Padang Panjang, Khazanah — Peringatan saratuih tahun Gampo Gadang Padang Panjang 1926 dijadikan momen untuak mampakokoh budayo sadar bencana sakaligus maningkekkan kasiapsiagaan masyarakat dalam manghadapi ancaman gampo bumi jo bencana hidrometeorologi nan bisa datang bilo-bilo wakatu.
Komitmen ko mangapuang dalam Seminar Internasional “Padang Panjang Kota Siaga Bencana” nan dibukak langsung dek Wali Kota Padang Panjang, Hendri Arnis, di Gaduang DPRD Padang Panjang, Senin (29/6/2026). Seminar ko diikuti dek para akademisi, panaliti, unsur pamarintahan, sampai ka palaku kabencanaan untuak mambangkik batang tarandam dari tragedi gampo gadang nan manimpo Padang Panjang satahun 1926, sakaligus marumuihkan langkah-langkah mitigasi untuak manghadapi tantangan di maso nan ka datang.
Gampo nan diparingati ko tacatat sabagai salah satu bencana paliang gadang jo paliang banyak korban di Sumatera Barat. Pado 28 Juni 1926, duo kali gampo gadang mangguncang Padang Panjang jo daerah sakitarnyo dalam wakatu kurang dari tigo jam. Gampo nan dipicu dek aktivitas Sesar Sumatra, khususnyo Segmen Sianok, ko dipakirokan bakakuatan Magnitudo 6,7 jo 6,4, jo intensitas mancapai IX MMI (Violent), nan cukuik kuaik maruntuhan bangunan permanen di Padang Panjang.
Catatan sajarah manyabuikkan, sakurang-kurangnyo 354 urang maningga, sadangkan ribuan lainnyo luko-luko jo kahilangan tampek tingga. Di Kota Padang Panjang sajo, sakitar 2.383 rumah runtuah, 247 urang maningga . Di wilayah Agam, sakurang-kurangnyo 472 rumah hancua, 57 urang maningga, jo belasan urang mambao luka barek. Guncangan nan kareh juo mambangkikkan fenomena seiche di Danau Singkarak, yakni galombang tagak nan mambuek aia danau malimpah ka daratan, disaratoi dek longsor di babarapo kawasan parbukitan.
Indak sajo mamakan korban jo maruntuhkan parumahan, gampo ko juo malumpuhkan infrastruktur penting pado maso Hindia Balando tu. Stasiun kareta api, kantua pos, Sikola, rumah sakik militer, jambatan, rel kareta, sampai jaringan telegraf rusak parah, sahinggo hubungan komunikasi jo Kota Padang putuih. Bantuan baru dapek masuak ka Padang Panjang sasudah sahari lantaran jalan jo jalur kareta tatimbun longsor jo rusak barek. Trauma masyarakat barlangsung balabiah bulan, dek banyak warga nan masih batingga di tando pangungsian karano gampo susulan taruih tajadi salamo babarapo hari sasudah gampo gadang.
Kini, sasudah saratuih tahun balalu, ancaman geologi ko masih tatap mambayang. Padang Panjang masih barado pas di ateh jalur Sesar Sumatra nan aktif. Dek sabab itu, para ahli manilai pangalaman pahik tahun 1926 harus dijadikan landasan dalam mambangun kota nan kuaik manghadapi bencana. Peringatan saratuih tahun gampo indak sajo untuak mangana para korban, tapi juo untuak mambangkikkan baliak ingatan kolektif masyarakat supayo pangalaman masa lalu manjadi palajaran dalam mambangun budaya mitigasi, maningkekkan literasi kabencanaan, jo manyiapkan masyarakat nan labiah siap mahadoki bencana di maso nan ka datang.
Wali Kota Hendri Arnis manyabuik, sacaro geologis Padang Panjang memang barado di kawasan nan punyo tingkat karawanan tinggi tarhadap gampo bumi dek dilalui jalur Sesar Sumatra. Salain itu, kota ko juo rawan tarhadap bencana hidrometeorologi, sarupo galodo nan balakangan ko manimpo babarapo daerah di Sumatera Barat.
“Padang Panjang sacaro geologis memang barado di kawasan rawan bencana, utamonyo gampo bumi jo nan paliang baru bencana galodo. Fakta alam ko indak bisa kito ubah. Tapi nan bisa kito ubah adolah caro kito manyikapi jo manghadapinyo,” ujar Hendri.
Manuruiknyo, kasiapsiagaan indak cukup diwujudkan jo mambangun infrastruktur sajo, tapi harus manjadi budaya nan tumbuah dalam kahidupan sahari-hari masyarakat. Pendidikan kabencanaan, latihan evakuasi, jo maningkekkan literasi mitigasi marupokan investasi penting untuak mangurangi risiko korban bilo bencana datang.
Ketua DPRD Padang Panjang, Imbral, manyabuikkan siap mandukuang panguatan mitigasi bencana malalui fungsi legislasi, pangawasan jo panganggaran.
“Bencana memang indak bisa dicegah, tapi dampaknyo bisa dikurangi kalau mitigasi lah manjadi budayo sahari-hari. Kami di DPRD bakomitmen mangawal kabijakan jo anggaran nan mamihak ka kasalamatan masyarakat,” kato Imbral.
Inyo manambah, tragedi Gampo Padang Panjang 1926 harus manjadi paingek jo palajaran nan sangat baharago untuak generasi kini, karano sampai hari ko Padang Panjang masih barado pas di ateh patahan aktif nan saratuih tahun lalu mambuek kota ko luluah-lantak.
Samantaro itu, narasumber dari Universitas Leiden, Ulando, Prof. Suryadi Sunuri, maingekan bahwa gampo bumi tahun 1926 indak sajo maruntuahkan ribuan bangunan, tapi juo maninggakan jejak sajarah tantang daya juang masyarakat Minangkabau dalam bangkik dari bencana.
“Sajarah bukan sajo untuak mangana kajadian nan lah lalu, tapi juo untuak mamahami baa caro urang dalu mahadki tantangan. Dari sinan kito baraja mambangun katangguhan di maso kini,” kato akademisi nan barasa dari Sunua, Kabupaten Padang Pariaman, ko.
Manuruik Suryadi, manuskrip-manuskrip lamo, arsip, surat kaba kolonial, jo catatan sajarah manunjuakkan baa masyarakat Minangkabau dahulunyo bisa badamai jo kondisi geologi di sapanjang Sesar Sumatra nan salalu aktif.
Inyo manilai, ingatan kolektif tantang bencana indak buliah hilang ditalan zaman. Pangalaman masa lalu harus ditarajamahkan manjadi langkah nyata malalui panguatan literasi kabencanaan, mangidupkan baliak kearifan lokal, jo mangambangkan sistem mitigasi nan mamadukan ilmu pangatahuan jo teknologi modern.
“Ancaman gampo bumi indak mungkin dihilangkan karano bagian dari dinamika alam. Tapi risiko jo dampaknyo bisa ditekan kalau masyarakat punyo pangatahuan, kasiapsiagaan, jo budayo sadar bencana nan kuat,” katonyo. (Tan Parptian)
