Ranah jo Rantau: Duo Sisi dari Satu Kabudayaan
Oleh: Jasman Rizal, Dt. Bandaro Bendang
Sekretaris Umum LKAAM Sumatera Barat
Bagi ambo, hubungan ranah jo rantau dapek dirumuskan dalam konstruksi nan sederhana:
Ranah adolah urek, rantau adolah ruang batumbuah.
Ranah mambari identitas, rantau mambari pengalaman.
Ranah mambari nilai, rantau maujinyo dalam kehidupan nan sabananyo.
Rantau mampalaweh dunia, ranah manjago arah.
Dek karano itu, perantau Minangkabau indak musiti dipahami sabagai masyarakat nan tercerai-berai ka babagai tampek. Labiah tapek jiko kito mancaliaknyo sabagai suatu kabudayaan nan mampunyoi kemampuan untuak mamparlaweh ruang iduik malalui tradisi marantau. Urang Minangkabau dapek hadir di banyak tampek. Tapi kehadiran tu indak musiti bararti putuih jo ranah.
Mako, kutiko ambo mangatokan, “Ambo indak satuju perantau Minangkabau disabuik diaspora,” nan ambo maksud bukannyo sakadar kaberatan terhadap satu kato. Ambo sedang mampatahankan caro pandang terhadap urang Minangkabau. Ambo indak ingin urang Minangkabau di rantau hanyo dipahami sabagai komunitas nan tasabar dari tanah asanyo.
Ambo ingin inyo dipahami sabagai perantau; sabuah konsep nan mampunyoi sajarah, filosofi, sistem sosial, jo hubungan nan khas jo ranah. Sabab urang Minangkabau indak sakadar pai. Inyo marantau. Jo marantau bukannyo sakadar bapindah tampek.
Inyo mambao identitas, mambao nilai, mambao adat, baraja dari dunia, baradaptasi, mambangun kehidupan, jo pado waktunyo tatap mampunyoi jalan untuak pulang. Dek karano itu, mangganti istilah “perantau Minangkabau” jo “diaspora Minangkabau” tanpa mampertimbangkan makna lokal, barisiko mambuek reduksi konseptual terhadap kabudayaan Minangkabau.
Marantau Adolah Etos jo Budayo Urang Minangkabau
Dalam kabudayaan Minangkabau, marantau bukannyo sakadar aktivitas bapindah tampek untuak mancari karajo. Marantau adolah bagian dari proses mambantuak diri seorang laki-laki Minangkabau. Hal tu sangaik kuaik tacamin dalam papatah-patitiah adat:
Karatau madang di hulu,
Babuah babungo balun,
Karantau bujang dahulu,
Di rumah paguno balun.
Ungkapan ko sacaro harfiah manggambarkan batang madang nan tumbuah di hulu, tapi balun babuah jo balun babungo. Kudian dianalogikan jo surang bujang nan masih barado di kampuang. Makna filosofisnyo sangaik dalam. “Karantau bujang dahulu” bukannyo bararti adat mamintak satiok anak mudo musiti maninggakan kampuang. Maknonyo adolah baso seorang laki-laki mudo paralu mancari pengalaman, ilmu, kemampuan, jaringan, jo kemandirian di lua lingkungan asanyo.
Sedangkan “Di rumah paguno balun” bararti salamo seseorang masih mudo, balun mampunyoi pengalaman jo kemampuan, kaadoannyo di rumah balun banyak mambari manfaat ka keluarga jo masyarakat. Jadi, rantau adolah ruang untuak mambantuak kualitas diri.Anak mudo pai bukannyo dek kampuang indak pantiang. Justru inyo pai jo harapan, pado suatu maso, inyo akan pulang mambao pengalaman, ilmu, keberhasiaan, jo martabat untuak kampuang halaman.
