hinggo suatu maso daerah Sumatera Barat dijajah oleh bangsa Bulando. Indak luput Kampuang Palangan pun didatangi Belanda.
Penjajah Belanda tak ayal pun mandapek berita bahwasanyo di Kampuang Palangan tadapek batu unik. Bangso Balando nan rakus dan haus kekayaan manganggap batu unik itu bisa dijua jo harago tinggi. Mako inyo kasadonyo pun mandatangi Kampung Palangan untuak marabuik Batu Pandapatan dari kaum Piliang.
Sudah manjadi karakteristik Kaum Piliang pantang menyerah, inyo kasadonyo batekad untuak mampartahankan kakayoan nagarinyo itu sakalipun dengan mampataruhan nyawo mereka. Balando jaleh adolah bangso panjajah. Apo pun caronyo akan mereka tampuah untuak mandapekan keinginan mereka . Mako parang antaro Kaum Piliang jo Balando indak bisa dielakan. Rumah Gadang Datuak Badaro Kayo jadi sasaran penyerbuan. Balando nan mampunyoi paralatan parang nan labiah modern indak manggunoan wakatu lamo untuak manaklukkan Kaum Piliang dan mandapekaan kainginannyo. Kaum Piliang baharok Batu Pandapatan batahan di tampeknyo. Dek itu bangso Bulando alum tantu barasiah.
Tetapi dugaan Kaum Piliang maleset, batu itu berhasil dibawok kabur urang Balando. Kaum Piliang manganggap itu mungkin alah suratan Batu Pandapatan harus bapindah tangan. Penduduk Kampuang Pilangan itu pun berduka, mereka manyasa tahadok sikap mereka nan mereka pikia indak sunguah-sungguah marawat Batu Pandapatan.
Keesokan harinyo masyarakat Kampuang Pilangan dikajuikan dek barita gadang hati nan barasa dari rumah Gadang Datuak Bandaro Kayo. Katurunan Datuk Bandaro Kayo nan menjadi pamimpin kaum saat iko mangumumkan bahwasanyo Batu Pandapatan alah baliak ka tampek samulo. Masyarakat pun sontak batanyo-tanyo, siapokoh nan alah berhasil mambaliakan batu iko? Indak ado surang jo nan talok manjawek pertanyaan, karano emang indak ciek jo dari mereka nan mengetahuinyo. Mereka hanyo biso menyimpulkan bahwasanyo batu itu pulang surang. Apo pun kajadiannyo masyarakat mamiliah untuak mansyukurinyo. Samanjak peristiwa itu, Batu Pandapatan baliak ‘bakuaso’ di Rumah Gadang Datuak Bandaro Kayo. Era modern masuak ka Kampung Palangan tanpa biso dibarantian. Hal iko mampangaruhi pola pikia masyarakat. Di sampiang itu kaum ulama pun gencar mamparbaiki akidah masyarakat. Masyarakat akhianyo manyadari bahwasanyo Datuak Bandaro Kayo bukanlah nabi nan mendapek wahyu. Kalaupun ado paristiwa aneh nan dialaminyo, bisa jadi adalah perbuatan jin. Meramal adalah perbuatan syirik nan nyato. Meramalkan nasib dengan perantaraan batu indak pernah diajarkan oleh Rasulullah Saw. Padahal adatnyo Minangkabau adalah basandi syarak dan syarak basandi kitabullah. Kegiatan mamintak pandapaik kapado batu jaleh indak sajalan dengan falsafah ini. Lamo kalamoan Batu Pandapatan sepi pangunjuang. Jiko pun ado hanyo untuak mancaliak-caliak sebagai objek wisata.
