Ditulih dek: Buya H Masoed Abidin
Urang tuo-tuo di ranah Minang alah lamo maingekan, kok tinggi ilmu indak babudi, kok banyak pandai indak baakhlak, umpamo padi hampo nan indak baisi. Makonyo, ukuran kamajuan suatu bangsa bukan sajo dek canggihnyo teknologi, tingginyo sakola, atau gadangnyo panghasilan, tapi nan labiah utamo adolah kokohnyo akhlak manusianyo. Sabab, akhlak itulah pangka jo ujuang dari sagalo kamajuan.
Kini, banyak tingkah laku nan manyimpang lah jadi tontonan saban hari. Perbuatan aniayo, maksiat, korupsi, narkoba, sampai ka rusaknyo sopan santun, manjadi tando baso tali nan makek moral jo budi pekerti lah mulai lungga. Kok hati indak lai dikawal jo iman, pikiran indak lai dipandu akhlak, mako hilanglah arah jalan hiduik nan sabananyo.
Nan paliang taraso –
Akibaiknyo adolah generasi mudo. Urang mudo tumbuah di tangah arus zaman nan baganti capek, namun sayang, pendidikan nan dahulunyo maarah ka pambentukan watak, kini banyak nan talampau mangaja mancari angko, pangkek jo ijazah. Sakola indak lai tampek mancetak urang baalhlak, tapi acok dipandang sabagai tampek mancari kauntuangan. Profesi guru nan dahulunyo diagiah marwah tinggi sabagai murabbi, kini indak banyak lai nan mangharagoi.
Di sisi lain, panutan dalam masyarakat mulai barakurang. Panghulu, niniak mamak, alim ulama, cadiak pandai nan dahulunyo bakato didanga, bajalan dituruik, kini banyak nan hilang wibawanyo. Padahal, di Minangkabau, urang tuo-tuo alah maninggakan falsafah nan indah: Adat Basandi Syarak, Syarak Basandi Kitabullah. Falsafah iko bukan hanyo rangkaian kato, tapi pedoman hiduik nan mamadukan adat jo agamo dalam sagalo sisi kahidupan.
Kok adat lah baranti di kulit, syarak indak lai manjadi isi, maka nan tingga hanyo simbol jo upacara. Padahal adat tanpa syarak umpamo batang indak baurek, sadangkan syarak tanpa diamalkan indak akan manarangkan jalan kahidupan. Sabab itu, kok salah satunyo lapeh, mako goyanglah tatanan nagari.
Globalisasi mambao banyak parubahan. Banyak nan mambari manfaat, namun indak saketek pulo nan mambao pangaruah buruak. Budayo asing masuk indak babateh, mambao caro hiduik nan kadang indak sasalero jo adat jo syarak. Kok indak pandai manyariang nan elok jo nan buruak, lamo-jo lambek urang awak bisa kehilangan jati dirinyo.
Akibatnyo, lahir pulo krisis nilai di tangah masyarakat. Nan dahulu dianggap pantang, kini dipandang biaso. Nan dahulu dipandang malu, kini malah dibanggakan. Sikap indak acuah, saling mambiakan, bahkan mambanakan kasalahan mulai tumbuah. Raso malu nan dahulunyo manjadi pakaian urang Minang, kini mulai lapuak dimakan zaman.
Dari sinan lah timbua nan namonyo erosi kapicayoan. Masyarakat indak lai picayo ka pamimpin, murik indak lai hormat ka guru, anak indak lai tagak hormat ka urang tuo. Padohal kapicayoan itulah modal sosial nan paliang maha dalam mambangun suatu bangsa. Kok kapicayoan lah hilang, nan tingga hanyo curiga jo kapantingan diri sandiri.
Di dalam rumah tanggo, tangguang jawab urang tuo pulo manyangko tantangan nan indak ringan. Banyak anak labiah lamo bagaua jo gawai daripado bagaua jo ayah bundonyo. Banyak nan labiah tau kato urang lain daripado pituah niniak mamak. Akibatnyo, pendidikan akhlak nan sabananyo dimulai dari rumah, indak lai bajalan sabagaimano mestinyo.
Kasenjangan sosial nan masih tajadi makin mampasampik kasampatan anak nagari untuak mandapek pendidikan jo karajo nan layak. Nan kuaik makin maju, nan lamah makin tatingga. Kok kaadaan iko dibiakan, maka idealisme generasi mudo lambek-laun akan baganti jo sikap putuih aso jo pragmatis.
Panyakik sosial nan kini marajolelo, tarutamo korupsi, sabananyo bukan hanyo panyakik hukum, tapi panyakik akhlak. Urang nan korup bukan indak tau mano nan bana jo nan salah, tapi dek akhlak lah talapeh dari diri. Amanah nan sabananyo harus dijago, malah dijua untuak kapantingan pribadi.
Di zaman nan sadonyo maju ko, banso awak memang butuh sumber dayo manusia nan cadiak, pandai, mahia jo sanggup basaiang jo banso lain. Tapi kacadiakan sajo indak cukuik. Nan labiah diparalukan adolah manusia nan baiman, baakhlak, luruih, amanah jo tahu malu. Itulah modal utamo untuak mambangun nagari nan kuaik.
Sabab itu, alah wakatuahnyo sagalo unsur masyarakat baliak mampakuaik pendidikan akhlak. Kaluarga, surau, sakola, niniak mamak, alim ulama, cadiak pandai, bundo kanduang, sampai ka pamarintah, samo-samo mamikua tangguang jawab nan indak buliah dipatah-patahkan. Pendidikan indak buliah hanyo mambuek anak pandai, tapi juo harus mambuek anak jadi ‘urang’.
Urang Minangkabau alah lamo diparingekkan dek petatah-petitih:
“Nan tuo dihormati, nan ketek disayangi, nan samo gadang dibao baiyo.”
Sasudah itu, urang tuo juo maaja awak:
“Adat dipakai baru, syarak dipakai usang.”
Mukasuiknyo, adat salalu dapek manyasuaikan diri jo parubahan zaman, namun syarak tatap manjadi padoman nan indak buliah diganti. Kok adat jo syarak tatap basandi jo basinggungan, insya Allah lahiahlah generasi nan kokoh iman, luruih akhlaknyo, tinggi ilmunyo, jo mulia budi pekertinyo.
Sabab, sasungguahnyo nan mambuek suatu banso tagak bukanlah samato dek kayo harato, tinggi pangkek, atau canggih teknologi. Banso wak akan tatap tagak salamo manusianyo masih manjunjuang akhlak, manjago marwah, jo mamaliharo nilai-nilai agama jo adat pusako. Kok akhlak lah hilang, maka lambek-laun hilang pulo kakuatan sumber dayo manusianyo. Tapi kok akhlak tatap tajago, insya Allah bangsa ko akan tatap kokoh, bak batang tarandam nan indak lapuak dek hujan, indak lakang dek paneh.
Wallahualam.
