Sijunjuang – Dek ndak juo tatagah dek aparat keamanan urang manambang ameh ilegal ko di Sijunjung, Gubernur Sumbar Mahyeldi Ansharullah singajo datang bana pai ka tambang ilegal tu lai.
Gubernur Mahyeldi Ansharullah, pai langsuang manamui masyarakaik dan mamareso kegiatan panambangan ameh tanpa izin (PETI) di daerah Batu Gando, Nagari Muaro, Kabupaten Sijunjung, hari Salasa patang ko (19/5/2026).
Kecek Buya Mahyeldi ko, nyo pai mamareso langsuang dek lah tajadi banyak cilako di tambang-tambang lia sarupo iko bahkan lah banyak nan mati bagai dek tatimbun.
Diiriangi dek Wakia Bupati Sijunjung Iradatillah jo jajaran OPD Pemprov Sumbar, Mahyeldi manyaksikan sacaro langsuang kagiatan tambang ameh nan baoperasi manggunoan ratusan kotak talang di ateh ponton di sapanjang sungai.
"Kalau indak punyo izin, langsuang dapek izin. Pemerintah alah manyiapkan Kawasan Pertambangan Rakyat (WPR). Kami mandorong pangaluaran Izin Pertambangan Rakyat (IPR) supayo kagiatan masyarakaik bisa bajalan sasuai jo aturan," kato Mahyeldi di muko para panambang.
Pamarintah, katonyo, indak nio urang mancari nafkah jo caro nan mambahayoan kasalamatannyo surang apolai marusak lingkuangan sakitarnyo pulo.
Salamo mamareso ko, gubernur juo manamukan baso masih banyak kagiatan panambangan sarupo nan baoperasi di sajumlah titiak lain nan indak jauah dari daerah sungai. Kondisi iko manunjuakan baso praktek panambangan ilegal masih balangsuang sacaro masif di daerah Sijunjung.
Sasudah mamareso lokasi panambangan nan aktif, Mahyeldi bapindah ka arah lokasi tanah longsor panambangan ilegal di Sintuk, Jorong Koto Guguk, Nagari Guguk, Kecamatan Koto VII, nan pado hari Rabaa bisuaknyo. Di situ tambang lia ko lah mambunuah salapan panambang ameh.
Kajadian fatal ko tajadi katiko buruh tambang lia sadang malakukan kagiatan panambangan di daerah tu tanpa izin. Tanah longsor tibo-tibo mangubuakan buruh di tampek tambang. Pado wakatu nan samo, banjir di sungai sakitar lokasi juo mahondoh puluahan ponton alat panambangan panduduak.
Tambang lia ko sadang manjadi sorotan bana dek masyarakat Sumatera Barat karano diduga ado nan mambeking. (tan parpatiah)
