Pangana: EYE Sutan Parpatiah
Alek nan sangaik taraso sukocito ko banamo: Rirayo atau Lebaran. Rirayo akhianyo alah balalu. Dalam wacana syariah, tantu nan dimukasuik adolah sukocito sasudah malalui perjuangan 30 hari 30 malam malawan perlawanan ibilih salamo puaso.
Tasarahlah apokah dalam perjuangan tu awak nan kalah atau ibilih nan kalah atau podo sajo, tapi syariah alah maaturnyo sarupo itu, baraso kalau lah tanggal 1 Syawal katiko Ramadhan salasai, mako kamanangan dirayokan. Aratinyo awak bisa marasokan pasan-pasan dari syarak baraso awak harus manang! dan ibilih pasti kalah. Podo pun indak buliah doh, mantun bana lah.
Itulah syarak.
Namun dilua syariah ruponyo indak kalah lo sumangaiknyo umaik ko. Bahkan kadang lah bakalabiahan taraso. Kariang an marayokan hari rayo labiah manonjol dari pado ka riang an marayokan keberhasilan mangalahkan ibilih salamo 30 hari.
Tando-tandonyo alah nampak saminggu manjalang rirayo. Mabuak pulang kampuang (acok disabuik mudik) nan indak paduli jo keselamatan pribadi pun alah dirancang. Puluahan ribu urang naiak onda dari Jakarta ka kampuang-kampuang di Jawa jo Sumatera. Jaraknyo ribuan kilo. Dingin, hujan, angek, jalan buruak, dan rawan kecelakaan indak nyo padulikan mek dan ndak pulo mambuek mereka takuik. Ado nan manggendok bayi jo onda ribuan kilo dari Jakarta, ondeh mak!
Di daerah lain, tamasuak Sumatera Barat, kegembiraan manyambuik rirayo (indak marayokan kemenangan atas ibilih salamo 30 hari) indak kalah lo tenggennyo sebagian urang ko.
Sahari sabalun lebaran, sadonyo hotel di daerah ko lah panuah. Hotel-hotel kaciak di Padang Panjang, Solok, Pariaman, Batusangkar jo Payakumbuh juo dipasan dek urang-urang nan baharirayo ko.
Di malam-malam tanggal 1 jo 2 Syawal, kota-kota sarupo Bukiktinggi sabana pabuah jo pangunjuang. Puncak jam gadang sabana tarang karano cahayo kambang api. Sabana baralek gadang. Baitu juo di kota-kota lain.
Ciek kambang api nan digabuangan jo maracun haragonyo sekitar Rp 30 ribu untuak dipanggang. Limo ledakan dalam sakali latuih ampia samo jo latusan karaben tuo merek LE Springfield atau Jungle (sinjato nan banyak beredar di maso PRRI) babunyi di langik babagai kota. Dalam wakatu saminik, paliang indak duo buah kambang api nan ditembakkan, itu aratinyo Rp 60 ribu jadi di abu. Sanak etong sajo kambang api dari jam 18.00 sampai jam 00.00 WIB. Sudah tu etong dari 1 sampai 7 Syawal x Rp 30 ribu per tembakan.
Sapanjang siang jo malam tu ratusan ribu liter bensin jo solar juo tabaka di sapanjang jalan nan macet. Maaf, dari Bukiktinggi ka kampuang ambo di Aie Angek, Kecamatan X Koto Tanah Datar, jaraknyo 11 km, tapaso ambo tampuah 4 jam. Di tampek-tampek wisata, urang indak paduli apo harus mambayia puluhan ribu rupiah. Nan pantiang barirayo. Sadonyo mangarajoannyo sacaro sadar. Dan…….tantu indak ado karuik di kaniang atau manyumpah-nyumpah. Sadonyo marayokan sanang hati hari rayo. Walaupun awak alun tantu marayokan Idul Fitri sasuai jo sunnah.
Akhirnyo ciek se nyo: sanang indak bisa diukua jo pitih.
Lalu?
Yo bae bana lah!
