Padang — Filosofi Minangkabau “Alam Takambang Jadi Guru” marupokan dasar nan pantiang untuak manjago kasaimbangan antaro pambangunan jo kalastarian lingkungan. Ilimu nan paliang pantiang dalam hiduik ko adolah ilimu ikhlas, karano dalam kondisi dan situasi apopun, ikhlas akan manjadi lilin dalam jalan diam nan dijalani.
Itu nan disampaikan dek anak mudo Minang ko di acara Apresiasi Budaya Minangkabau “Minang Bakaba Lamak di danga” di Pro4 RRI Jakarta pado hari Rabaa patang ko, 20 Mei 2026.
Muhammad Husen, anak mudo dari Minang nan alah cukuik konsisten dalam mamobilisasi masyarakaik malalui ekowisata jo pendidikan ko bacarito banyak tantang pangalamannyo.
Nak rang ko, lahia di Tanah Datar tahun 1992 dari suku Panyalai, kini inyo tingga di Pagaruyung, Batusangka.
Anak katigo dari limo urang badunsanak dari Risman (almarhum) jo Desvi Yenti, baliau dikatahui aktif dalam mambangun garakan sosial babasis komunitas sajak usia mudo. Walaupun inyo hanyo manyalasaian pandidikannyo sampai SMA, pajalanan iduiknyo mambuktikan baso gairahnyo untuak baraja jo malayani dapek mambukak jalan pangaruah nan laweh untuak lingkuangan sakitarnyo.
Sajak mudo matah, Muhammad Husen alah mambuek babagai pancapaian nan mambanggakan. Nyo adolah anggota Kontingen Jambore Pramuka Nasional pado taun 2006 sarato anggota Paskibraka Kabupaten Tanah Datar. Karyanyo samakin tanamo kutiko inyo mandapek juara 1 Pemuda Perintis dalam Kategori Pendidikan di tingkek Kabupaten Tanah Datar jo Provinsi Sumatera Barat pado taun 2019 dan akhianyo manjadi Pemuda Perintis Nasional Kementerian Pemuda dan Olahraga RI pado taun nan samo.
Indak hanyo di dalam nagari, pado taun 2022 inyo juo dipicayo untuak manjadi pambicaro di Tong Tong Fair di Den Haag, Balando, mambaok sumangaik budayo jo pambariaan masyarakaik Minangkabau ka panggung internasional. Nyo mancaritokan Minangkabau di Nagari Ulando ntun.
“Ambo mamulai pado taun 2014 malalui Yayasan Sukarelawan Sumatera (Yayasan Sumatera Volunteer-red). Sabalun masuak ka bidang ko, ambo bakarajo sabagai editor untuak Majalah Pembaharu di Bali jo sabagai asisten panguruih jo agen pamasaran. Pangalaman tingga di Bali mambuek ambo mancaliak baa budayo, pelestarian alam jo pariwisata dapek bajalan basamo-samo,” kecek Husein.
Sasudah baliak ka Sumatera Barat, Husein manilai baso potensi daerah iko sangaik gadang, tapi paralu diimbangi jo mampakuek SDM sahinggo manfaat pariwisata batua-batua dirasoan dek masyarakaik. Baginyo, falsafah Minangkabau “Alam Takambang Manjadi Guru” marupokan dasar pantiang untuak manjago kasaimbangan antaro pambangunan jo kalastarian lingkungan.
Salain aktif mambarikan kakuatan kapado masyarakaik malalui program ekowisata, Yayasan Sukarelawan Sumatera juo manyadiokan pangajaran bahaso Inggirih gratis untuak anak-anak kampuang. Indak baranti di sinan, Muhammad Husen jo rekan-rekannyo mambangun usaho sosial kreatif nan banamo Sumatra Life Eco sajak 2018. Malalui usaho ko, buluah diolah manjadi babagai paralatan makan jo produk minuman nan ramah lingkungan nan dipasarkan ka Eropa, tarutamo Balando.
Nan menarik, sadonyo produk tu dibuek dek anak mudo nan mereka dukuang sabagai bagian dari pemberdayaan ekonomi masyarakat. Manuruiknyo, pambangunan pariwisata berbasis komunitas kini mulai mandapek banyak masukan positif dari panduduak karano dianggap mampu mambuek dampak ekonomi sambia manjago warisan budayo jo alam.
Walaupun pado mulonyo kaluarga tu maremehkan kagiatan sosial nan dilakukannyo karano dianggap indak manjanjikan sacaro materi, dukuangan lambek-lambek tumbuah sasudah mancaliak hasil jo dampak nyato dari satiok garakan nan dilakukan. Muhammad Husen juo taruih maingek pasan almarhum ayahnyo, “Ilimu nan paliang pantiang dalam iduik ko adolah ilimu kaikhlasan, karano dalam kondisi jo situasi apopun, kaikhlasan akan manjadi lilin di jalur diam nan dijalani.”
Malalui semangat iko, inyo baharok masyarakaik dapek mamaksimalkan potensinyo dalam rangka manciptakan dampak ekonomi, sosial jo pandidikan nan balanjuik. Kapado generasi mudo Minang jo anak mudo Indonesia, baliau manasehati, “Indak ado kasuksesan nan datang samalam suntuk. Kasuksesan adolah buah sumangaik nan indak mati jo baraja nan indak pernah habih.” (tan parpatiah/rri)
