Padang Panjang — Saratuih tahun lah balalu sajak bumi Darek Minangkabau diguncang duo kali gampo gadang dalam sahari. Pado hari Satu patang (27/6) ko, ingatan ka musibah nan mahancuakan Padang Panjang tahun 1926 tu diiduikan liak malalui paluncuran buku “Gempa Tujuh Hari” nan ditulih dek wartawan Yose Hendra di kompleks Pusat Dokumentasi Informasi Kebudayaan Minangkabau (PDIKM), Padang Panjang.
Kagiatan nan digagas Patahan Sumatra Institute basamo Ade Edward jo Ade Rahadian tu indak sajo maluncuakan buku tapi juo manggiatkan literasi kebencanaan untuak masyarakat nan tingga di sapanjang jalur Sesar Sumatra.
Dalam buku Yose tu dijalehkan, Gampo Padang Panjang 1926 adolah gampo darek nan basumber dari Sesar Sumatra.
Nan manjadi paratian para ahli sampai kini iyolah sifatnyo sabagai gampo kamba (doublet earthquake), yakni duo gampo utamo nan tajadi dalam waktu babarapo jam tapi basumber dari duo segmen patahan nan babedo.
Gampo partamo tajadi pukua10.04.28 P.M.T. jo hiposentrum di Segmen Sumani, jo kakuatan dipakirokan di ateh magnitudo 6,6. Kurang dari tigo jam kamudian, pukua 12.56.47 P.M.T., bumi baliak baguncang. Kali ko hiposentrumnyo di Segmen Sianok jo kakuatan nan saketek labiah gadang.
“Peristiwa ko dapek diketshui basi duo segmen patahan aktif bisa malapehkan energi dalam waktu nan baradekatan,” baitu kutipan dalam buku tu.
Musibah gadang tu juo manarik perhatian Pamarintah Kolonial Ulando. Indak sajo malakukan pananganan darurat, pamarintah kolonial juo manurunkan ahli geologi jo vulkanologi untuak manantuan hiposentrum, episentrum, jo mambaco hubungan gampo tu jo kondisi geologi Sumatra.
Babarapo ilmuwan kabumian nan barpangaruah pado maso tu sato mambarikan pandangan tantang gampo Padang Panjang 1926.
Salah satu nan kutipan rancak dari buku Yose Hendra ko adolah istilah “Gampo Toedjoeh Hari” nan barulang kali mancogok dalam surek kaba Ulando.
Sabutan tu dipategas pulo dek anggota Volksraad, Loetan Datoek Rangkajo Maharadjo, kutiko maota-ota jo zoolog Ulando Edward Richard Jacobson.
Dalam publikasi Naamlijst der Leden van de Koninklijke Natuurkundige Vereeniging in Nederlandsch-Indië tahun 1927, bencana tu disabuik sabagai gampo nan “mangguncang bumi salamo tujuah hari tujuah malam”.
Sabutan itulah nan dipiliah manjadi judul buku “Gempa Tujuh Hari”.
Buku tu juo maungkapkan bahwa dahsyatnyo gampo indak sajo mamintak banyak korban jiwa jo malukuahkantajan ribuan bangunan, tapi juo maubah bentang alam Sumatra Barat dalam hituangan datiak.
Di Lembah Anai, longsor raksasa manimbun jalan jo mamutuih jalur kureta api nan manghubungkan Padang jo Padang Panjang.
Di babarapo titiak ka arah Bukittinggi jo Solok, rel kureta baja banyak nan bengkok, malangkuang, bahkan taangkek dari bantalan akibat deformasi tanah nan dipicu gerakan Sesar Sumatra.
Pakar geologi jo geotektonik Danny Hilman Natawidjaja manilai buku “Gempa Tujuh Hari” marupokan upayo penting untuak mambaco baliak salah satu gampo paling basajarah di Sumatra Barat.
Samantaro itu, Kapalo Stasiun Geofisika Kelas I BMKG Padang Panjang, Suaidi Ahadi, manyabuik buku tu mahadirkan perspektif baru dalam mamahami salah satu bencana gadang di Sumatra Barat.
“Buku ko indak sajo maingekan publik pado tragedi Gampo Padang Panjang 1926, tapi juo maagiah pamahaman tantang karakteristik gampo gadang nan basumber dari Sesar Sumatra,” katonyo,
Saratuih tahun lah balalu, tapi ancaman gampo dari Sesar Sumatra masih tasimpan di bawah bumi ranah ko. Malalui buku “Gempa Tujuh Hari”, Yose Hendra indak sajo manyusun ulang carito masa lalu, tapi juo maajak masyarakat Minangkabau mambaco sejarah sabagai palajaran untuak manyiapkan diri maadoki gampo gadang di maso nan akan datang.
Bak kato urang tuo Minang, “nan lah lalu jadikan canin, nan ka datang jadikan ingek.”(Tan Parpatiah)
