Padang — Sanggar Permata Hati nan terkenal jo produk deta nyo dikunjuangi dek tigo dosen dari Universitas Multimedia Padang untuak kagiatan Pambardayaan Kamitraan Masyarakat (PKM).
Galeri Permata Hati Grup, nan talatak si Jalan Bakti, Parupuk Tabing, Kota Padang, dikunjuangi hari Sabtu (20/6).
Katigo dosen nan turun dalam kagiatan ko adolah Gusrino Yanto, M.Kom, Sari Puspita, M.Si, jo Nency Extise Putri, M.Kom. Kagiatan ko juo dibantu dek duo urang mahasiswi, yakni Ofika Parsyanda jo Husnul Citra Nabila.
Manuruik Gusrino Yanto, PKM nan dilaksanakan ko mangangkek tema “Implementasi Explainable AI-Powered Chatbot Sabagai Sistem Cadiak untuak Optimalisasi Pamasaran Deta Rancak jo Tingkuluak Kreasi Sanggar Permata Hati.”
“Alhamdulillah, kagiatan PKM kami ko dibiayoi dek Kemdiksaintek RI jo nomor kontrak 213/C3/DT.05.00/PM/2026. Salain di Sanggar Permata Hati, PKM ko juo kami laksanakan di PKBM Farila Ilmi Parupuk Tabing. Duo tampek ko lah lulus wakatu kami mangajukan proposal ka Kemdiksaintek RI,” kato Rino, panggilan akrab Gusrino Yanto.
Tujuan utama PKM ko adolah mambantu Sanggar Permata Hati supaya punyo toko online atau laman web surang sabagai tampek pamasaran produk-produknyo.
“Jo adonyo toko online ko, Permata Hati dapek manjua hasil karyonyo sacara labiah laweh. Sistem pambayaran juo lah tasadio dalam aplikasi, sahinggo indak paralu lai manggunokan caro manual nan salamo ko dipakai,” ujanyo.
Rino manambahakan, peserta nan diundang dalam PKM ko barjumlah 20 urang, nan tasusun dari palaku Usaha Mikro, Kaciak jo Manangah (UMKM), tamasuak anggota Sanggar Permata Hati sandiri, disampiang masyarakat umum nan ingin manambah pangatahuan di bidang digital.
Suasana palatihan barjalan lancar, aman jo komunikatif. Para peserta tampak antusias jo banyak mananyokan babagai hal, baiak tantang program PKM maupun tantang panggilunoan aplikasi toko online nan dirancang dek tim dosen Universitas Multimedia Padang ko. (Tan Parpatiah).
