Jan Manganti Rantau jo Istilah nan Balain Mukasuik
Oleh: Jasman Rizal, Dt. Bandaro Bendang
Sekretaris Umum LKAAM Sumatera Barat
Pambukak Kato
Ado suatu kakobeh nan akia-akia ko manarik parhatian ambo: urang Minangkabau nan iduik di lua ranah mulai makin acok pulo disabuik sabagai diaspora. Dalam barbagai kasampatan, ambo acok pulo manulak sacaro kareh kalau ado nan mangatokan baso urang Minangkabau nan pai marantau tu adolah diaspora. Malahan kadang-kadang ado nan manilai ambo talampau kareh dalam manyampaikan panolakan tu.
Mungkin salamo ko ambo basuaro kareh manulak tanpa alasan nan cukuik logis jo akademis. Dek karano itu, sakali ko ambo mancubo manjalehkan sacaro akademis, dari babagai sumber, manga urang Minangkabau nan marantau tu bukanlah diaspora.
Sanggahan ambo ko bukannyo samato-mato soal pado pilihan kato. Nan dipersoalkan adolah substansi, caro pandang, jo tapek indaknyo kito dalam mambaco kabudayaan Minangkabau.
Istilah diaspora untuak manyabuik urang Minangkabau nan iduik di lua wilayah asanyo paralu dikaji sacaro kritis. Sacaro akademis, istilah tu indak sapanuahnyo sangguik manggambarkan hakikat marantau dalam kabudayaan Minangkabau. Parbedaan ko bukannyo sakadar urusan istilah, tapi manyangkuik Parbedaan nan mandasar dalam mamahami identitas, hubungan jo tanah asa, struktur sosial, adat, sarato orientasi iduik urang Minangkabau di rantau.
Sacaro sapinteh, mannggunokan istilah diaspora nampak modern dan akademis. Diaspora saolah-olah manjadi istilah nan labiah laweh untuak manjalehkan urang-urang nan tingga jauah dari tanah asanyo. Dalam masyarakat modern ado kecenderungan untuak manganggap istilah asing labiah akademis daripado istilah lokal. Saolah-olah mangatokan diaspora labiah ilmiah, labiah gagah, labiah modern daripado mangatokan perantau.
Padahal indaklah baitu. Nilai ilmiah suatu istilah indak ditantukan dek asa istilah tu, apokah dari bahaso asing atau bahaso lokal. Nan manantukan adolah katapekkan konsepnyo dalam manjalehkan kenyataan sosial. Bagi ambo, masaah ko indaklah sesederhana itu.
Sakali lai, ambo indak satuju jiko istilah diaspora dipakai untuak manggantikan istilah perantau. Sabab diaspora jo perantau Minangkabau adolah duo konsep nan mampunyoi titiak persinggungan, tetapi indak mampunyoi makna jo bangunan sosial nan samo. Mamasokan kaduonyo manjadi satu istilah justru dapek maabihkan kekhasan konsep rantau dalam kabudayaan Minangkabau.
Artinyo, jan sampai istilah nan dianggap modern malah maabihkan konsep lamo nan sabananyo jauh labiah kayo maknanyo.
Jiko suatu istilah lokal mampunyoi kandungan sejarah, nilai, struktur sosial, jo filosofi nan labiah tapek, mako istilah itulah nan patuik dipatahankan. Dek karano itu, mampertahankan istilah perantau untuak urang Minangkabau bukannyo sikap anti-ilmu pangatahuan. Sabaliaknyo, hal itu adolah bagian dari usaha manjago katapekkan paham dalam mamahami kabudayaan awak surang.
Diaspora dan Sabuah Konsep
Sacaro akademis, istilah diaspora tumbuah untuak manjalehkan pengalaman suatu kelompok nan taseba dari tanah asanyo ka babagai wilayah lain. Dalam perkembangannyo, diaspora dipakai dalam ilmu sosial untuak mamahami komunitas nan iduik di lua homeland, tetapi tatap mamaliharo identitas, ingatan, hubungan, jo jaringan jo tanah asa. Di sinan ado unsur-unsur nan pantiang: dispersal atau penyebaran, hubungan jo homeland, sarato pengalaman iduik sabagai komunitas nan barado di lua tanah asa.
