Padang – Indak akan ado toleransi untuak pagawai-pagawai Pemprov Sumbar nan talibat dalam penyalahgunaan narkoba. “Sabagai pagawai negara, ambo mintak ASN bisa manjadi panutan bagi masyarakat, bukan sabaliaknyo. Kalau ado ASN nan talibaik dalam narkoba, kami akan maagiah sanksi nan kareh, dan bahkan ado kamungkinan urang nan basangkutan bisa dipecat. ASN adolah pagawai negara, mereka harus manjadi contoh bagi masyarakat,” tegas Gubernur Mahyeldi Ansharullah kutiko menghadiri pemusnahan barang bukti kejahatan narkoba di Mapolda Sumbar hari Salasa (3/3/2026).
Polisi Sumbar mamusnahkan barang bukti metamfetamin nan bareknyo labiah dari 6,4 kilogram.
Mahyeldi magiah apresiasi ateh kinerja Polda Sumatera Barat dalam mangungkap jaringan distribusi narkoba skala gadang. Inyo baharok jo sinergi lintas sektor jumlah distribusi narkoba di Sumatera Barat dapek taruih bakurang dari wakatu ka wakatu.
“Perdagangan narkoba nan marak di Sumbar harus dibasmi sacaro langsuang. Kito indak buliah lengah. Iko ancaman nyato untuak generasi mudo kito,” katonyo.
Manuruiknyo, mambasmi narkoba indak cukuik hanyo maambiak tindakan hukum, tapi harus pulo dikuekkan malalui pandidikan jo pencegahan di sakolah jo nagari-nagari.
“Narkoba adolah musuah basamo. Sagalo pihak harus talibat, mulai dari pamarentah, pejabat, tokoh adat, tokoh agamo, sampai ka kaluarga,” katonyo.
Samantaro itu, Wakil Kapolda Sumatera Barat, Brigjen Pol Solihin, manjalehan baso sapanjang bulan Februari 2026, Direktorat Narkoba Polda Sumatera Barat alah mangungkap tigo kasus nan menonjol jo total limo tersangka.
Duo kasus tajadi di wilayah Bandara Internasional Minangkabau, Kabupaten Padang Pariaman, nan ciek lai kasus di Kota Padang. Dari katigo kasus ko, 33 bungkuih metamfetamin kristal disita jo barek total labiah dari 6,4 kilogram.
Manuruiknyo, pangungkapan ko adolah langkah tegas dalam manyalamaikan hiduik ribuan urang dari ancaman narkoba. Kepolisian Daerah Sumbar akan taruih batindak sacaro profesional dan tanpa kompromi taradok jaringan perdagangan narkoba haram dan maajak sado elemen masyarakat untuak bakarajo samo untuak mamutuihan rantai. (Tan Parptiah)
Pakai Narkoba? Ndak Ado Ampun untuak Pagawai Sumbar
