Ujuik Diaspora Keterpisahan, Ujuik Marantau Mampatamukan
Oleh: Jasman Rizal, Dt. Bandaro Bendang
Sekretaris Umum LKAAM Sumatera Barat
Parbedaan katigo: Diaspora dapek bararti keterpisahan, marantau justru manganduang katerhubungan. Dalam banyak pengalaman diaspora, masaah utamonyo adolah baa komunitas nan barado jauah dari tanah asa dapek mampertahankan identitasnyo.
Pado urang Minangkabau, hubungan jo ranah justru alah manjadi bagian dari konstruksi marantau itu surang. Rantau indak maapuih ranah. Sabaliknyo, rantau jo ranah saliang barhubungan.
Ado nan pai, ado nan tingga, ado nan pulang, ado nan mangirim hasia, ado nan mambangun jaringan, ado nan manolong keluarga, jo ado pulo nan baliak ka nagari. Jo baitu, hubungan ranah jo rantau basifat saliang mambari jo manarimo. Rantau bukannyo titiak akia dari hubungan jo ranah. Rantau adolah parluasan ruang kehidupan.
Parbedaan kaampek: Diaspora indak otomatis mampunyoi “pulang”, sedangkan marantau manangguang “pulang kampuang”
Fenomena pulang kampuang mampunyoi arti nan sangaik pantiang dalam kabudayaan Minangkabau. Pulang kampuang bukannyo hanyo perjalanan fisik. Inyo adolah reconnecting with origin; manyambuang baliak diri jo urek sosial sarato kultural.
Perantau pulang manamui keluarga, pulang manamui kaum, pulang ka nagari, pulang dalam barbagai kegiatan adat, pulang ka rumah gadang, pulang untuak barbagai kaparaluan sosial, jo lain sabagainyo. Bahkan kutiko seseorang alah puluhan tahun iduik di rantau, konsep “pulang” tatap mampunyoi tampek nan kuat dalam kesadarannyo.
Ko manunjukkan baso rantau bukannyo sabuah proses keterputusan. Rantau adolah jarak nan tatap mampunyoi jalan untuak baliak.
Parbedaan kalimo: Diaspora mampertahankan identitas, perantau mambao identitas
Ado parbedaan filosofis nan menarik.
Dalam banyak kajian diaspora, salah satu pertanyaan nan pantiang adolah baa suatu komunitas mampertahankan identitasnyo di tampek lain.
Samantaro perantau Minangkabau, sejak dari awal, alah mambao identitas tu basamo jo dirinyo. Inyo datang ka rantau sabagai urang Minangkabau. Sasudah tu inyo baradaptasi jo lingkungan nan baru. Dek karano itu, pertanyaannyo bukannyo hanyo, “Baa identitas Minangkabau dipatahankan di rantau?” Tapi juo, “Baa identitas Minangkabau barinteraksi jo lingkungan rantau?”
Ko mambao kito ka prinsip Minangkabau nan sangaik musahua:
“Dima bumi dipijak, di sinan langik dijunjuang”
Ungkapan ko adolah prinsip adaptasi sosial nan luar biaso. Perantau Minangkabau manghormati tampek di mano inyo barado, manghormati masyarakat satempat, maargoi aturan jo kabiasaan satempat, mambangun hubungan, salalu babaua, tetapi babaua indaklah bararti kahilangan identitas.
Perantau Minangkabau salalu manyatu jo lingkungan tanpa kehilangan aka.
“Dima bumi dipijak” bukannyo bararti lupo dari mano asa datang.
Ikolah nan acok talapeh kutiko kito mambicarokan urang Minangkabau di rantau.
Ungkapan “dima bumi dipijak, di sinan langik dijunjuang” bukannyo ajaran untuak maapuih identitas asa. Sabaliknyo, ungkapan ko manunjukkan kacapakan kultural untuak iduik dalam perbedaan.
Perantau Minangkabau mamahami baso inyo indak iduik surang. Inyo musiti manghormati tampek nan baru. Namun manghormati tampek nan baru indak bararti maapuih tampek asa. Dek karano itu, prinsip ko dapek dibaco sabagai sikap adaptif sacaro sosial, tetapi tatap mampunyoi aka identitas.