Dalam barbagai konteks sajarah dunia, konsep diaspora juo arek hubungannyo jo pengalaman migrasi, pangasingan, pangusiran, displacement, kolonialisme, konflik, bahkan ketercabutan dari aka asa.
Tantu sajo, makna diaspora dalam ilmu sosial modern alah bakambang jauah labiah laweh, jo indak selalu pulo bararti pangasingan. Tapi justru di sikolah masaahnyo. Indak satiok kelompok nan iduik di lua tanah asa otomatis dapek disabuik diaspora. Jo labiah jauah lai, indak satiok masyarakat nan mampunyoi tradisi bapindah-pindah dapek dijalehkan sacaro tapek hanyo jo konsep diaspora.
Minangkabau mampunyoi konsep sosial-kulturalnyo surang nan jauah labiah spesifik, yaitu marantau. Urang Minangkabau nan marantau bukannyo sakadar iduik di lua kampuang halaman. Marantau bukannyo sakadar kenyataan geografis baso seseorang tingga jauah dari kampuang asanyo. Marantau adolah sabuah institusi sosial jo kabudayaan. Inyo mampunyoi sajarah, norma, etika, tujuan, orientasi sosial, sarato hubungan nan khas jo ranah.
Dek karano itu, seorang anak Minangkabau nan marantau indak dapek didefinisikan hanyo dari pertanyaan, “Di ma inyo tingga?” Tapi juo musiti diliek, “Baa hubungannyo jo ranah, kaum, suku, nagari, adat, jo identitas Minangkabau?”
Di sinanlah Parbedaan nan mandasar tu mulai taliek.
Diaspora labiah tapek dipakai untuak manjalehkan kondisi penyebaran suatu komunitas di lua tanah asa. Sedangkan marantau urang Minangkabau manjalehkan suatu proses sosial-kultural nan sacaro sadar manjadi bagian dari kehidupan urang Minangkabau.
Parbedaan partamo: Diaspora adolah kondisi penyebaran, marantau adolah proses kabudayaan
Ikolah Parbedaan nan manuruik ambo paling mandasar. Diaspora labiah marupokan kategori untuak manjalehkan kaadaan sabuah komunitas nan tasabar.
Sedangkan marantau adolah proses nan dijalani seseorang dalam kabudayaan Minangkabau. Urang Minangkabau indak disabuik perantau hanyo dek karano inyo tingga di lua Sumatera Barat. Inyo manjadi perantau dek karano inyo barado dalam sabuah tradisi sosial nan mamandang rantau sabagai ruang kehidupan.
Jo baitu, diaspora manjalehkan kaadaan nan tasabar. Marantau manjalehkan perjalanan sosial jo kabudayaan. Parbedaannyo sangaik pantiang.
Seseorang dapek sajo iduik di lua daerah asanyo tanpa mampunyoi hubungan sosial jo tanah asa. Tapi konsep perantau Minangkabau justru maandaikan ado hubungan nan tatap iduik antaro rantau jo ranah. Parbedaan kaduo: Diaspora barangkek dari “homeland”, Minangkabau barangkek dari “ranah”
Dalam teori diaspora, homeland marupokan konsep nan pantiang. Namun bagi urang Minangkabau, ranah bukannyo sakadar homeland. Ranah adolah ruang kabudayaan.
Di dalam ranah ado nagari, suku, kaum, ninik mamak, keluarga, adat, tanah pusako, sajarah, jo jaringan sosial. Dek karano itu, manyamokan ranah jo homeland sacaro sederhana juo indaklah cukup. Ranah mampunyoi dimensi sosial jo genealogis nan jauah labiah kompleks daripado sakadar tampek asa.
Surang perantau dapek sajo bajarak ribuan kilometer dari kampuangnyo, tapi hubungan jo kaum jo sukunyo tatap melekat. Mako hubungan tu bukannyo hanyo hubungan emosional jo tanah kalahirannyo. Inyo adolah hubungan struktural dalam kabudayaan. (basambuang klik di siko)
