Padang — Manunggu giliran naik haji di Sumatera Barat bukanlah pakaro sabanta. Di sabagian daerah, calon jemaah musti mananti sampai 29 tahun baru dapek barangkek ka Tanah Suci. Dek panjangnyo maso mananti tu, masyarakat, khususnyo urang mudo, didorong untuak mulai mampersiapkan diri dan mendaftarkan haji sajak usia mudo.
Bukan barati kuota haji Sumatera Barat indak batambah. Tiok tahun ado pulo panambahan kuota, namun jumlahnyo tatap tabateh dek aturan pembagian kuota nan ditatapkan pamarentah Arab Saudi.
Pado musim haji 2026, misalnyo, kuota dasar Sumatera Barat sabanyak 3.928 jemaah. Jumlah iko labiah ketek dibandingkan kuota tahun 2025 nan mancapai 4.613 jemaah. Satelah ado panambahan, kuota akhir tahun 2026 manjadi 3.959 jemaah.
Gubernur Sumatera Barat Mahyeldi manyabuik, pamarentah daerah mandukung upayo mampakuaik pamahaman masyarakat tantang haji, mambari ruang nan labiah gadang bagi generasi mudo, sarato mamanfaatkan dunia digital untuak manyebarkan informasi nan mandidik jo mambangun.
“Saluruh umat Islam tantu punyo cita-cita nan gadang untuak manjalankan ibadah haji. Tapi, kalau kuotanyo indak dapek kito atur surang, tantu kito musti manyasuaiakan jo katantuan nan dibaraluakan dek pamarentah Saudi,” kato Mahyeldi.
Manuruik panarangan Kantor Wilayah Kementerian Haji dan Umrah Sumatera Barat, walaupun angka kuota dasar nampak labiah ketek, parubahan sistim nan baru iko dinilai labiah adil jo proporsional.
Samantaro itu, tahapan panyalanggaraan ibadah haji 1447 H/2027 M di Sumatera Barat alah mulai bajalan. Daftar jemaah nan masuak dalam kuota kabarangkatan alah ditarimo dan disampaikan ka daerah-daerah, termasuk Sumatera Barat.
Kepala Kantor Wilayah Kementerian Haji dan Umrah Sumatera Barat, M. Rifki, barapo waktu nan lalu manyabuikkan, masuaknyo tahapan panyalanggaraan haji tahun 2027, daftar jemaah nan masuak dalam kuota kabarangkatan alah disampaikan ka saluruah provinsi.
Untuak tahun 2027, estimasi kuota Sumatera Barat dipakirokan masih 3.928 jemaah, samo jo kuota dasar tahun 2026.
Calon jemaah nan punyo nomor porsi sampai 030094885 dimintak untuak sugiro mandatangi kantua Kementerian Haji dan Umrah di kabupaten atau kota tampek tingga masing-masing. Hal iko paralu dilakukan untuak malengkapi dan mamastikan data calon jemaah.
Pamaresoan data tu supayo sagalo keterangan nan ado alah sesuai jo kaadaan nan sabananyo sudah tu proses manatapkan jemaah nan akan barangkek dapek bajalan lancar.
Namun, urusan haji indaklah cukuik sampai malangkoki surek-surek sajo. Calon jemaah juo paralu mampasiapkan diri sacaro fisik.
Rifki maingekkan, maso mananti nan panjang sabalum barangkek hendaklah dimanfaatkan untuak manjago kesehatan dan mampersiapkan kondisi tubuh.
Di Sumatera Barat, antrean haji reguler kini bakisar 24 sampai 29 tahun, tantunyo baragam manuruik kabupaten dan kota tampek masyarakat mendaftar, sarato panyasuaian kuota nan dilakukan.
Data resmi Kementerian Haji dan Umrah mancatat maso mananti nan dapek mancapai sakitar 29 tahun. Samantaro itu, di sabagian daerah dan manuruik keterangan dari pamangku kapantingan, maso mananti barado dalam kisaran 24 sampai 26 tahun.
Panjang pendeknyo antrean indaklah samo di satiok kabupaten dan kota. Kota Padang, misalnyo, manjadi daerah jo jumlah pendaftar nan paliang banyak di Sumatera Barat. Masa mananti di kota iko diparakirakan barado di sakitar 24 tahun.
Mulai dari Usia Mudo
Panjangnyo antrean haji itulah nan mambuek Badan Pengelola Keuangan Haji (BPKH) basamo Badan Riset dan Inovasi Nasional (BRIN) jo Yayasan Harika untuk Kemanusiaan, mandorong masyarakat, tarutamo generasi mudo, untuak mulai mampersiapkan ibadah haji sajak usia mudo.
Gagasan nan dibao bukanlah samato-mato supayo urang capek mendaftar, tetapi supayo niaik untuak manunaikan rukun Islam nan kalimo tu alah dipikirkan sajak jauah-jauah hari.
Anggota Badan Pelaksana BPKH, Harry Alexander, manyabuikkan, mambuek parancanaan haji sajak usia mudo penting dilakukan supayo peluang manunaikan haji pado usia produktif manjadi labiah gadang.
“Apo nan tajadi kini, maso mananti haji nan panjang di sabagian daerah mambuek urang musti mananti batabuah-tabuah tahun. Nah, kalau sajak mudo alah dimulai, pado maso mamasuaki usia dewasa, badan masih sehat-sehatnyo, kesempatan untuak naik haji pun datang,” kato Harry, Sabtu (19/9/2026), sabagaimano dilaporkan bisnis.com.
Manuruik Harry, mendaftar dan mampersiapkan haji sajak mudo paralu dimasuakkan ka dalam parancanaan keuangan keluarga. Pamahaman tantang keuangan haji, manuruiknyo, hendaklah bajalan basamo jo kesiapan batin dan spiritual.
Jo parancanaan nan labiah awal, masyarakat diharapkan indak kalimpungan ketika giliran barangkek alah hampia tibo.
“Jadi, haji diparsiapkan sajak mudo. Dakwah dipaluaѕ malalui karya digital. Jo caro itu generasi mudo dapek bakarya, sekaligus mambari kontribusi. Nah, iko nan kami dorong,” ujarnyo.
Bagi masyarakat Sumatera Barat, panjangnyo antrean haji bararti satu hal: niat nan gadang paralu dimulai jo langkah nan ketek, sajak kini. Mendaftar sajak mudo, mampersiapkan keuangan, manjago kesehatan, dan mamparbanyak ilmu tantang manasik, manjadi bagian dari parjalanan panjang manuju Tanah Suci.(Tan Parpatiah)