Di sinanlah konsep perantau manjadi sangaik balain jo sakadar konsep diaspora.
Parbedaan kaanam: Marantau mampunyoi fungsi mambantuak manusia
Marantau juo mampunyoi dimensi pendidikan. Rantau adolah tampek seseorang baraja manghadapi kehidupan, baraja mandiri, baraja mancari panghidupan, baraja bakomunikasi, baraja baradaptasi, baraja mambaco masyarakat, baraja mambangun jaringan, jo baraja mangambangkan kemampuan.
Baraja dalam ruang kebebasan di alam ko lah nan disabuik: “Alam takambang jadi guru”. Baraja dari alam, baraja dari lingkungan di mano inyo barado, nan pado ujungnyo mambuek inyo sangguik baradaptasi jo tampek di mano inyo iduik. Dengan kato lain, rantau adolah ruang untuak mambantuak manusia. Dek karano itu, marantau bukannyo sakadar perpindahan penduduk. Inyo adolah social mobility sakaligus cultural learning.
Anak Minangkabau pai ka rantau untuak manjadi labiah matang. Jo keberhasialannyo di rantau, keberhasilaan tu acok manjadi banilai kalau dapek mambari manfaat ka keluarga jo ranah.
Parbedaan katujuah: Perantau mampunyoi hubungan genealogis nan indak hilang dek jarak
Sistem kekerabatan Minangkabau makin mampakuaik Parbedaan ko. Identitas Minangkabau bukannyo samato-mato dibantuak dek tampek seseorang tingga. Ado suku, kaum, jo hubungan genealogis. Dek karano itu, seseorang dapek tingga di rantau tanpa kehilangan hubungan genealogisnyo. Inyo tatap mampunyoi asa-usul, tatap mampunyoi kaum, tatap mampunyoi suku, tatap mampunyoi hubungan sosial jo ranah. Parpindahan geografis indak otomatis bararti parpindahan identitas. Jarak indak salalu bararti keterputusan. Ikolah salah satu karakter nan paliang pantiang dalam mamahami perantau Minangkabau.
Apokah Istilah Diaspora Sama Sakali Indak Buliah Dipakai?
Di siko ambo ingin managaskan posisi ambo sacaro akademik. Ambo indak mangatokan baso istilah diaspora haram dipakai dalam penelitian tantang urang Minangkabau. Tantu sajo buliah. Sabuah penelitian dapek manggunokan teori diaspora sabagai karangka komparatif untuak mambandingkan pengalaman urang Minangkabau jo komunitas migran nan lain.
Tapi nan ambo persoalkan adolah panyamoan konsep. Diaspora buliah manjadi perspektif analitis. Tapi jan sampai diaspora manggantikan konsep lokal rantau, perantau, jo marantau. Dek kutiko istilah diaspora dijadikan label utama, kito barisiko mambaco pengalaman kabudayaan Minangkabau jo kacamato teori dari lua, samantaro masyarakat Minangkabau sabananyo alah mampunyoi konsep surang untuak manjalehkan pengalaman tu.
Dalam antropologi dikenal Parbedaan antaro perspektif etic jo emic. Etic manggunokan kategori analitis dari lua untuak manjalehkan suatu masyarakat. Samantaro emic bausaho mamahami masyarakat berdasarkan kategori jo makna nan iduik dalam masyarakat tu sandiri.
Jikok masyarakat Minangkabau salamo ko manggunokan konsep rantau jo marantau untuak manjalehkan mobilitas sosialnyo, mako istilah tu mampunyoi legitimasi emic nan sangaik kuat.
Mamahami suatu masyarakat dari kategori nan iduik dalam masyarakat tu surang adolah pendekatan nan pantiang. Mako, sabalun mangatokan “diaspora terhadap perantau Minangkabau”, kito musiti labiah dahulu mamahami sacaro sungguah-sungguah apo makna rantau jo marantau dalam kabudayaan Minangkabau. (basambuang klik di siko)
