Padang — Gubernur Sumatera Barat, Mahyeldi Ansharullah, kini barado di Nagari Japang dalam rangka mamanuahi undangan resmi dari Asian Development Bank (ADB). Kabarangkatan ko bukanlah perjalanan nan indak ado gunonyo, malahan bagian dari ikhtiar mancari peluang karajo samo jo dukungan pambiayaan untuak kamajuan Ranah Minang di maso nan ka datang.
Dek banyak nan mampatanyokan perjalanan ka Japang ko, mako Wakil Gubernur Sumbar, Vasko Ruseimy, maagiah penjelasan bahwasanyo kaadiran Gubernur Mahyeldi di Jepang basamo Gubernur DKI Jakarta adolah dalam rangka mamanuahi undangan ADB nan bapusek di nagari sakura tu.
“Sumbar jo DKI Jakarta kini sadang manjalin karajo samo pambiayaan pambangunan jo ADB. Dek karano itu, kaduo gubernur diundang langsung dek pihak ADB,” kecek Vasko kapado wartawan, hari Rabaa patang ko (17/6/2026).
Vasko maharokkan supayo sagalo pihak basikap tabayyun labiah dahulu, indak langsuang manyimpulkan bahwa satiok perjalanan kapalo daerah ka lua negeri salalu bahubungkan jo hal-hal nan negatif.
Manuruiknyo, pambangunan daerah indak bisa dipacu kalau pamarintah hanya bakurung di wilayahnyo surang. Hubungan, komunikasi, jo jejaring balabagai pihak, termasuk di tingkek internasional, adolah modal penting untuak mampacapek kamajuan daerah.
“Indak salalu perjalanan ka lua negeri tu lalu dikategorikan negatif. Logikanyo sederhana sajo. Kalau pamarintah nagari indak baurusan jo kabupaten, kota, apo lai provinsi, tantu nagarinyo jalan di tampek juo, indak maju-maju,” kato Vasko.
Vasko manambahakan, kondisi nan samo juo balaku pado pamarintah kabupaten maupun provinsi. Kalau hubungan jo pamarintah pusat ataupun lembaga nan bisa mambantu pambangunan indak dijalin, mako laju kamajuan daerah pun jadi lambek.
“Kalau kabupaten atau provinsi indak bakomunikasi jo pusat, tantu daerahnyo akan baitu-baitu sajo. Kini kito sadang malakukan akselerasi jo manjalin komunikasi langsung jo pihak lua negeri untuak manciptokan hal-hal positif bagi Sumbar,” tambahnyo.
Samentaro itu, Kapalo Biro Administrasi Pimpinan Pemprov Sumbar, Nolly Eka Mardianto, maagiah panjalasan labiah rinci tantang perjalanan Gubernur Mahyeldi ka Jepang, khususnyo manyangkuik soal anggaran.
Kato Nolly, saluruh biaya perjalanan gubernur ka Jepang indak mamakai dana APBD Sumatera Barat, malahan ditanggung sapanuahnyo dek pihak ADB sabagai pangundang.
“Di Indonesia ado duo provinsi nan diundang, Sumatera Barat jo DKI Jakarta. Kegiatan balansuang dari tanggal 15 sampai 20 Juni 2026,” kecek Nolly.
Dipilihnyo Sumbar jo DKI Jakarta indak lapeh dari komitmen kaduo daerah dalam madorong pambangunan nan balanjutan. Di antaro program nan jadi perhatian adalah pangambangan energi panas bumi serta panguatan ekonomi hijau atau green economy.
Salamo ko, Pamarintah Provinsi Sumbar memang aktif mancari sumber pambiayaan alternatif untuak pambangunan daerah, sahinggo indak salalu bagantuang pado APBD maupun APBN.
Dalam forum di Jepang ko, Pemprov Sumbar jo Pemprov DKI Jakarta dijadwalkan mamaparkan babagai program, gagasan, jo strategi pambangunan daerah di hadapan pimpinan ADB.
Harapannyo, dari paratamuan ko lahia paluang karajo samo nan labiah arek, baik dalam bentuk dukungan program maupun suntikan dana pambangunan dari lembaga internasional ko.
“Kito barharap ADB dapek maluncuakan dukungan anggaran untuak pambangunan daerah. Di tangah kondisi fiskal nan agak tasampik jo kabijakan efisiensi kini, tantu sumber pambiayaan alternatif manjadi paluang nan patuik dimanfaatkan,” kato Nolly. (Tan parpatiah)
