Padang — Salamo ko nampaknyo praktik nan indak baiak ko lah bajalan baitu sajo tanpa ado pangawasan. Tapi kudian, Kementerian Haji jo Umrah Kanwil Sumatera Barat, sasudah malakukan inspeksi mandadak di Bandara Internasional Minangkabau, Rabu (30/9/2026), manamukan ado jamaah nan mamakai identitas travel nan indak sesuai.
“Jamaah mandapek pendaftaran di travel A, tapi identitasnyo mamakai travel B. Iko jangga jo indak sesuai jo katantuan,” kato Kepala Kanwil Kementerian Haji jo Umrah Sumatera Barat, M. Rifki, kapado pers sasudah malakukan inspeksi di Bandara Minangkabau tu.
Katonyo, satiok jamaah wajib punyo identitas nan jelas sabalun barangkek, sakurang-kurangnyo malalui kartu identitas nan tahubuang jo aplikasi Nusuk milik Pemerintah Saudi.
Dalam pemeriksaan tu, petugas mamberikan pambinaan kapado sabarapo Penyelenggara Perjalanan Ibadah Umrah (PPIU), khususnyo nan bakaitan jo katapek an identitas jamaah jo panggunaan atribut resmi penyalanggara pado maso barangkek.
Rifki managehkan, PPIU wajib mamakai atribut nan sesuai jo izin penyalanggara nan dimiliki. PPIU indak dibuliahkan mamakai identitas atau atribut panyalanggara lain, baik untuak kaparaluan promosi maupun untuak barangkek.
“Kalau izin travelnyo A, mako wajib mamakai atribut travel A. Jan mamakai atribut travel lain,” tagasnyo.
Panggunoan identitas nan sesuai indak hanyo mamudahkan pangawasan, tapi juo mambantu jamaah untuak mamantau sacaro pasti sia pihak nan batanggung jawab ateh parjalanan ibadahnyo.
Salain tu, Kementerian Haji jo Umrah mamintak saluruah PPIU nan punyo kantua cabang di Sumatera Barat untuak malaporkan kabaradaan kantua cabangnyo kapado Kanwil maupun kantua kabupaten/kota nan bakaitan.
Palaporan ko penting supayo kabaradaan jo kagiatan operasional PPIU dapek dipantau, serato bajalan sesuai jo katantuan nan balaku.
“Jikok ditamukan ado dugaan palanggaran, kami akan mambuek barita acara pemeriksaan, kudian malaporkannyo kapado pamarintah pusat. Tindak lanjutnyo sapanuahnyo manjadi kewenangan pusat,” jelas Rifki.
Tamuan kajanggalan dalam kabarangkatan jamaah umrah pado inspeksi mandadak tu kasudahannyo baujuang pulo jo rencana pambentukan posko khusus Haji jo Umrah di Bandara Minangkabau.
“Kami lah bakorodinasi jo pihak Angkasa Pura supayo disadioan space untuak kami mambuek posko Kementerian Haji di siko,” kato Rifki.
Kabaradaan posko di kawasan bandara dinilai sangat strategis untuak mamantau pargerakan jamaah, mamverifikasi dokumen kabarangkatan, serta mamastikan kalayakan layanan untuak jamaah.
Malalui posko ko, petugas juo dapek bakorodinasi sacaro langsung jo barbagai otoritas nan ado di lingkungan bandara, apobilo ditamukan indikasi palanggaran prosedural.
Indak hanya mangandalkan posko pangawasan, Kementerian Haji jo Umrah Sumatera Barat juo sadang marangkuik kakuatan lintas sektoral malalui pambentukan Satuan Tugas (Satgas) pangawasan panyalanggaraan ibadah umrah.
“Kami juo akan mambantuak satgas nan diisi dek Kementerian Haji, kepolisian, Angkasa Pura, jo imigrasi. Sadonyo akan ikut sacaro aktif dalam malakukan pangawasan panyalanggaraan umrah,” kecek nyo. (Tan Parpatiah)
