Padang — Sabanyak 21 Organisasi Perangkat Daerah (OPD) nan tagabuang dalam tim pendamping Nagari/Desa Creative Hub (NCH), dimintak dek Sekdaprov Sumbar Arry Yuswandi untuak labiah serius mampacek pelaksanaan program unggulan di nagari-nagari Sumbar.
Masiang-masiang OPD dibari wakatu sapakan untuak manyusun rencana aksi nan akan dilaksanakan salamo anam bulan ka muko, sesuai jo tugas pokok jo fungsi masiang-masiang. Rencana aksi tu dimintak alah dilaporkan ka Sekda pado hari Sinayan nan datang.
Arahan tu disampaikan Arry Yuswandi kutiko mamimpin rapek koordinasi evaluasi dukuangan perangkat daerah untuak pelaksanaan NCH di Ruang Rapat Gubernuran, Salasa (11/8/2026).
Asisten Administrasi Umum Setda Provinsi Sumbar, Medi Iswandi, manarangkan, dari hasia evaluasi masih ado dukuangan sabagian perangkat daerah nan alun optimal.
Dek itu, Sekda mamintak seluruh OPD nan tagabuang dalam tim pendamping NCH indak sajo manyusun pembagian tugas di ateh karateh, tetapi juo manarjemahkan tugas tu manjadi aksi nan nyoto di lapangan.
“Seluruh OPD terkait diminta manyusun rencana aksi untuak manyukseskan program NCH. Pak Sekda mambari wakatu sapakan untuak manyusun rencana aksi enam bulan ka muko, dan hasianyo alah musti dilaporkan Sinayan nan katibo,” kecek Medi sasudah rapek.
Infrastruktur Alah Ado, Pemasaran Masih Paralu Dikuaikkan
Medi manambahkan, pelaksanaan NCH di sabagian lokasi percontohan alah mulai bajalan. Infrastruktur pendukung pun dinilai alah cukuik tasadio
Namun, masih ado babarapo hal nan paralu dipakuaik supayo NCH indak hanyo manjadi ruang nan ado bangunannyo, tetapi yo bana mampu tumbuah menjadi pusat kreativitas jo perekonomian masyarakaik nagari.
“Dari segi infrastruktur alah tasadio. Hanyo sajo dari aspek digital marketing, standardisasi produk, strategi pemasaran, masa layak konsumsi produk, jo branding masih paralu penguatan,” katonyo.
Kebutuhan tu akan ditangani sacaro basamo-baso dek 21 OPD nan tagabuang dalam tim pendamping NCH. Pembagian peran masiang-masiang OPD sabananyo alah dituangkan dalam Matriks Sinkronisasi. Namun, matriks tu dinilai paralu ditindaklanjuiki jo rencana aksi nan labiah jaleh, supayo dukuangan satiok OPD bisa diukua hasianyo dan diraso manfaatnyo dek masyarakaik.
Indak Musti Mahal
Medi juo manekankan, mampacek program NCH indak musti selalu dilakukan melalui kegiatan nan mamakan anggaran gadang.
Di tangah kondisi efisiensi anggaran, perangkat daerah dituntuik untuak mampagunokan sagalo potensi, fasiaitas, jo sumber daya nan alah tasadio di daerah.
“Fasiaitas pemerintah daerah setempat bisa dimanfaatkan. Kalau mambari pelatihan, indak mesti mandatangkan jo manginapkan pesarato. Parubahan paradigma iko paralu dilakukan di tangah efisiensi,” tegasnyo.
Dengan caro itu, kegiatan pendampingan diharapkan tetap bajalan efektif, tetapi indak manambah beban biaya nan indak paralu.
NCH Jadi Ruang Kreatif Anak Nagari
Samantaro tu, Kepala Dinas Pemberdayaan Masyarakaik dan Desa (PMD) Provinsi Sumbar, Yozawardi Usama Putera, manarangkan NCH adolah ruang kolaborasi di nagari untuak manumbuhkan kreativitas jo inovasi masyarakaik.
