Padang – Untuak maantisipasi maruyaknyo serangkan pinyakik kanker di masyarakat, Pamarantah Provinsi Sumatera Barat (Sumbar) kini makin intensif malakukan pamariksaan dini kesehatan masyarakaik ka saluruh daerah.
Sabanyak 78 rumah sakik, sakitar 250 puskesmas, 1.035 urang dokter, jo labiah dari 9.000 urang parawt nan taseba di kabupaten jo kota di Ranah Minang disiapkan.
Gubernur Sumatera Barat, Mahyeldi, manyabuikkan Sumbar sabanarnyo alah punyo modal nan kuat untuak mampacepek pamaresoan dini kanker ko. Manuruiknyo, saluruh sarana jo prasarana kesahatan nan ado musti dimanfaatkan sabaaik mungkin, sahinggo palayanan skrining indak sajo tasadio di rumah sakik rujukan, tapi juo di puskesmas nan paliang dakek jo masyarakat.
“Sumbar punyo modal nan cukuik kuaik untuak mampacapek upayo deteksi dini kanker,” kecek Mahyeldi di Padang, hari Akaik (12/7/2026).
Mahyeldi manilai, panyakik kanker akan labiah mudah ditangani kok lah diketahui sajak di awal. Sabab itu, pamaresoan dini jadi langkah nan paling penting untuak manyalamatkan nyawo.
“Kalau kanker dapek diketahui di stadium awal, kasampatan untuak sehat jo hasil pangobatan nan baik akan jauah labiah gadang,” katonyo.
Untuak mamastikan program ko bajalan lancar, Gubernur lah mamintak Dinas Kasahatan Sumbar manyiapkan aturan, baik dalam bentuk surat edaran maupun kabijakan lain, supayo pamaresoan dini kanker dapek dilaksanakan sacaro marato di saluruah fasilitas kesehatan.
Salain tu, pamaresoan kanker juo ka dipadukan jo Program Cek Kasahatan Gratis dari pamarantah pusat. Palaksanaannyo akan malibatkan rumah sakiik, puskesmas, perguruan tinggi, organisasi profesi kasahatan, hinggo pamarantah kabupaten jo kota.
Mahyeldi baraharok, jo karajo samo saluruah pihak, masyarakat indak ado lai nan kasulitan mancari palayanan pamariksaan dini kanker.
Samantaero tu Direktur Utama RSUP Dr. M. Djamil Padang, Dr Dovy Djanas, manambahakan bahaso usaho mananggulangi kanker indak cukuik jo pamaresoan sajo. Masyarakat juo paralu dibari pangatahuan tantang gejala, faktor risiko, caro pangobatan, sampai dukungan kapado pasien.
“Kalau dideteksi sajak awal, ditangani dengan batua-batua, disaratoi dukungan keluarga jo masyarakat, banyak penyintas kanker nan masih dapek hiduik produktif jo punyo kualitas hiduik nan baik,” kecek Dovy.
Ancaman Dunia
Langkah nan diambiak Pamarantah Provinsi Sumbar ko salaras jo kondisi dunia nan kini masih dihadapkan pado ancaman kanker. Organisasi Kasahatan Dunia (WHO) mamparakirokan, satu dari limo urang di dunia akan manjalani panyakik kanker salamo hiduiknyo.
Bahkan, hampia 92 persen masyarakat dunia diparokirokan bakal basentuhan jo panyakik ko, baik karano mangalami sandiri maupun ado anggota keluarga nan didiagnosis kanker.
Ketua Tim Pengendalian Kanker WHO, Dr. Andre Ilbawi, mangatokan salamo ko urang labiah banyak mambao kaba tantang kamajuan teknologi jo pangobatan kanker. Padahal, nan masih manjadi masalah gadang adolah ketimpangan akses masyarakat untuak mandapek pancegahan, diagnosis, pangobatan, jo parawaatan.
Laporan WHO taun ko manyabuikkan kini ado sakitar 20,6 juta kasus baru kanker jo 10 juta kamatian satiok taun di saluruah dunia. Angko ko diparokirokan akan maningkek manjadi hampia 35 juta kasus baru pado taun 2050.
Laporan tu juo manunjuakkan jurang nan masih lapeh antaro nagari maju jo nagari nan sadang bakambang. Di nagari maju, labiah dari 85 persen pasien kanker payudaro jo kanker pado anak dapek batahan hiduik limo taun atau labiah. Sabaliknyo, di nagari nan panghasilannyo randah, angko tu indak sampai 30 persen.
Kondisi ko makin dipaparah dek tabatehnyo katasadioan ubek kanker. Di banyak nagari miskin, ubek-ubek penting masih sarik, bahkan ado 23 negara nan lun punyo fasilitas radioterapi.
Maliek kondisi tu, Pamarantah Provinsi Sumatera Barat baraharok program pamariksaan dini nan kini digalakkan dapek mambuek masyarakat labiah sadar akan pentingnyo mamaresokan kasihatan sajak dini. Sabab, kanker nan diketahui sajak awal bukan sajo mampagadang kasampatan ceak, tapi juo mambari harapan untuak manjalani hiduik nan labiah lamo jo bakualitas. (Tan Papatiah)