Ado pulo ungkapan: “Padi indak gadang di pasamaian.” Kalau dikaitkan jo tradisi marantau, filosofinyo sangaik menarik. Padi indak ka manjadi gadang hanyo dek karano barado di tampek asanyo. Inyo mambutuahkan tanah nan baik, aia, pangolahan, pamaliharaan, jo proses di tampek lain. Baitu pulo manusia. Seseorang indak otomatis manjadi hebat hanyo dek karano lahia di kampuang nan baiak. Inyo musiti manjalani proses kehidupan.
Dek karano itu, marantau dalam pandangan Minangkabau dapek dipahami sabagai perjalanan dari katagantungan manuju kamandirian, dari indak tahu manuju pengalaman, jo dari seorang anak mudo manjadi manusia nan mampunyoi “isi” untuak dibao pulang ka masyarakat. Tradisi marantau adolah kabanggaan sabuah keluarga. Sabuah keluarga akan makin dihargoi kalau ado anggota keluarganyo nan pai marantau.
Dapek dikatokan, perantau adolah status sosial nan dipandang tarhormat dalam masyarakat Minangkabau. Apolagi sasudah inyo marantau, berhasia dalam kehidupan, jo acok pulo manolong keluarga jo kampuang halaman. Ko adolah sesuatu nan sangaik mambanggakan keluarga, kaum, jo nagarinyo.
Sabagai catatan, perantau Minangkabau tasabar di saluruah dunia. Konon jumlah perantau Minangkabau hampia samo banyaknyo jo urang nan ado di ranah. Namun, perhitungan statistiknyo sacaro analitik memang balun ado. Nan ado baru dalam bentuk perkiraan.
Perantau adolah aset nagari, nan sangaik banyak mambantu kamajuan kampuang halaman masing-masing. Perantau sangaik bapangaruah terhadap indeks perekonomian nagari. Pernah pulo dihitung, salamo Lebaran, parputaran pitih labiah dari Rp3 triliun, bahkan dapek labiah dari itu.
Balum lai dalam kehidupan sahari-hari. Para perantau salalu mangirimkan pitihnyo sacaro rutin ka ranah, ka dunsanak, ka organisasi di kampuang, sahinggo parputaran perekonomian dapek bajalan jo baik.
Panutuik kato
Jan kahilangan kato, jan kahilangan makna. Bahaso bukannyo hanyo alat komunikasi. Tapi bahaso adolah tampek sabuah masyarakat manyimpan ingatan, pengalaman, nilai, jo caro mamandang dunia. Dek karano itu, kutiko sabuah istilah diganti jo istilah nan lain, nan barubah bukannyo hanyo kato. Bisa jadi, caro pandang kito terhadap kabudayaan juo ikut barubah.
Ambo memilih tatap manggunokan istilah “perantau” untuak urang Minangkabau nan marantau, bukan “diaspora Minangkabau”. Bukannyo dek karano ambo manulak istilah diaspora. Tapi dek karano ambo yakin baso diaspora jo perantau Minangkabau bukannyo duo istilah nan sapanuahnyo sinonim.
Diaspora adolah konsep akademik nan baguno untuak manjalehkan penyebaran suatu komunitas. Diaspora dalam pangartian klasik banyak dibangun di ateh pengalaman dispersal, displacement, separation, jo reconstruction of identity. Sedangkan marantau adolah konsep kabudayaan nan lahia dari pengalaman budaya urang Minangkabau itu surang.
Marantau Minangkabau mampunyoi dimensi nan balain. Dalam tradisi Minangkabau, pai ka rantau justru manjadi salah satu mekanisme dalam mambantuak kadewasaan jo kamandirian. Marantau adolah etos urang Minangkabau nan alah manjadi budaya salamo barabad-abad.
Dek karano itu, jan buru-buru mangganti perantau jo diaspora hanyo dek karano kato diaspora tadanga labiah modern. Sabab di baliak kato rantau ado perjalanan panjang kabudayaan Minangkabau. Jo di baliak kato perantau ado manusia nan pai tanpa musiti kehilangan aka.
Padang, 13 September 2026
