Batu Sibeloh carito nan ado di Nagari Limau Lunggo, Kecamatan Lembang Jaya, Kabupaten Solok, Sumatera Barat. Batu Sibeloh manuruik carito nan didanga dari urang tuo-tuo dulu, ado surang anak nan sangek patuah ka urang tuonyo. Anak ko indak pandai mangecek, kok di Minang dinamoan beloh.
Karano inyo indak pandai mangecek, dipanggialah iyo Sibeloh. Sibeloh adolah anak nan rajin manolong ibunyo jo sanang bakawan. Sibeloh anak elok laku nan suko manolong urang di kampuangnyo baitu juo jo kawan samo gadang. Sia nan patuik ditolong Sibeloh langsuang manolong indak paralu mintak tolong dulu ka inyo. Sadonyo urang baiak gadang jo ketek sanang ka inyo.
Sibeloh karajo sahari-harinyo adolah mangubalo kambiang. Satiok hari Sibeloh kubalo kambiang di bukik nan ado di kampuangnyo. Di bukik tu ado batu gadang nan tenggih manjulang. Dari ateh batu tu nampak Bukik Barisan nan sambuang-manyambuang, hamparan sawah nan sangek lueh jo Danau Singkarak nan sangek rancak. Pamandangan nan rancak manyajuakkan mato jo manyanangan kiro-kiro. Sibeloh sanang duduak di batu sambie mambunyian pupuik batang padi.
Sabalum kambiang kanyang, Sibeloh balum namuah pulang. Kambiang Sibeloh patuah pulo ka Sibeloh. Kok lah pukua ampek, kambiang Sibeloh lah bakumpua dakek batu Sibeloh duduak. Dietongnyo kambiang dek Sibeloh. Kok alah cukuik, Sibeloh siap-siap untuak pulang.
Sampai di rumah, Sibeloh mamasukkan kambiangnyo ka dalam kandang. Sibeloh siap-siap untuak mandi. Sasudah mandi, Sibeloh lah pai ka surau untuak baraja basilek jo Angku Dareh. Sungguah baitu pun, Sibeloh indak pandai mangecek, tapi apo kato guru disimak dan inyo mangarati apo nan diaja Angku Dareh. Banyak pulo kawan Sibeloh nan baraja basilek jo Angku Dareh.
Sarupo biaso, satiok pagi Sibeloh lah pai kubalo kambiang. Wakatu itu hari indak sarancak hari biaso. Kabuik kalam nan manutupi samak, jarak pancaliekan sameter indak manampak. Sungguah baitu, indak manyuruikkan samangek Sibeloh untuak kubalo kambiang.
Tibo di bukik, nan kambiang alah batebaran mancari makan. Mode biaso, Sibeloh naiak ka ateh batu nan gadang tinggi manjulang. Samantaro kambiang makan, Sibeloh pun makan baka nan dibungkuihkan amaknyo. Alah sudah makan, paruik kanyang hati Sibeloh alah sanang. Inyo mulai mambunyian pupuik batang padinyo.
Wakatu Zuhur alah masuak, Sibeloh alah siap-siap untuak sumbayang Zuhur. Sudah sumbayang, hari lah baransua sanjo. Sungguah baitu nan kabuik kalam indak juo kunjuang tarang malahan batambah galok.
Kalau lah sanjo, biasonyo Sibeloh maimbau kambingnyo jo mambunyian pupuik batang padi. Alah lamo Sibeloh mambunyian pupuik nan kambiang gak saikue alum juo ado nan tibo. Hari lah samakin sanjo juo. Turunlah Sibeloh dari batu untuak mancari kambiang nan mancari makan tadi. Hari lah laruik sanjo, nan kambiang indak juo ado.
Tabik lah tangih Sibeloh karano lah Magrib, kambiang indak juo basuao. Sibeloh pulang sambia manangih taisak-isak. Tibo di rumah amak Sibeloh batanyo, “Dima kambiang,” jo baso isyarat.
Sibeloh manjawek baso kambiang indak ado lai sikue alah jo indak basobok. Mancaliek baso isyarat Sibeloh, amaknyo bangih ka Sibeloh. Amaknyo manyuruah Sibeloh untuak mancari kambiang nan hilang. Sabalum basuo, Sibeloh indak buliah pulang dek amaknyo.
Mancaliek amaknyo lah bangih, Sibeloh pai kateh bukik samalam-malam jo ari mamakai suluah daun karambie untuak mancari kambiang nan hilang. Tibo di ateh bukik, Sibeloh naik kateh batu nan aie mato jatuah badarai juo. Dibunianlah pupuik batang padi dek Sibeloh. Nan kambiang indak juo ado nan tibo. Suluah daun karambie lah nak abih pulo. Turun lah Sibeloh dari batu mancari-cari kambiang manyusuri bukik nan banyak kayu-kayu gadang. Sibeloh lah indak tau lo jalan pulang lai.
Lah bisuak pagi, nan Sibeloh indak juo pulang. Amaknyo lah cameh ado raso manyasa manyuruah anaknyo mancari kambiang. Dek amak nyo cameh disabuiklah ka masyarakaik baso anaknyo dak pulang samalam dek mancari kambiang. Basamo-samo lah warga mancari Sibeloh. Lah ditelusuri bukik tu, nan Sibeloh indak juo basuo. Tapi ado nampak aneh di warga jajak harimau jo darah nan bakatai-katai ilie rimbo tu.
Kini kambiang indak pulang, nan Sibeloh indak lo basobok. Lah baari-hari warga mancari indak juo basuo. Karano warga lah panek mancari indak basuo jo, lah baranti urang mancari. Tapi amak Sibeloh acok juo mancari anaknyo kateh bukik tu. Kadang tadanga bunyi pupuik batang padi mantuak ado nan mambunyian. Lah dicaliek beko, bunyi pupuik lah hilang se. Tabiklah tangih amak Sibeloh nan anak indak juo basuo. Nan amak Sibeloh kini lah manyasa mambangihi anaknyo. Sasa kudian indak baguno lai. Sajak itu batu nan tampek Sibeloh duduak dinamoan Batu Sibeloh.
