Padang – Untuak partamo kali sajak masa jabatan Kapolda Djati Wiyoto Abadhy, dilakukan mutasi jo rotasi pajabaik utamo di lingkungan Polda Sumbar.
“Ado ampek pajabaik utamo Polda nan baganti jo nan baru, sadangkan nan lamo mandapek panugasan di tampek lain,” kato jurubicaro Polda Sumbar Kombespol Susmelawati Rosya kapado pers, Hari Rabaa (30/9).
Kaampek Pajabaik Utamo (PJU) Polda Sumatera Barat tu alah malakukan sarah tarimo jabatan nan dilaksanakan di ruang rapek utamo (Rapattama), Ruang Jenderal Soekanto lantai IV Mapolda Sumbar, Salasa (29/9). Acara tu dipimpin langsung dek Kapolda Sumbar Irjen Pol. Djati Wiyoto Abadhy.
“Pagantian tu marupokan bagian dari pambinaan jo panyegaran organisasi di lingkungan Polda Sumbar. Jadi, indak ado alasan lain-lain,” kato Kombes Susmelawati.
Ampek PJU nan manyarah-tarimokan jabatan tu adolah Direktur Reserse Kriminal Umum (Dirreskrimum), Direktur Reserse Kriminal Khusus (Dirreskrimsus), Kepala Bidang Profesi jo Pangamanan (Kabid Propam), sarato Kepala Biro Sumber Daya Manusia (Karo SDM).
Dirreskrimum Polda Sumbar kini ditempati AKBP Umar. Inyo manggantikan Kombes Pol. Teddy Fanani nan mandapek panugasan sabagai Dosen Kepolisian Madya Tingkek II STIK Lemdiklat Polri.
Umar manjadi satu-satunyo nan bapangkek AKBP di antaro kaampek PJU baru tu, nan lain adolah Kombes. Namun, diprakirakan inyo akan sugiro naiak manjadi Kombespol, dek inyo marupokan AKBP senior sasudah manjalani jabatan sabagai Wadirreskrimum Polda Jatim.
Kamudian, posisi Dirreskrimsus Polda Sumbar kini dijabat Kombes Pol. Siswantoro. Sabalunnyo, Siswantoro manjadi Kabid Propam. Dirreskrimsus sabalunnyo adolah Kombes Pol. Andry Kurniawan nan mandapek panugasan baru di STIK Lemdiklat Polri.
Untuak posisi Kabid Propam nan ditinggakan Siswantoro, kini diamban dek mantan Kabid Propam Polda Papua Barat, Kombes Pol. Tony Pantano.
Samantaro jabatan Karo SDM Polda Sumbar kini ditempati Kombes Pol. Wahyu Rohadi nan mutasi dari Assessor SDM Kepolisian Madya Tingkek III SSDM Polri.
Kombes Pol. Anissullah M. Ridha, Karo SDM sabalunnyo, kini alih tugas manjadi Karo SDM Polda Sumatera Selatan. (Tan Parpatiah)
