Di sebuah kampuang nan banamo Kampung Cubadak Rimbun, masyarakaiknyo masih picayo adonyo batang cubadak rimbun nan ado penunggunyo. Sosok gaib yang biaso dicaritoan dek masyarakat satampek biasonyo muncul katiko hari kamis malam Juma’aik. Tujuannyo bia batang cubadak dipaliharo elok-elok dan dimanfaatkan hasil dari buahnyo elok-elok untuk masyarakat nan mambutuhkan. Bia indak sakedar diserak-serakan manjadi sarok dan mambusuak.
Inyiak Lapun jo Iyak Manih acok maingekan masyarakat untuk indak lalu di sinan. Maambiak buahnyo malam hari tu biasonyo ado se urang nan mancampakan sarok di sinan, jadi pas paginyo alah panuah se lokasi batang Cubadak tu dek sarok. Ardi, anak Kampuang Cubadak Rimbun nan baru pulang marantau lewat batang Cubadak tu taingeknyo carito batang Cubadak Karamaik tu pas jalan manuju ka rumah. Tapi, Si Ardi ko nan indak picayo samo sakali nyo anggap carito tu hanyolah dongeng.
Pas hari Kamis malam Juma’aik, Si Ardi ko takana samo carito tu dan mancubo mambuktian apolah iyo batang cubadak ko karamaiak atau carito untuak mangicuah anak-anak ketek nan ado di kampuang se. Pas jalan arah ka batang cubadak tu basobok lah si Ardi ko samo Iyak Manih.
Iyak Manih : Kama ang Ardi?
Ardi : Pai kalua sabanta, Yak.
Iyak Manih : Jan lalu ka Batang Cubadak tu, hari lah malam.
Inyiak Lapun : Lewaik baruah se.
Ardi : Sia nan manyapo yak, Nyiak, indak ado urang di situ.
Iyak Manih : Jan tangka jadi urang.
Ardi : Jadih, Yak. (Apolah dek Iyak ko, alah jaleh indak ado baurang di situ, sia pulo nan ka manyapo?, Ardi mangecek dalam hati).
Dek kareh hati, Ardi bajalan manuju Batang Cubadak Karamaik mambuktian apokah iyo nan di kecekan Iyak manih jo Inyiak Lapun tadi. Tibo di Batang Cubadak Karamaik tu, Ardi mancubo mamatiak buah cubadak dek takicok baun harum dari buah cubadak nan ampia masak. Inyo bukak jo caro maampehannyo ka batu nan ado dakek batang cubadak. Baserak-serak isinyo.
Ardi maninggaan buah cubadak dalam keadaan baserak. Ardi malanjuikan perjalanannyo, tapi baru malangkah Ardi maraso angin dingin bahambuih di kuduaknyo yang indak biaso nyo rasoan. Inyo mandanga bisiakan nan indak tau dima sumbernyo.
“Alah balangga pantanggan nan ado”.
Ardi tacanggang mandangganyo dek indak picayo apo nan sabantako tajadi. Tapi suaro tadi langsuang hilang sakutiko dan urang nan mangecek indak ado nampak. Mambuek Ardi langsuang balari sambia tacangang.
Tibo di rumah Ardi langsuang panik masuak dalam kamar, taheran-heran apo nan tajadi sabantako nan mabuek ardi indak bisa lalok. Pagi harinyo urang tuo Ardi mancaliak kondisinyo nan pucek dan indak sadar. Tadanga lah kejadian Ardi ko dek Iyak Manih.
“Alah ditagah, inyo nan tangka,” kecek Iyak Manih.
“Mangga nyo, Yak”, kecek urang gaek Ardi.
“Baok lah nyo ka Nyiak Patiah bia diubek, tatagua ko dek malawan kecek ambo malam.”
Orang tuo Ardi bakameh untuak mambaok Ardi tampek Inyiak Patiah dalam keadaan cameh. Tibo di tampek Inyiak Patiah, Inyiak Patiah alah manakok ko Si Ardi tatagua dek takabua. Inyiak Patiah langsuang maagiah ubek dalam galeh nan baisi potongan sarai, kunyik, bawang putiah, bareh yang dicampua samo aia dan ado nan dibaco-bacoannyo di basahan dari kapalo sampai ujuang kaki Ardi.
Indak lamo dari diubekan, Ardi langsung tacanggang mode urang nan kosong panggananyo, “Indak ka dibuek lai, alah jaran, Ardi mangecek sambia manutuik matonyo.
“Apo nan nampak,” kecek Inyiak Patiah.
“ Tadi ado urang gadang hitam manuruik dari batang cubadak rimb
“Untuak ka muko, jan lalu juo di sinan kalau hari Kamih malam Juma’aik tu, jan dipatiak buahnyo kalau indak ka dimakan. Tanaman nan alah tumbuah, tolong dijago dimanfaaikan saelok-eloknyo, indak dihancuan suko hati se, mularaik beko. Iko lai kamujua cegak, haragoi apo nan ado tu, indak hiduik jadi urang takabua, dari pado mati sio-sio”.
Ardi nan awalnyo indak picayo samo hal-hal nan nyo pikiaan tadi, kini maraso manyasa dan mamintak maaf atas parangai nan lakuan.
“Maafan ambo kalau salamo ko babuek salah, mungkin iko palajaran iduik nan ambo rasoan, indak ka ambo ulangi.”
