Padang — Agak takajuik juo penumpang kapatabang nan manjadi pemudik kutiko mandarek di Bandara Minangkabau, disambuik jo tari Minang.
“Ondeh iko sabana surprise untuak kami, taraso jadi tamu aguang bana tibo di kampuang,” kato R Fitrah jo rang rumah sarato anaknyo nan baru tibo dari Jakarta sahari manjalang Rirayo.
Manajemen PT Angkasa Pura nan mangelola lapangan kapatabang antar bangsa di Katapiang Padang Pariaman ko memang maagiah nuansa baru manyambuik parantau jo tari tradisional. iko maagiah pangalaman bagi parantau nan pulang ka ranah Minang.
Komisaris Independen Angkasa Pura Indonesia, Imelda Sari nan juo rang awak nyun, manyampaikan raso kagumnyo katiko maninjau BIM pado hari Salasa (17/3/2026).
Keceknyo, suasana di bandara kini taraso labiah elok dan maagiah kabanggaan khusus kapado masyarakaik parantau nan pulang kampuang.
Imelda manilai baso sambutan budaya nan dimulai pado sapakan manjalang Idul Fitri adolah langkah positif untuak mamparancak pangalaman kadatangan panumpang.
Salain manyajikan tari-tarian tradisional, manajemen BIM juo manyadiokan takjil gratis untuak panumpang nan mandarek pado wakatu babuko puaso.
Kegiatan maagiah takjil iko alah bajalan sajak awal Ramadhan untuak mambantu panumpang nan tibo dakek ka babuko.
Imelda Sari sato lo mambagikan takjil lansuang ka panumpang.
“Alhamdulillah, lah babuko kami karano disadiokan dek patugeh bandara ko. Kok dapek keramahtamahan ko jan kutiko puaso jo rirayo ko sajo tapi dilanjuikan di hari hari barikuiknyo,” kato Itet salah surang panumpang nan baru turun dari kapatabang hari Salasa ntun. (Tan Parpatiah)
Turun Kapatabang, Parantau Disambuik jo Tari Minang di BIM
