Padang — Bak kato urang tuo, “jalan nan rancak bukan sajo untuak lalu lalang, tapi untuak manyambuang hati jo panghiduikan.” Itulah nan tampak dari kisah kareta api di Ranah Minang. Dari maso ka maso, rel basi nan malintang dari pantai ka darek alah manjadi urek nadi ekonomi jo kahidupan masyarakat Sumatera Barat.
Wakil Presiden Komunikasi Korporat PT KAI, Anne Purba, manarangkan baso Sumatera Barat ko punyo tampek nan istimewa dalam sajarah perkeretaapian nasional. Dari awal dibangunnyo, rel kareta indak sajo manyambuang tambang jo palabuahan, tapi juo manjambatani kota-kota jo kampuang-kampuang di ranah nan elok ko.
“Sumatera Barat manunjuakkan bagaimana kareta api dari dulunyo lah manjadi panyambuang ekonomi, kota, palabuahan jo masyarakat. Jajak sajarah itu masih cocok dipakai untuak mambaco kabutuahan konektivitas Sumatera kini,” kecek Anne.
Kini, Divre II Sumatera Barat mauruih jaringan rel sapanjang kurang labiah 312,2 kilometer. Dari jumlah itu, 110,9 kilometer masih hiduik jo aktif dilalui kareta, sadangkan labiah dari 201 kilometer lai masih non aktif alias mulai jadi basi tuo, manunggu wakatu untuak diaktifkan baliak.
Jaringan ko ditopang dek 20 stasiun jo shelter panumpang, ditambah ampek stasiun khusus angkutan barang.
Kareta Makin Disuko iMasyarakat
Kini, masyarakat Minangkabau dapek manikmati palayanan KA Pariaman Ekspres, KA Minangkabau Ekspres, KA Lembah Anai, jo kareta wisata KA Mak Itam. Kareta-kareta ko indak sajo maangkuik urang pai jo pulang bakarajo, tapi juo mambantu akses ka Bandara Internasional Minangkabau jo ka tampek wisata nan terkenal di ranah ko.
“Salamo Januari sampai Mei 2026, kareta panumpang di wilayah Divre II Sumatera Barat alah malayani 913.674 urang palanggan. Samentaro itu, untuak angkutan barang, KAI alah mangangkek 492.220 ton simin jo klinker, nan mambantu kalancaran industri jo pembangunan di Sumatera Barat,” kecek Anne.
Bak aia nan taruih mailia, minaik masyarakat ka transportasi rel juo makin batambah dari tahun ka tahun. Pado tahun 2021, jumlah panumpang baru sakitar 1,09 juta urang. Kini, pado tahun 2025, jumlah itu alah manjulang hampia 1,98 juta urang, naik sakitar 81 persen.
Nan paling banyak dipakai adalah KA Pariaman Ekspres, nan salamo tahun 2025 alah mangangkek 1,6 juta panumpang. Samentaro KA Lembah Anai juo mancatatkan kanaikan nan cukup tinggi sasudah ado panyesuaian rute parjalanan.
Kecek Anne, kasuksesan kareta api di Sumatera Barat indak bisa dipisahkan dari kadekatannyo jo kahidupan urang banyak.
“Kareta api di Sumatera Barat lah jadi bagian dari kahidupan masyarakat. Ia malayani parjalanan saban hari, akses ka bandara, wisata, sakaligus mambantu distribusi barang,” kato nyo.
Mambangkik Batang Tarandam
Di baliak rel nan kini masih diam, tasimpan harapan gadang untuak maso depan. Banyak jalur nonaktif nan masih punyo potensi untuak dihiduikkan baliak. Di antaronyo jalur Naras–Sungai Limau, Kayu Tanam–Padang Panjang–Bukittinggi–Limbanang, Muarokalaban–Sawahlunto, sampai Solok–Muarokalaban.
Salah satu jalur nan dipandang paling manjanjikan adalah lintas Kayu Tanam–Padang Panjang–Bukittinggi–Payakumbuh sajang kurang labiah 67 kilometer. Kalau rel ko bisa diaktifkan baliak, mako jalan ka kawasan wisata, pusat pendidikan, sentra ekonomi, jo jalur logistik di Ranah Minang akan makin lancar.
Harapan ko makin basuo jo kanyataan dek karano sektor pariwisata Sumatera Barat kini tumbuah pesat. Kalau pado tahun 2021 jumlah parjalanan wisatawan nusantara baru sakitar 8,4 juta kali, maka pado tahun 2025 alah mancapai 20,7 juta kali parjalanan.
Tampek-tempat wisata nan masyhur takah Jam Gadang, Danau Singkarak, Sawahlunto, Padang Panjang, jo Bukittinggi akan makin mudah dicapai pobilo jaringan kareta api dapat dikambangkan baliak.
Rel Bukan Sajo Jalur, Tapi Jalan Kamajuan
Bak pituah Minang mangatokan, “nan jauh didekekan, nan dakek diparapek.” Itulah makna satiok rel nan dibangun. Kareta api indak sajo alat transportasi, tapi juo nan ka mambuek biaya logistik labiah murah, mambukak akses wisata, jo mambangkikkan ekonomi daerah.
Anne Purba manyampaikan pandangannyo jo sabuah pituah nan sarat makna. Manuruiknyo, sajarah rel di Sumatera Barat maaja kan bahwa konektivitas bukan sajo soal jalan nan tahubuang, tapi juo soal kasampatan nan samo ratonyo untuak masyarakat.
“Sajarah rel Sumatera Barat mangajarkan bahwa konektivitas bukan sajo jalur parjalanan, tapi juo jalan ka kamajuan wilayah, partumbuhan ekonomi, jo kasampatan nan labiah adil bagi masyarakat,” tutup Anne.
Mako, di tangah laju pembangunan Sumatera kini, rel-rel lamo nan masih tabangkalai ibarat batang tarandam nan manunggu dibangkikkan. Sabab salamo kareta masih babunyi di Ranah Minang, salamo itu pulo danyuik ekonomi jo paradaban akan taruih mailia dari rantau ka darek, dari gunuang ka pasisia. (Tan Parpatiah/goodnewsfromindonesia)
