Padang — Kalau nak bagalak-galak atau basorak basamo jo Gubernur Suametara Barat Mahyeli Ansharullah sambia manonton final piala dunia sepakbola, datanglah Sinayan parak siang (pukua 02.00 WIB) ka laman kantua Gubernur di Jl Sudirman Padang.
Pemprov Sumbar jo TVRI maadokan nonton bareng (nobar) patandiangan final Piala Dunia 2026 nan mampatamukan Spanyol jo Argentina. Acara ko tabukak untuak urang banyak. Salain manonton patandiangan puncak Piala Dunia malalui layar gadang, masyarakat nan datang juo bisa mandapekkan hadiah utamo barupo sepeda motor, disampiang baragam doorprize lain nan alah disadiokan dek panitia.
Gubernur Mahyeldi Ansharullah maajak masyarakat datang basamo keluarga, dunsanak, kawan, maupun komunitas, supayo dapek marasoan suasana final Piala Dunia sacaro basamo jo ribuan pencinto bola di halaman Kantor Gubernur.
“Kami maundang seluruh masyarakat untuak datang berami-rama manonton Final Piala Dunia Sinayan parak siang di Halaman Kantou Gubernur ko. Insyaallah, di sinan nanti wak bisa basobok, basilaturahmi, sekaligus manikmati patandingan bersamo,” kato Buya Mahyeldi di Padang, hari Akaik siang (19/7/2026).
Panitia alah manyiapkan babagai rangkaian acara supayo nobar ko labiah mariah. Salain undian bahadiah sepeda motor, masyarakat juo punyo kasampatan mandapekkan baragam doorprize nan dibagi salamo acara barlangsung.
Kawasan nobar juo diramikan dek puluhan palaku UMKM nan manjua aneka kuliner jo produk unggulan khas Sumatera Barat. UMKM ko diharokan indak sajo mambuek pangunjung labiah nyaman, tapi juo mampalancarkan parputaran ekonomi masyarakat.
“Kito ingin halaman kantua Gubernur manjadi rumah, untuak masyarakat bakumpua jo manikmati babagai kegiatan nan positif. Mari kito ramikan nobar ko, sakaligus mambari dukungan ka UMKM awak supayo makin maju jo bakambang,” kato Mahyeldi.
Nobar Final Piala Dunia ko marupakan hasia karajo samo antara Pemprov Sumbar jo TVRI, jo dukungan Polda Sumbar, Bank Mandiri, Bank Nagari, jo Kahf.
Manjalang partandiangan final, Mahyeldi juo manyampaian prediksinyo. Gubernur manjagokan Spanyol sabagai juaro Piala Dunia 2026 sasudah manang tipih 1-0 ateh Argentina.
“Prediksi ambo Spanyol manang 1-0. Namun siapa pun nan manang, semoga kito sadonyo daepek tahibur dan menikmati patandingan nan menarik dari kaduo tim,” katonyo. (Tan Parpatiah)