Program tu diarahkan untuak mambangun kewirausahaan nan basumber dari potensi lokal. Dengan co itu, nagari indak hanyo manjadi objek pembangunan, tetapi mampu manggali jo mangambangkan kekuaikan ekonominyo surang.
“Rapek iko barujuang untuak mengevaluasi dukungan 21 OPD nan tagabuang dalam tim pendamping untuak mampacek perkembangan NCH, supayo kolaborasinyo labiah optimal,” kato Yozawardi.
Kekuaikan utamo NCH ado pado kolaborasi. Pengembangan ekonomi kreatif di nagari indak mungkin dilakukan dek satu OPD sajo, tetapi mamintak dukungan barbagai pihak, mulai dari peningkatan kemampuan sumber daya manusia, pengembangan produk, pemasaran, digitalisasi, standardisasi, sampai pambangunan jaringan usaha.
Indak Banyok Terekspose, Padahal Ado Nan Alah Mancubo
Program NCH nan manjadi salah satu program unggulan Pemprov Sumbar ko, dalam pemberitaan media, tampaknyo masih alun banyok terekspose. Pemberitaan nan muncul labiah banyok basangkutan jo rapek, pertemuan, maupun acara peresmian.
Padahal, di lapangan alah ado nagari nan malakukan langkah-langkah nan sejalan jo semangat NCH, bahkan sabalun program tu berkembang sacaro luas.
Salah satunyo di Nagari Tanjung Haro Sikabu-kabu Padang Panjang, Kabupaten Limapuluh Kota.
Di nagari ko, bangunan huller panggilingan padi nan alah lamo indak dipakai, punyo keluarga B. Dt. Paduko Sati dari Suku Payobadar, Jorong Padang Panjang, disulap manjadi ruang kreatif nan cukuik artistik.
Bangunan nan sabalunnyo dipakai untuak panggilingan padi tu kini dimanfaatkan dek Karang Taruna Nagari Tanjung Haro Sikabu-kabu Padang Panjang sebagai ruang pamer produk usaha jo jasa anak nagari.
Di dalam ruangan, sakurang-kurangnyo ado 14 macam produk usaha jo jasa masyarakaik nan dipajang. Tata lampu nan disusun saling terhubung mambari suasana nan manarik bagi ruang pamer tu.
Produk nan dipajang datang dari barbagai jorong. Dari bidang kuliner, misalnyo, ado Roda Gandiang Berkah jo Karupuak Lado dari Jorong Bukik Kanduang.
Di bidang fashion, ado hasia karya penjahit Heri dari Jorong Padang Panjang jo Riel House dari Jorong Sikabu-kabu. Samantara kerajinan rajut datang dari Jorong Sikabu-kabu.
Ado pulo kerajinan miniatur dari tempurung dari Jorong Padang Panjang, Quita Bouquet dari Jorong Lakuak Dama, sampai keterampilan teknik jo modifikasi motor dari Jorong Padang Panjang.
Indak hanyo bagian dalam bangunan nan dimanfaatkan. Halaman nan cukuik lapang, nan dulunyo dipakai untuak manjamua padi, kini juo diubah manjadi ruang kreativitas anak nagari.
Di halaman tu disusun babaro level nan difungsikan sebagai panggung pertunjukan dan ruang pemutaran film karya anak nagari, khususnyo pada malam hari.
Baragam kegiatan kreativitas bisa dilakukan di sinan, di antaronyo pemutaran film Carito Minang Lucu sarato pertunjukan kelompok musik anak nagari.
Apo nan dilakukan masyarakaik Nagari Tanjung Haro Sikabu-kabu Padang Panjang iko mambuktikan bahwaso semangat NCH sabananyo indak musti selalu dimulai dari bangunan baru jo anggaran nan gadang.
Bangunan nan alah ado bisa dihidupkan baliak, produk anak nagari bisa dipajang, kreativitas anak mudo bisa diagiah ruang, dan potensi ekonomi masyarakaik bisa dipromosikan. (Tan Parpatiah)
