Satu hari kami diundang mandoa akikah ka rumah kawan nan baru malahiaan. Dek kami diundang jo rombongan kantua, pailah kami basamo-samo manjalang makan siang. Dek karano acara jam karajo, kami indak bisa bagabuang salamo acara mandoa. Rombongan kami mulo-mulo mancaliak urang gaek jo anak bayi nan padusi nan elok bana lakunyo.
Sasudah bacarito, kami dihidang makan takah urang baralek, maambiak surang-surang, sudah tuh makan di meja makan nan alah disiapan. Katiko kami makan di lua, tuan rumah alah hidang-mahidang makanan di ateh rumah. Maaleh lantai jo kain putiah panjang, manyusun piriang baisi samba dari ujuang ka ujuang.
Susun-manyusun sama ko di Minangkabau ado caronyo. Dulu katiko di kampuang, takana dek badan diri ambo katiko manolong urang gaek manyusun samba untuak ka dihidang acara baralek. Dari ujuang ka ujuang basusun samba ko silang-basilang. Sapiriang randang, sapiriang gulai cubadak, sapiring ayam balado, sapiriang paragede, sapiriang ikan balado, sapiriang samba lado uok, sapiriang ayam bumbu, sapiriang mi goreng. Di ateh piriang-piriang ko, basusun pulo bajarang-jarang pisang, raga-raga, buah, jo kue ikan.
Dek urang daulu ado filosofi baa kok disusun silang-basilang samba ko. Dek karano indak manguasai filosofi itu, nan ambo kana hanyo caro silang-basilang sajo bia urang nan makan bisa langsang maambiak samba jo kawan samba dakek-badakek. Baitu pulo parabuang nan basusun di ateh samba ko, bisa dijangkau langsuang, indak manggaduah urang suok jo kida.
Kato parabuang ko nan tadanga dek ambo katiko sudah makan, tibo-tibo di meja kami diantaan pisang nan gadang-gang, pisang urang baralek gadang jo kue ikan.
“Makan dulu parabuang, Ibuk-ibuk,” kecek urang gaek kawan maantaan ka tampek kami ciek-ciek.
Dek makan di lua, samba jo parabuang ko indak basusun takah di dalam rumah nan ka dimakan dek urang pandai atau urang masajik nan diundang untuak mandoa akikah ka rumah. Parabuang ko aratinyo makanan ringan nan dimakan sasudah makan barek atau makan nasi. Dek anak Gen Z kini namonyo camilan, tapi fungsi parabuang ko sacaro adaik babeda jo camilan. Katiko awak manyabuik camilan, indak sampai mukasuik adaik nan ado dibaliak kato camilan ko. Tapi kok basabuik parabuangan, ado nilai adaik nan malakek ka kato parabuang ko. Nilai adaik nan manunjuakan tarimo kasih ateh doa nan diagiah tamu ka rumah nan maundang.
Dek nilai adaik itu pulo, ado pepatah takaik parabuangan ko.
atok lakek parabuang tibo,
tingga di tukang mamasang
Pepatah ko samacam baso-basi untuak urang nan diundang supayo nio makan kue sasudah makan nasi dalam jamuan. Tamu nan diundang pantang maambiak parabuang nan tahidang sabalun disuruah tuan rumah. Untuk mambasoan ka tamu nan tibo, disampaian dek tuan rumah pepatah ko ka urang rami. Mandanga ko biasonyo tamu galak sanang mandanga urang rumah alah mampasilakan nan tibo mangicok nan dihidang. Baitu bana baso-basi urang Minang, maragoi urang nan diundang ka rumah.
